Read bassa SHƐRỤKWỤKWỤ SHI HIIŊ 26 Bible Online

SHƐRỤKWỤKWỤ SHI HIIŊ 26 - bassa bible

SHƐRỤKWỤKWỤ SHI HIIŊ 26

¹Tudwotwogonu ta angbaracɛ shidubo na: Ge Meshelemia, yɛu-ye-eyi kore, banɛ nu umwamwa Asaf na shɛ udenji umwamwa kora.

²Ge Meshelemia meci miaụŋ-me-eyi mi cenje, gana aa mama 'wanụ na tumata na: gɛ Zɛkaria, gɛ Jɛdiayɛl, nɛ Zɛbadia, na Jatiniɛl,

³nɛ Ɛlam, ne Jehohanan keeni Elihoinai.

⁴Go Obɛd-idụm na Agwatana peni uwebiye bee meci miaụŋ-me-eyi mu tụndatụ. Nzeci ma aba gana na to o momo hwulosu tụ'wụtụ te e meci aŋ na: gɛ Shɛmaya, ne Jehozabad, no Joa, na Saka, nɛ Nɛtanɛl,

⁵na Amiɛl na Isaka keeni Peuletia.

⁶Yɛu Obɛd-idụm ihiiŋ, gɛ Shɛmaya meci miaụŋ-me-eyi mi cihiŋ. Hwɛɛ aba a shɛ ehwurembe nu umwamwa bishi ba aba, iwɛnɛ ta a shɛ etwenyi na eri iyi tɛnda tebiye.

⁷Miaụŋ ma ata mi Shɛmaya na: go Otni, nɛ Pɛfɛl, no Obɛd, nɛ Ɛlizabad, ne Elihu, keeni Semakia. Miaụŋ mu ga mu umɛwɛɛ mi yebi mi eri du iyi tɛnda tebiye.

⁸Umwamwa Obɛd-idụm 'yajɛ etwenyi dupu-ne-eshe-umpwa, (60) hwɛɛ aba, ta miaụŋ ma aba me eyi, ta miaụŋ-mo-bino ma aba, a shɛ atwa na eri a nda iyi. Bụtụ bụtụ na amɛ aba kaa teni cɛŋ nu ugondu ga tɛnda.

⁹Umwamwa Meshelemia 'yajɛ miaụŋ-me-eyi, na miaụŋ-mo-bino ma aba, hwɛɛ aba kaa a shɛ etwenyi umpwa-na-ba-atụndatụ a na teni cɛŋ nu ugondu ga tɛnda.

¹⁰Nu umwamwa Merari, go Hosa namɛ; bi meci miaụŋ-me-eyi mi neshi: ge Shimri (na bishi bwa njɛ bu uhiu wa atwa vwɛ okwo tu baa shɛ shɛ yɛu nɛ bee meci hiiŋ.)

¹¹Ne Hilkia, ne Tebalia keeni Zɛkaria. Atwa umwamwa Hosa a na shɛ angbaracɛ umwono wa Agwatana shɛ atwa umpwa-na-ba-eyebi.

¹²O dwotwogonu angbaracɛ shidubo shu umwono wa Agwatana orubwo orubwo, gana na ta amwamwa aba namanjɛ. E eni aŋ du ugondu nu Umwono ata wa AGWANGWAMA gana na te e eni du miaụŋ-mo-bino ma aba.

¹³A 'wɛŋ icɛcɛ iwɛ umwamwa we elele maa e mepi odubo na ɛɛ zhɛ na ngbaraka, okwo umwamwa ata gembi ufwugwo kwo kaa waa twa sụ.

¹⁴Ge Shelemia yɛ icɛcɛ nɛ aa 'wɛŋ iwɛ odubo uwaŋna-banụ, yɛu ibwɛ ye eyi gɛ Zɛkaria na incɛ tebiye yɛ icɛcɛ nɛ aa 'wɛŋ iwɛ odubo tuzuba.

¹⁵Go Obɛd-idụm yɛ icɛcɛ nɛ aa 'wɛŋ iwɛ odubo tuta, miaụŋ mu bwa me eyi mɛ yɛ icɛcɛ nɛ aa 'wɛŋ iwɛ shimwono shi i'wɛŋnɛ tuzwono.

¹⁶Ata Shupim no Hosa aba yɛ icɛcɛ iwɛ odubo uwaŋna-twonuo keeni a na Shalekɛti na namɛ nu uhwaŋna ata munji tuzuba. O dwotwogonu aka na maa a na nda u'iywa wa aba, na tu palaga.

¹⁷A'iywa ecihiŋ aba a nda ugondu nu uwaŋna-banụ iyi-heri, A'iywa[40] aba eneshi namɛ tuzuba. A'iywa aba eneshi namɛ no shimwono shi i'wɛŋnɛ iyi-heri, atwa eyebi aba a ngbaraka umwono uko.

¹⁸A'iywa eneshi aba o shikono nu uhwaŋna ata dongonu ukpogwu ata namɛ nu uwaŋna-banụ. Eyebi a nama nu ukpogwu ata gom.

¹⁹Ugondu u'iywa shidubo na ee eni umwamwa Kora keeni una Merari ta.

²⁰Atwa vwɛ aba a na shɛ Alivai,[41] aba untanganɛ umwono na oo zwono uduciya umwono wa Agwatana keeni shimwono shi i'wɛŋnɛ nɛ ee tileneni Agwatana swooŋ.

²¹Ga Ladan, ubwa shɛ ugwunukwoshi miaụŋ-me-eyi mu Ladan, na miaụŋ-me-eyi mu Gɛshom. Ubwa 'yajɛ te ehiu nhwaŋ me eshi a na shɛ atwa Gɛshom, tu umwamwa yɛu ibwɛ ye eyi ge Jehiɛli.

²²Miaụŋ-me-eyi mi Jehiɛli, ge Zetam no Joɛl buhongwu bwa. Aba a ngbaraka shimwono shi i'wɛŋnɛ na amɛ umwono ata wa AGWANGWAMA.

²³Atwa Amram, na atwa Izha, na atwa Hibron keeni atwa Uziɛl,

²⁴na atwa Shebuɛl yɛu Gɛshom, na shɛ umwamwa Moses, ubwa shɛ uhiu wa anjɛ-ugondu a na ngbaracɛ shimwono sha ata shu uduciya,

²⁵tedure ni yɛu-bino Gɛshom gɛ Ɛliɛzɛ ibɛ baa 'yajɛ ụmatụ nɛ Shɛlomit. Ge Rehabia i shɛ yɛu ibwɛ, ge Jeshia i shɛ yɛu ibwɛ, go Joram i shɛ yɛu ibwɛ, ge Zikri i shɛ yɛu ibwɛ, gɛ Shɛlomit i shɛ yɛu ibwɛ.

²⁶Gɛ Shɛlomit ga keeni atwa umwamwa ubwa aba shɛ angbaracɛ uduciya we elele keeni apwaŋ na agwuma Devid, ne ehiu nhwaŋ me eshi, ne ehiu anjɛ-ugondu igbɛɛ igbɛɛ keeni a na akpakwụ akpakwụ, keeni eberezhe ejeshi tileneni Agwatana swooŋ.

²⁷E suje emeseyi iyi nɛ ɛɛ yɛ nu ujasa ee tileni swooŋ maa a na nangangana Umwono wa AGWANGWAMA.

²⁸Gɛ Shɛlomit keeni atwa umwamwa ubwa, aba ngbaracɛ iyi elele nɛ ee tileneni Agwatana swooŋ. Medenji apwaŋ na bigesere ata ga Samuɛl, no Soul yɛu Kish, na Abnɛ yɛu Nɛ, keeni Joab yɛu Zɛruwia tileni swooŋ.

²⁹Ge Kenania, na shɛ umwamwa Izha, na miaụŋ mu bwa me eyi, aba ee eni ugondu no tupohondo tu umwono ata wa Agwatana: gana ti iyi nɛ ya ndangana ti'nyatanga, nụ ụshɛrɛya tụdụmangana atwa Isrɛl.

³⁰Ga Hashabia, na shɛ umwamwa Hibron keeni atwa ubwa akpakwụ-atụndatụ-ni-dipi-yebi (1,700), aba namɛ nu ugondu tɛndana atwa nu uhwaŋna iwɛ ya Agwatana keeni uhwaŋna iyi tɛzhɛmana atwa na tunama ta aba ni Isrɛl, geri bu uwaŋna-twonuo bu Urefu Jodan. Atwa ga kpaaŋ aba a shɛ atwa na eri iyi tɛnda tebiye nu ugondu wa AGWANGWAMA keeni ugondu wa agwuma.

³¹Ge Jeria, ubwa shɛ buhwuri-bu-umbe bu umwamwa Hibron. Na aka na ti ge Devid ulwa shiywa buhanda tu baa yɛ tugwama, nazhɛ aa njɛ tudweri tu umwamwa Hibron, oo to ejeshi na banɛ nu umwamwa ata na wa nda iyi tebiye ugbe. A namɛ ni Jɛzɛ na namɛ ni Giliad.

³²Agwuma Devid teri shɛgwuma shu nhwaŋ shɛ na sha nda iyi tebiye ugbaa-na-akpakwụ-atatụ-ni-dipi-yebi (2,500), na amɛ atwa Jeria, bee peni aŋ maa a na nda ugondu we elele na imɛ iyi ya Agwatana. Aba a ngbaraka atwa Rubɛn, na atwa Gad, keeni ashashɛ ụlamụ Manasɛ.