Read bassa SHƐRỤKWỤKWỤ SHI HIIŊ 23 Bible Online

SHƐRỤKWỤKWỤ SHI HIIŊ 23 - bassa bible

SHƐRỤKWỤKWỤ SHI HIIŊ 23

¹Aka na ti ge Devid injɛ tebiye, nazhɛ bee peni yɛu ibwɛ go Sụlụmụn tugwama ti Isrɛl, maa ya tụ.

²Ge Devid sotulonu ehwurembe Isrɛl, to onongbo keeni Alivai hwɛɛ urubwo uko.

³Baa rɛcɛ Alivai a na shiywa sha aba shi kwune nu talacɛ munji, ibɛ ufwugwo wa aba ụ shɛ igbɛɛ-umpwa-ni-bɛ-cinjishi (38,000).

⁴Ge Devid hiɛŋ, Ga Alivai a shɛ igbɛɛ-umpwa-ni-bɛ-yebi (24,000), aba zhɛ no hikokono ugondu Umwono ata wa Agwatana. Atwa igbɛɛ-itɛtu (6,000), aba tuba zhɛ a sha e 'nyeci nu umwono ụshɛrɛya keeni ajɛmɛ-ụshɛrɛya.

⁵Ga atwa igbɛɛ-iyebi (4,000), a na nda u'iywa shidubo, ga atwa igbɛɛ-iyebi sasana a na shɛtana AGWANGWAMA ni i'wɛŋnɛ ɛtɛ i'nyemi Ngee peni iwɛ ashɛtwa ata kiri.

⁶Ge Devid dwotwogonu Alivai orubwo atatụ gana na ta amwamwa aba namɛ: umwamwa Gɛshom, nu una Kohat keeni una Merari.

⁷Miaụŋ-me-eyi mu Gɛshom na: ga Ladan keeni Shimei:

⁸Ga Ladan meci miaụŋ-me-eyi mu tatụ: gɛ Jɛhiɛl, ne zetam keeni Joɛl,

⁹Ge Shimei meci miaụŋ-me-eyi mu tatụ: ge Shelomit, na Hazhiɛl keeni Haran. Aba shɛ shɛgwuma shu nhwaŋ me eshi aba, te kwune na Ladan.

¹⁰Ge shimei meci miaụŋ-me-eyi mi neshi: ga Jahat, ne Ziza, ne Jeush keeni Bɛria.

¹¹Na tụ'wụtụ ta aba, ga Jahat, ubwa hwure umbe, ge Ziza 'wa. Iwɛnɛ ti ge Jeush ne Bɛria zasa miaụŋ-me-eyi mi gembi ofwugwo, ibɛ po aa rɛcɛ aŋ maa a shɛ ukpogwu ata uko.

¹²Go Kohat meci miaụŋ-me-eyi mi neshi: ga Amram, ne Izha, ne Hibron keeni Uziɛl.

¹³Yɛu ibwɛ ihiiŋ ga Amram, ubwa meci ata Aron keeni Moses. (Ibɛ ee shiri Aron keeni umwamwa ubwa swooŋ unyizo-nom, maa a untangana i'wɛŋnɛ nɛ shɛ inɛ tijilo me tijilo, maa o no hwoŋzhingo iyi ụhiụŋ na aka na aa pana AGWANGWAMA ụrụpɛ, maa a na ndana bụ ugondu maa a na pana du atwa uwebiye ni izeci ya AGWANGWAMA.

¹⁴Ama o togwu miaụŋ-me-eyi mu Moses bụtụ ata ba Agwatana nụ ụlamụ wa Alivai)

¹⁵Go Moses meci miaụŋ-me-eyi mi yebi: gɛ Gɛshom nɛ Ɛliɛzɛ.

¹⁶Buhwuri-bu-umbe bu miaụŋ-me-eyi mu Gɛshom i shɛ gɛ Shɛbuɛl.

¹⁷Gɛ Ɛliɛzɛ meci yɛu-ye-eyi ike gba, ibɛ shɛ ge Rehabia, ge Rehabia tuba meci ya miaụŋ-me-eyi mu ufwugwo.

¹⁸Ge Izha meci yɛu-ye-eyi ike nɛ ɛɛ hiɛŋ, gɛ Shɛlomit, ubwa shɛ uhiu umwamwa ata.

¹⁹Ge Hibron meci miaụŋ-me-eyi mi neshi: ge Jeria, na Amaria, ne Jehaziɛl keeni Jekameam.

²⁰Go Uziɛl meci miaụŋ-me-eyi mi yebi: ge Mika keeni Ishia.

²¹Ge Merari meci miaụŋ-me-eyi mi yebi: ga Mali keeni Mush. Ga Mali meci du miaụŋ-me-eyi mi yebi: gɛ Ɛleaza keeni Kish,

²²Gɛ Ɛleaza 'wi, bu meci shi yɛu-ye-eyi ye elele o. Semi miaụŋ-mo-o. Ibɛ po miaụŋ mu bwa mo o mɛ cɛnɛ nkwoyi ma aba, a na shɛ miaụŋ-me-eyi me bishi ba aba bi tidice ge Kish.

²³Miaụŋ-me-eyi mu Mushi na: ga Mali, ne Ede keeni Jɛrimot.

²⁴Ajalalo Livai na, nu gana na ta amwamwa aba namɛ. E 'nyeci izeci bụtụ be elele na tuwo shiywa woshi kwo kaa uhwuri ya te e meci bu, nụ ụlamụ wa aba hwɛɛ. Hwɛɛ aba kaa 'yajɛ upada na aa untanganɛ ugondu tɛnda nu umwono ata wa AGWANGWAMA.

²⁵Ge Devid hiɛŋ, AGWANGWAMA na shɛ Agwatana Isrɛl peni atwa ubwa amɛ-olom, ibɛ du kaa po bɛɛ zhɛ ba nama nu Jɛrusalɛm unyizo-nom.

²⁶Utakashɛ we elele zasaba ya maa Alivai na 'waŋna udulo ata tugwuno, AGWANGWAMA a nama, maa o no sugo i'wɛŋni'wɛŋni ye elele nɛ aa ta ụrụpɛ na amɛ ubwa o.

²⁷Gana na ti ge Devid peni aŋ unu umɛwɛɛ, ibɛ po aa rɛcɛ Bulivai be elele na tuwo shiywa woshi kwo kaa uhwuri te e meci bu, maa kwuno ugondu tɛnda.

²⁸Ugondu na ee eni aŋ na: maa o no mbiyono onongbo a na shɛ miaụŋ mu Aron ugondu nu Umwono ata wa AGWANGWAMA, maa o no shiyono okpogwu ata eshe, ta shɛmɛ shu bwa, iwɛ maa kede e leni maa iyi tijilo ye elele hashɛganụ o; keeni ugondu we elele na namɛ nu umwono ata wa Agwatana,

²⁹maa a untangana ugondu ibrɛd ɛtɛ aa patana nu uteburu, to mihiuŋ ma ata aa ta ụrụpɛ tiya, ta agbagbada ata aa njɛ uzawa Ifucingɛ, ti iyi nɛ oo to nu ujebi keeni inɛɛ nɛ aa shananjɛ manɛbɛ, maa a na manga du uzhinono keeni ugombo iyi nɛ aa 'waŋnɛ nu umwono wa Agwatana maa o to ụrụpɛ ni ibɛ;

³⁰maa o no shikono a na shɛtana AGWANGWAMA, maa a na 'walụ bụ uvwungwa uvwungwa keeni ụrụmɛ ụrụmɛ.

³¹Aka elele na ɛɛ zhɛ a ta ụrụpɛ nụ Ụjita-ụhinjanụ, ta aka upiana ufwo keeni aka bi isene ye elele, a 'yajɛ ufwugwo wa Alivai na aa tala maa a njɛ ugondu na aka ata. Alivai, aba ee eni ugondu ụrụpɛ tuta pa AGWANGWAMA aka elele.

³²Aba 'yajɛ i'wɛŋnɛ udulo ata u tu'ulwatagwụ tungbaraka keeni ohwolu ata tijilo, maa o no mbiyono du miaụm-mo-bino ma aba a na shɛ umwamwa Aron ugondu ụrụpɛ tuta nu umwono ata wa AGWANGWAMA.