Read bassa SHƐRỤKWỤKWỤ SHI HIIŊ 18 Bible Online

SHƐRỤKWỤKWỤ SHI HIIŊ 18 - bassa bible

SHƐRỤKWỤKWỤ SHI HIIŊ 18

¹Ti yaa namɛ fwalaa agwuma Devid sukakanɛ Afilistia sasana nu ujasa, baa lasụ aŋ. Bee leshiji ụshɛpwụ ata ụ'wụtụ, ɛɛ hiɛŋ, Gat keeni ashɛpwụ na gwụmwatangwụ a na rungwutwonu uŋ.

²Bu lasụ du atwa Moab, baa 'imɛ aŋ, aa tụpa bụ ụdalụ wa aba.

³Ge Devid sukakanɛ sasana agwuma Zoba ga Hadadizɛ na namɛ no tugwungwu tu Hamat. Iwɛnɛ po ga Hadadizɛ ba makakana maa lashaga tuzuba tu Yufretis.

⁴Ge Devid leshiji ihɛŋtu ibwɛ ujasa akpakwụ-a-ta (1,000), baa 'imɛ asụcɛ idɛkwɛ igbɛɛ-itɛtu-na-akpakwụ-a-ta (7,000), keeni ejeshi na a zha tahaŋnụ ni ivwunɛ igbɛɛ-umpwa (20,000). Baa shishajɛ idɛkwɛ ɛtɛ hwɛɛ tikpereci, bee weŋpeni dipi-yebi gbalụ iwɛ ihɛŋtu ujasa.

⁵Aka na ta Asiria na namɛ nu Damaskos tumwanɛ ejeshi aba maa e mbiyeni Hadadizɛ agwuma Zoba, ge Devid kwụnɛ Asiria ata igbɛɛ-umpwa-nu-boo-ko (22,000).

⁶Bee sutengeni ejeshi ubwa na cɛnjɛ ta aba tu Damaskos, na shɛ uhiu cɛnjɛ ta Asiria, aa shɛ ya atwa na namɛ nu ukaka ubwa, baa lashɛga aŋ ya ụdalụ. AGWANGWAMA njɛ maa ge Devid na lasatagwụ no ofwo elele na bee zhe.

⁷Ge Devid lesheji shabula shu ujasa sha azhɛnarɛya shɛ na ehiu ujasa Hadadɛzɛ ga 'waŋnɛ, bee suji shu nu Jɛrusalɛm.

⁸Bee suji du ɛtumburɛ a'wụtụ, a na ga Hadadɛzɛ ga untanganɛ la na ashɛpwụ ubwa a'wụtụ, a na ɛɛ hiɛŋ, Tibhat keeni Kun. (Ɛtumburɛ ata aba go Sụlụmụn suji baa njɛ okwokwo, na atukpa keeni i'wɛŋnɛ uhwugwa swoswoswo.)

⁹Aka na go Tou agwuma Hamat, hwụjɛ maa agwuma Devid lasụ ejeshi Hadadɛzɛ agwuma Zoba hwɛɛ,

¹⁰baa tumwananɛ bụ a'walụ keeni ugwoje, ta apwaŋ azhɛnarɛya, na azụrụfa keeni ɛtumburɛ, tedure ni yɛu ibwɛ ga Hadoram, iwɛnɛ ti ga Hadadɛzɛ ba shana baa sukakana Tou du nu ujasa na aka ofwugwo.

¹¹Agwuma Devid suji upwaŋ ata bee tileneni aŋ AGWANGWAMA swooŋ, maa a na nda uhwara na aba, ta azhɛnarɛya, ta azụrụfa ata bee leshiji ne edenji Idụm, na A'amon, na Amoab, na Afilistia keeni Amɛlɛk a na baa lasatagwụ.

¹²Ga Abishai na ɛɛ hiɛŋ bino bwa gɛ Zɛruwia, lasụ atwa Idụm nu ulomu manɛ, baa kwụnɛ atwa igbɛɛ-icinjishi apata (18,000).

¹³Bee sutengeni edingbe ejeshi na cɛnjɛ ti Idụm hwɛɛ, ibɛ po atwa ata Idụm shɛ ya atwa na namɛ nu ukaka wa agwuma Devid. AGWANGWAMA njɛ kaa maa ge Devid lasatagwụ atwa no ofwo elele na bee teni.

¹⁴Ge Devid yɛ tugwama ti Isrɛl hwɛɛ, baa nda atwa ubwa te teni cɛŋ tebiye. Baa dumangana aŋ kaa ụshɛrɛya u tishiriri.

¹⁵Go Joab, ubwa shɛ uberezhe we ejeshi ubwa hwɛɛ, ge Jehoshafat yɛu Ahilud, ubwa tuba ba swaka ti'nyeci ti iyi elele nɛ ya ndangana.

¹⁶Ga Zadok yɛu Ahitub keeni Ahimɛlɛk[33] yɛu Abiata, aba shɛ onongbo. Ga Shavisha, ubwa shɛ bi'nyeci bu umwono-ụshɛrɛya;

¹⁷gɛ Bɛnaya yɛu Jehoiyada, ubwa untanganɛ miaụŋ-me-eyi ma agwuma Devid; muba tuba mu untanganɛ shihwolu shɛ 'wụtu nu ugondu wa agwuma.