Read bassa SHƐRỤKWỤKWỤ SHI HIIŊ 16 Bible Online

SHƐRỤKWỤKWỤ SHI HIIŊ 16 - bassa bible

SHƐRỤKWỤKWỤ SHI HIIŊ 16

¹Ibɛ ee tecinji Ikpɛtɛ ɛtɛ ya Agwatana nu udulo ata ge Devid teni iŋ. Nazhɛ ee peni du Agwatana arụpɛ tuhwoŋzhingo keeni arụpɛ amɛ-olom.[32]

²Aka na ti ge Devid hwuwi arụpɛ ga tuhwoŋzhingo keeni arụpɛ amɛ-olom tuta, bee peni atwa ata uwebiye ni izeci ya AGWANGWAMA.

³Nazhɛ bee hweŋshi atwa ata Isrɛl iyimɛyɛ kpaaŋ aba. Bee peni butubwenyi be elele keeni biyikwo be elele tu'unto ti ibrɛd ike, nu usunda na ee nyeshi keeni ukara tụ'walụ ta afwafwa tu hwoo.

⁴Ge Devid teri Alivai oko maa e hwuri umbe na tɛzhɛba ta AGWANGWAMA na shɛ Agwatana Isrɛl, na shɛzunga tuzunga keeni ashɛtwa no ofwo Ikpɛtɛ ɛtɛ ya AGWANGWAMA.

⁵Ee teri Asaf maa sha buhwuri-bu-umbe, gɛ Zɛkaria zhɛ no mbiyono bu. Ge Jeiyɛl, ne Shemiramot, nɛ Jɛhiɛl, na Matitia, nɛ Ɛliab, nɛ Bɛnaya, no Obɛd-idụm, keeni Jeiyɛl, aba zhɛ na 'nyama shiduma keeni itɛ. Ga Asaf, ubwa zhɛ na 'nyama apalụ.

⁶Onongbo eyebi: ge Bɛnaya, na Jahaziɛl, aba zhɛ no hwulo akakacɛ aka elele no ofwo Ikpɛtɛ ɛtɛ Unu-tutwa ya AGWANGWAMA.

⁷Iyi ihiiŋ nɛ ge Devid njɛ jita ata, i shɛ bu utegeni Asaf keeni atwa vwɛ ubwa Alivai maa a na zungangana AGWANGWAMA azunga a'walụ.

⁸Ɛɛ hiɛŋ, Oo 'walụ ma AGWANGWAMA, suyana ma izeci ibwɛ, anangana ma edenji ugondu na baa njɛ!

⁹Zungangana bu ma, zungangana bu ma azunga ashɛtwa, duma ma ugondu wa arụhwajɛ na baa ndanjɛ.

¹⁰Ge izeci ɛtɛ ibwɛ i tijilo 'yaga ụjɛrụma; ga atwa kpaaŋ a na a zhɛba bụ na bwada unyasa.

¹¹Zhagana ma AGWANGWAMA iwɛ maa mo hi mbiyono maa hi na zhɛba bụ tutu.

¹²Oo ahiɛba ajalalo Isrɛl, na hiɛ shɛ miaụŋ mu bwa mu ugondu, Oo ahiɛba miaụŋ-me-eyi mi Isrɛl, a na bee teri,

¹³Teyinje ma iyi tudama nɛ Agwatana ndanjɛ, na arụhwajɛ ubwa keeni ashɛrɛya na baa jɛmɛ.

¹⁴Ubwa shɛ AGWANGWAMA na shɛ Agwatana tu, ashɛrɛya ubwa a shɛ iwɛ unyizo kpaaŋ.

¹⁵Be teyinje unu ubwa tụpana unyizo-nom, tu n-ndumwa mu na bee peni awaŋnɛ igbɛɛ igbɛɛ,

¹⁶tu unu ata baa twa la na Abraham, tatuwa ta ata bee teji la Azik.

¹⁷Bi shikicingeni iŋ Jekob maa i shɛ okpogo tugom, yaa shanɛ du Isrɛl ata i shɛ ge jekob unu-tutwa unyizo-nom.

¹⁸Bɛɛ hiɛŋ, Gabụ Ngɛɛ zhɛ ma pana cɛnjɛ ti Kenan, maa tɛ shɛ urobwo wo ogwu bu.

¹⁹Aka na aa twa sụ la ufwugwo, aa namɛ kaa cwɛŋ bana aa shɛ kaa alashɛ na cɛnjɛ ta ata;

²⁰Aa shɛ kaa erinji na a'una a'una, Ee beni na cɛnjɛ ti ye o tono na ti nya.

²¹Ama bi leneni shi bụtụ be elele maa a njɛ aŋ tuhwulo. Bee tezhigeni shɛgwuma iwɛ aba.

²²Bɛɛ hiɛŋ aŋ, To tumongono ma atwa mi a na Ngee teri o; ta nda ma kaa du egesere mi iyi iwɛ o.

²³Ga cɛnjɛ tu unyizo hwɛɛ tu zungangaanɛ AGWANGWAMA azunga, na ananga ma anabarɛ ubino ubwa iyi-heri

²⁴Anangana ma edenji kpaaŋ ụjɛrụma ubwa tu ugondu ubwa ukpahiɛŋ no ofwo atwa kpaaŋ!

²⁵AGWANGWAMA gembi, bɛ shɛ kaa aa shɛtana te gembi du. Ubwa shɛ aa mụna ụjɛrụma uhwuri azhɛba elele.

²⁶Tuwa ta anya denji tɛ shɛ ntatanuwaŋ kwakwa, ama AGWANGWAMA, ubwa karɛ azuba.

²⁷Ubwa ụjɛrụma keeni igɛhi shɛ inɛ ibwɛ, ukpahiŋ keeni unyasa shini ofwo na baa namɛ.

²⁸Ahiɛba atwa unyizo kpaaŋ, dumanga ma AGWANGWAMA, pana bụ ma ụjɛrụma ubwa iwɛ ikɛnyi ibwɛ.

²⁹Pana ma AGWANGWAMA ụjɛrụma na teni cɛŋ ni izeci ibwɛ, sugeni bu ma iyi ụrụpɛ maa hiɛ zhajɛ na agba ubwa. Zhɛba ma AGWANGWAMA iwɛ ụzhɛ tijilo tu bwa.

³⁰Ahiɛba atwa cɛnjɛ tu unyizo kpaaŋ, na zhɛgɛdaga ma nu umbe ubwa! E shikicinji unyizo dimi, u eri shi wa nda bulama o.

³¹Ga tụla tu na bwada unyasa, ga amɛ lemi cɛnjɛ tu unyizo. Ga a na duma na ashashɛ edenji maa AGWANGWAMA, ubwa shɛ agwuma.

³²Ge itekwu keeni iyi elele nɛ namɛ na amɛ ibɛ no ngwulono, ge shihilo keeni iyi elele nɛ namɛ na shɛba na bwada unyasa!

³³Nazhɛ i'wɛ'wɛ nɛ zweni nu uwapa zhɛ ya zunga azunga, AGWANGWAMA yɛɛ zhɛ ya zungangana azunga unyasa, iwɛnɛ ti bɛɛ zhɛ ba zhajɛ hwuŋ maa duma ụshɛrɛya unyizo.

³⁴'Walụ ma AGWANGWAMA, iwɛnɛ po ubwa zhɛmɛ; tulubo tu bwa kaa tɛ shɛ unyizo-nom.

³⁵Hiɛŋ bu ma, Oo Agwatana, gabụ bibicinji tu, iti bicinji, iti jwɛ ne edenji, maa utu sotulonu urubwo uko, iwɛ maa ta bụ 'walụ duwa, maa ta shɛtana du izeci ɛtɛ bu i tijilo.

³⁶Shɛtana ma AGWANGWAMA na shɛ Agwatana Isrɛl! Tutu unyizo zhe gwure! Nazhɛ atwa ata kpaaŋ hiɛŋ, Ami, aa shɛtanɛ AGWANGWAMA.

³⁷Agwuma Devid njɛ Asaf keeni atwa vwɛ ubwa Alivai maa ga shɛ aba a untangana tɛzhɛba te elele tu na ta nda no ofwo ata ee shi Ikpɛtɛ ɛtɛ Unu-tutwa ya AGWANGWAMA. Apata aa shɛ a na nda ugondu wa aba iyi-heri.

³⁸Go Obɛd-idụm yɛu Jɛdutun, ne etwenyi umwamwa ubwa dupu-ne-eshe-umpwa-na-atwa-atụndatụ (68) aba zhɛ no mbiyono aŋ, na aka na tu go Hosa, no Obɛd-idụm zhɛ na ngbaraka shidubo.

³⁹Ge Devid genji Zadok na shɛ bunongbo, na anya ubwa onongbo, nu umbe udulo ata wa AGWANGWAMA, ne bikpekwu ata namɛ ni Gibion,

⁴⁰maa a na pana AGWANGWAMA ụrụpɛ tuhwoŋzhingo uvwungwa we elele keeni ụrụmɛ we elele nu utukwu ata ụrụpɛ tuhwoŋzhingo gana na ti ye 'nyeci la nu undwa na AGWANGWAMA peni atwa Isrɛl.

⁴¹Atwa na namɛ na aba apata, a shɛ ge Heman, nɛ Jɛdutun, keeni atwa vwɛ a na ee teri cinji iwɛ azunga ashɛtwa tuzungangana AGWANGWAMA, iwɛ tulubo tu bwa tu unyizo-nom.

⁴²Ge Heman keeni Jɛdutun, aba du untanganɛ akakacɛ tuhwulo na apalụ ti'nyama keeni i'nyemi 'nyemi nɛ vwɛ, nɛ aa 'nyama aka na ta a zunga shɛzunga shi tijilo. Miaụŋ-me-eyi mi Jɛdutun, aba ee tileni a ngbaraka shidubo.

⁴³Nazhɛ atwa ata garatagwụ kpaaŋ aba, bụtụ be elele ji ni ihwɛ ibwɛ, agwuma Devid du ji bee peni atwa umwamwa ubwa uwebiye.