Read bassa SHƐRỤKWỤKWỤ SHI HIIŊ 21 Bible Online

SHƐRỤKWỤKWỤ SHI HIIŊ 21 - bassa bible

SHƐRỤKWỤKWỤ SHI HIIŊ 21

¹Ge Setan sukakanɛ atwa Isrɛl na tɛnda tu na baa njɛ maa ga ge Devid rɛcɛ aŋ.

²Na aka ga, ge Devid hiɛŋ Joab keeni eberezhe ejeshi, Zhaga rɛta ma atwa cɛnjɛ ti Isrɛl hwɛɛ, te kwuni ni Biɛ-shiba tutu Dan, maa hi n gwuricingeni ajɛshɛgwa maa ma mapa ufwugwo wa aba.

³Ama go Joab jishijɛ, bɛɛ hiɛŋ, Ga AGWANGWAMA keeni atwa Isrɛl ufwugwo kpalụ kpakwụ kpakwụ uhwuri gana na ta a namɛ hwuwayɛ. Zaaci Tumaka! Iyɛri mi, shɛ miaụŋ mụ bụ mu ugondu suu aa shɛ hwɛɛ aba? Iwɛ mbe po tuba iyɛri mi ya jala maa nda ijɛɛ? Iwe mbe po aba jala maa peteni atwa Isrɛl n-ndumwa-tụwụmaa?

⁴Ama n-ndumwa ma agwuma mu lasụ mu na Joab, ibɛ po go Joab sanɛ, bee tenenji ofwo elele nu u'una ata Isrɛl, uuwa be gwure nu Jɛrusalɛm.

⁵Go Joab mbishi agwuma Devid ufwugwo wa atwa na shɛ ejeshi na namba. Bɛɛ hiɛŋ bụ, Atwa na shɛ etwenyi a na olwo a 'waŋna utokwobi nu ujasa ni Isrɛl hwɛɛ aba a shɛ ejeshi igbɛɛ-akpakwụ-a-ta-ni-igbɛɛ-dupu (1,100,000), a na Juda ejeshi a shɛ igbɛɛ-akpakwụ-eyebi-nu-talacɛ-ni-bɛ-tɛ (470,000).

⁶Iwɛnɛ tu go Joab leni shi n-ndumwa ma ata agwuma jɛmɛ, ibɛ po bee zhe shi maa ricɛ udenji Livai nu una Bɛnjamin.

⁷Amɛ Agwatana hashɛganụ ni iyi nɛ aa njɛ, iwɛbɛ po bee peni atwa Isrɛl ulwapɛ.

⁸Ge Devid hiɛŋ Agwatana, N njɛ iwɛwɛ i'wɛtwɛ 'wɛtwɛ ni iyi nɛ Ngaa njɛ! N njɛ iyi ụlagwụ ụ'wụtụ, Ma bụ tabwa maa suji tụwụma ti yɛu gɛ bu ugondu.

⁹Nazhɛ AGWANGWAMA hiɛŋ bigesere Devid ga Gad,

¹⁰Zhaga mbiso Devid maa, AGWANGWAMA hiɛŋ, N zhɛ ma bụ pana iyi itɛtu, maa teri inɛɛ nɛ Ngɛɛ zhɛ ma bụ ndana.

¹¹Ga Gad zhe ga no ofwo Devid, bee mbishi bu, bɛɛ hiɛŋ, Iyi nɛ AGWANGWAMA hiɛŋ na, Tala inɛɛ nɛ aba jala.

¹²Imunɛ-tiya shiywa shɛ tatụ suu, kwo kaa maa atwa i'ime hiŋ a hi lasụ maa a na hiɛ kwụna, to tu'urugono maa o no hi urogono ipiɛnɛ itɛtu, kwo kaa maa AGWANGWAMA leni maa utokwobi ubwa na shɛ ụngwụ tishikpe mburusonu na cɛnjɛ ti hiŋ, maa tumwanɛ butumwa bwa ba azuba maa mburusonu tu'wo ni Isrɛl hwɛɛ. Inɛ nɛɛ ebi teri na amɛ ibɛɛ? Maa Ma zha me mbishe bụtụ na n tumwanɛɛ?

¹³Ge Devid jishijɛ Gad, bɛɛ hiɛŋ, N namɛ ne tiriri tụ wụtụ! N jeri shi maa ga shɛ atwa n teni u'ala o. Ama ga shɛ AGWANGWAMA ni ikɛnyi ibwɛ n teni u'ala, iwɛnɛ po inyɛmɛnyɛmɛ ibwɛ gembi duwa.

¹⁴Ibɛ po AGWANGWAMA tumwanɛ ga ụngwụ ata tishikpe woo mburusonu na ashashɛ atwa Isrɛl hwɛɛ, ibɛ po atwa igbɛɛ-talacɛ-na-akpakwụ-a-ta 'wi (70,000).

¹⁵Nazhɛ AGWANGWAMA tumwanɛ butmwa bwa ba azuba maa iricingo Jɛrusalɛm, gana na ta butumwa ata bo iricingo uŋ ga, ta AGWANGWAMA kwụbɛ iŋ. Bee sheyinji tuhaŋsa tu bwa iwɛ iyi iwɛ ɛtɛ bɛɛ gɛ zhɛ ba nda. Nazhɛ bɛɛ hiɛŋ, butumwa ata ba azuba, I gwumwa, ganga ya. Ibɛ po butumwa ata shikeni na akpakpata Arauna[35] ata shɛ Bi Jɛbus.

¹⁶Ge Devid shepi eshe, baa kwụbɛ butumwa ata ba AGWANGWAMA ti bee shikeni araranga, bee hwucice utokwobi ubwa, bee sekeni uŋ geri bu Jɛrusalɛm. Nazhɛ ge Devid nu n-nyarɛ ma atwa ata uregeni tugwuno tụ ụcɛnjɛ tɛnda,[36] ee kwuzenji, ee ubi apɛshɛka aba na cɛnjɛ.

¹⁷Ge Devid hiɛŋ, Agwatana, Gamba kaa n njɛ iwɛwɛ ɛtɛ i'wɛtwɛ. Gamba kaa n eni aŋ maa a njɛ tɛrɛcɛ. Imbe tuba atwa ga shɛ gana agwụdụ njɛ yaa? Oo AGWANGWAMA na shɛ Agwatana mi, Ma bụ tabwa maa ga shɛ Gamba ni ihwɛ bishi mi kiri abụ sukakanɛ, ama ganga atwa ga bụ tishikpe tupatana.

¹⁸Nazhɛ butumwa ata ba AGWANGWAMA ba azuba hiɛŋ Gad maa ga zha maa mbiso Devid, maa ga zha na akpakpata bụtụ ata ɛɛ hiɛŋ, ga Arauna maa mana AGWANGWAMA utukwu-ụrụpɛ apata.

¹⁹Ge Devid hwụjɛ-unu n-ndumwa ma ata AGWANGWAMA tumwanɛ Gad, bee zhe ga.

²⁰Ga Arauna na miaụŋ mu bwa me eyi mi neshi namɛ na akpakpata aba oo dubo iyimɛyɛ wit. Aka na ga Arauna kwụbɛ butumwa ata, ibɛ po miaụŋ ma ata mu bwa mi neshi mi gezheji maa swakacɛ.

²¹Gunu na tu ga Arauna kwụbɛ agwuma Devid ti bee ci, bɛɛ gɛnjɛ akpakpata ata, baa zhajɛ bee kwuzeni bu, harɛ boo to itune ibwɛ na cɛnjɛ.

²²Ge Devid hiɛŋ bụ, N sengeni kaa akpakpata ga bụ nu ulumo wa aba na ulwa maa Ma mana AGWANGWAMA utukwu-ụrụpɛ, iwɛ maa ụngwụ ga u tishikpe u mburusonu na atwa u hwuwowu.

²³Ga Arauna hiɛŋ bụ, Zaacɛ Tumaka, shapa! M bi peni aŋ, nda iyi elele nɛ ụbụ kwụlanɛ. M bi peni du inɛ gɛ ye eyi iwɛ ụrụpɛ tuhwoŋzhingo nu utukwu-ụrụpɛ. Sugo ti imbele gɛ maa i shɛ i'wɛ'wɛ ulwa ụrụpɛ tuhwoŋzhingo, maa du suji iyimɛyɛ gɛ maa i shɛ iwɛ ụrụpɛ tiya na ɛbi zhɛ ba ta. M bi peni iŋ kpaaŋ.

²⁴Ama agwuma jishijɛ Arauna, bɛɛ hiɛŋ, Awo, N zhɛ ma bụ tụpa ụtashɛ wa aba ta ulwa. N zha shɛ ma shapa iyi nɛ i shɛ inɛɛ bụ maa Ma pana AGWANGWAMA ụrụpɛ ni iyi ya arahaŋ o.

²⁵Ibɛ po ge Devid cɛpɛ ga Arauna ukwuribi wa azhɛnarɛya arinya akpakwụ-atatụ 600 iwɛ akpakpata ata.

²⁶Nazhɛ ge Devid meni AGWANGWAMA utukwu-ụrụpɛ apata, bee peni bu ụrụpɛ tuhwoŋzhingo keeni ụrụpɛ wa amɛ-olom. Baa suyanɛ AGWANGWAMA, bɛɛ jishijɛ bụ tedure nu ulwa na banɛ na azuba wee hwoŋzhinji iyi ɛtɛ ụrụpɛ tuhwoŋzhingo nu utukwu ata ụrụpɛ.

²⁷Nazhɛ AGWANGWAMA hiɛŋ butumwa ata ba azuba maa go gwuricingo utokwobi ubwa nu ufwutwa ubwa.

²⁸Ti ge Devid kwụbɛ na aka ata maa AGWANGWAMA jishijɛ adua ubwa, boo to arụpɛ nu utukwu ata namɛ na akpakpata ata Arauna Bijɛbus ata.

²⁹Iwɛnɛ po udulo na go Moses teni la AGWANGWAMA nụ ụshika keeni utukwu-ụrụpɛ ata namɛ la ne bikpekwu ata bi Gibion, u ta namba apata na aka ata.

³⁰Ama ge Devid zhe shi apata maa lụpa Agwatana iyi o, iwɛnɛ tu baa nda inyɛsɛ utokwobi ata butumwa ata ba AGWANGWAMA ba azuba 'waŋnɛ.