Read bassa 2 SHƐRỤKWỤKWỤ SHI YEBI 13 Bible Online

2 SHƐRỤKWỤKWỤ SHI YEBI 13 - bassa bible

2 SHƐRỤKWỤKWỤ SHI YEBI 13

¹Ti ge Jeroboam ulwa shiywa umpwa-na-shɛba-shɛ-tụndatụ tu baa yɛ tugwama ti Isrɛl, nazhɛ ga Abija yɛ tugwama tu Juda.

²Bɛ yɛ tugwama shiywa shɛ tatụ nu Jɛrusalɛm. Ɛ hiɛŋ bino bwa ga Mikaya yɛu Uriɛl yɛu ya atwa Gibia. Ujasa layanɛ ata Abija ne Jeroboam.

³Ga Abija ishijɛ ne ejeshi ubwa igbɛɛ-akpakwụ-eyebi (400,000), ge Jeroboam keleni bu bụkpagwụ bu ujasa ne ejeshi ubwa igbɛɛ-akpakwụ-eneshi (800,000).

⁴Ga Abija beni bee munji Ishɛmɛ Zɛmaraim nɛ namɛ na cɛnjɛ ti Ishɛmɛ Ifrem, bee shikeni, baa suyanɛ Jeroboam keeni atwa Isrɛl hwɛɛ, bɛɛ hiɛŋ aŋ, Shɛlaga ma n-ndumwa mi mi.

⁵Hi mepi shi ree maa AGWANGWAMA na shɛ Agwatana atwa Isrɛl twawa la unu na zasa tụbwadụ ne Devid, maa ubwa zhɛ na ya tugwama ti Isrɛl hwɛɛ, ta ajalalo ubwa unyizo-nom?

⁶Ge Jeroboam yɛu Nebat na kaa shɛ bɛnjɛ-bu-ugondu Sụlụmụn yɛu Devid to tigezhe, boo bogwu no Sụlụmụn na shɛ agwuma-ihwɛ ibwɛ.

⁷Ibɛ po atwa oko tugbom zhe aa ulwa no ofwo ubwa, aa njɛ Rehoboam yɛu Sụlụmụn iyi nɛ kwụlanɛ aŋ ni iji, iwɛnɛ baa ta shɛ la yɛu nɛ ahaŋsa te ci shi maa lakana aŋ.

⁸Hwuwayɛ go, hiɛ mama 'imɛ ya maa hi jeshi cɛnjɛ-ta-tugwama tu na AGWANGWAMA peni la umwamwa Devid, iwɛnɛ ahiɛ 'yajɛ ejeshi ufwugwo, tu ntatanuwaŋ mi inɛ mu na ge Jeroboam njɛ la na azhɛnarɛya maa mɛ shɛ tuwa ti hiŋ.

⁹Shɛ ahiɛba suu hi unzhi onongbo AGWANGWAMA a na shɛ umwamwa Aron, ehi unzhi ta Alivai hwɛɛ? Ehi teri onongbo anya ụtarụtụ wa aba, gana na anya edenji a nda. Bụtụ be elele na eri maa shapɛ yɛu buna be eyi kwo kaa adagba ecenje, ɛ zhɛ a nda bụ shɛshɛshɛ maa sha bunongbo bi iyi nɛ shɛ shɛ Agwatana.

¹⁰Ama AGWANGWAMA na shɛ Agwatana tu, ubwa atu ta ndana iyi, tu ta lacɛ shɛ bụ o. Onongbo na banɛ nu uwamwa Aron a ta nda ugondu wa aba, Alivai aba du kaa to mbiyono aŋ.

¹¹O hwoŋzhingono bu iturɛre, ti iyi ụrụpɛ, tu uvwungwa tụ ụrụmɛ we elele. Aa pana bụ arụpɛ tiya nu uteburu ata namɛ shɛshɛshɛ. Ụrụmɛ ụrụmɛ oo zwono asụtụla ata patanganɛ nu uteburu-ụsụtụla ata wa azhɛnarɛya ulwa. Ta nda iyi nɛ AGWANGWAMA peni-unu ibɛ. Ama hiɛ lacɛ bu tuba.

¹²Agwatana ni ikɛnyi ibwɛ, ubwa shɛ bi'yagajɛ tu, onongbo namba epe na akakacɛ aba. Aa mama 'imɛ maa a tu suyanɛ maa ta jasa ujasa ne hiŋ. Ta jasa ma AGWANGWAMA na shɛ Agwatana ogwunukwoshi hiŋ o! Hi eri shi hia lasụ bu o.

¹³Na aka ga tobwolo ge Jeroboam twolwo ejeshi ubwa oko, ɛɛ jirɛ ejeshi Juda geri ba aba, atwa vwɛ tuba peji aŋ agba.

¹⁴Aka na te ejeshi Juda mbiyanɛ ekwunyi aba, aa kwụbɛ tobwolo o hwolwo aŋ. Ee keri AGWANGWAMA ụhiɛŋshɛ maa mbiyono aŋ, nazhɛ onongbo hwulupeni akakacɛ aba.

¹⁵Ga Abija hwuleni ejeshi Juda umbe, ee keri ukwuruwa ujasa, aa uganɛ, nazhɛ ee tefuleji aŋ, Ibɛ po Agwatana lasagwụ aŋ Jeroboam keeni ejeshi Isrɛl.

¹⁶Nazhɛ atwa Isrɛl gezhigeni atwa Juda, nazhɛ Agwatana leni maa ga ukpahiŋ wa atwa Juda u hwuri una wa atwa Isrɛl maa a 'imɛ aŋ.

¹⁷Ga Abija ne ejeshi ubwa kwụnɛ atwa Isrɛl na tụlasụ tu na aa lasụ aŋ. Aa kwụnɛ ejeshi Isrɛl a na ga 'yajɛ ikɛnyi igbɛɛ-akpakwụ-eyebi-ni-dipi-yebi (500,000).

¹⁸Gana atwa Juda lasụ atwa isrɛl iwɛnɛ to o to AGWANGWAMA na shɛ Agwatana ogwunukwoshi aba aba ta.

¹⁹Ga Abija urugeni ejeshi Jeroboam, bee leshiji emeseyi ashɛpwụ ubwa a'wụtụ oko baa 'yajɛ, aba shɛ Bɛtɛl, ni Jɛshana keeni Ɛfron, ta ashɛpwụ ticwɛŋ cwɛnŋ a na rugwutwonu ashɛpwụ ata a'wụtụ.

²⁰Ge Jeroboam zasa aka elele na baa 'yajɛ ya ukpahiŋ kwukwuŋ uuwa ga Abija to hwuwo tugwama tu bwa tiya o. Nu ukwunanga ibɛ AGWANGWAMA po bu iyi bee 'wi.

²¹Ga Abija tuba ba kaana ukpahiŋ ti'yaga. Bi 'yajɛ eyikwo umpwa-na-ba-eneshi, bee meci miaụŋ-me-eyi woshi-na-muba-mi-yebi keeni miaụŋ-mo-o umpwa-na-muba-mi-cihiŋ.

²²Iyi nɛ vwɛ nɛ ga Abija ndanjɛ na tugwama tu bwa, ti iyi nɛ baa dumanjɛ hwɛɛ, i 'nyeci nu utakada shɛrụkwụkwụ she bigesere ge Ido.