Read bassa SHƐRỤKWỤKWỤ SHI HIIŊ 20 Bible Online

SHƐRỤKWỤKWỤ SHI HIIŊ 20 - bassa bible

SHƐRỤKWỤKWỤ SHI HIIŊ 20

¹Na aka bu ugbama, ibɛ shɛgwuma sha zha ujasa nu uywa. Go Joab suji ejeshi ubwa, bee zhe baa sukakanɛ A'amon, boo to tuhwulo bee hweri Raba, baa subwanya aŋ baa kwụnɛ aŋ. Agwuma Devid tuba zhe shi, ama bɛ jɛjɛ nu Jɛrusalɛm.

²Ge Devid peshinji udara nu uhiuhiu wa agwuma aba,[34] bee peteni uŋ nu uhiuhiu ubwa. Uzhinono udara ata ụ shɛ utɛlɛnt uzhɛnarɛya uko. A njɛ uŋ tisemberi na atayɛ ogwumishi. Bee suje du sasana ufwa ujasa te gembi duwa nụ ụshɛpwụ ata.

³Bee suji atwa ụshɛpwụ ata, bee eni atwa oko i'wɛ'wɛ tɛshaba, atwa oko shɛ itimɛ tuhwaŋ, atwa oko shɛ idwɛgɛ no shigwubo. Gabata du bee eni A'amon. Nazhɛ bee gwuri nu Jɛrusalɛm na atwa ubwa.

⁴Na aba inɛ gɛ, ujasa layanɛ aŋ sasana na Afilistia ni Gɛzɛ. Aka atata ge Sibekai na banɛ Hushat kwụnɛ ụgbandụ ata ɛɛ hiɛŋ, ge Sipai, ibɛ po aa lasụ Afilistia.

⁵Ujasa unya layanɛ aŋ na Afilistia, nu bwa gɛ Ɛlihanan yɛu Jai kwụnɛ Lami, yɛu-bino Goliat na banɛ nu Gat, utata isɛnu ibwɛ u ci ụ'wụ'wụ na aa na tugwuno unyomo.

⁶E jeshi ujasa unya sasana nu Gat, apata ụgbandụ uko na gembi namɛ. Ivwɛ ibwɛ i'ɛlɛ keeni inɛ ivwunɛ namanjɛ icihiŋ cihiŋ, yaa namɛ ya woshi-ni-bɛneshi hwɛɛ ibɛ. Bɛ shɛ ụlamụ wa agbandụ ala cala.

⁷Aka na tu baa twajɛ atwa Isrɛl, ibɛ po go Jonatan yɛu Shimea yɛu-bino Devid kwụnɛ bụ.

⁸Atwa ga ge Devid ne etwenyi ubwa kwụnɛ, a shɛ miaụŋ ma agbandụ nu Gat.