Read bassa 2 SHƐRỤKWỤKWỤ SHI YEBI 14 Bible Online

2 SHƐRỤKWỤKWỤ SHI YEBI 14 - bassa bible

2 SHƐRỤKWỤKWỤ SHI YEBI 14

¹Ga Abija 'wi, ee ni bu nụ ụshɛpwụ Devid. Nazhɛ yɛu ibwɛ ga Asa yɛ tugwama tu bwa. Cɛnjɛ-ta-tugwuma tu Asa tu namɛ na amɛ-olom shiywa umpwa.

²Ga Asa lemicinji AGWANGWAMA na shɛ Agwatana ubwa amɛ, iwɛnɛ baa nda iyi ibiye keeni iyi nɛ teni cɛŋ.

³Ubwa hwuŋzetenji otukwu-ụrụpɛ tuwa keeni ofwo ata zeteji hwɛɛ, tu ntatanuwaŋ ma ata ee shebi na atayɛ, ti itɛtɛnuwɛŋ tuwa ta ata ɛɛ hiɛŋ Ashera.

⁴Bee peni atwa Juda unu maa ga 'wa ukwulana wa AGWANGWAMA na shɛ Agwatana ogwunukwoshi aba, maa du a na nda iyi nɛ boo mbisogono aŋ, tu unu ubwa tụpana.

⁵Ubwa mushenji ofwo ata zeteji keeni otukwu-ụrụpɛ ata oo hwoŋzhongo iturɛre na cɛnjɛ tu Juda hwɛɛ. Iwɛbɛ po cɛnjɛ ta ata tu namɛ na amɛ-olom na aka tugwama tu bwa.

⁶Na aka ata ibɛ boo mo uba, bee kepi ashɛpwụ ata a'wụtụ a'wụtụ Juda. A namɛ shiywa shi gembi ufwugwo uzawa ujasa tujasa, iwɛnɛ ta AGWANGWAMA peni aŋ amɛ-olom.

⁷Bɛɛ hiɛŋ, atwa Juda, Mizha tu mo ma ashɛpwụ a'wụtụ a'wụtụ, maa ti kepi aŋ ma nu uba, ta tuma ta ashɛkpa, ga a 'yaga shidubo keeni imbele shidubo tukapa. Atuba kaa ti 'yajɛ cɛnjɛ tu ga, iwɛnɛ atɛ njɛ iyi nɛ kwụlanɛ AGWANGWAMA na shɛ Agwatana tu. Ubwa tɛ jɛlanɛ, bee leni kaa maa ta nama suu geri elele. Oo mo ga tuma ta ata, iyi du kaa ya zhɛmana aŋ.

⁸Ga Asa 'yajɛ ejeshi igbɛɛ-kpakwụ-ni-dipi-yebi (300,000), a na banɛ nụ ụlamụ Juda, a 'yajɛ shabula shu ujasa keeni nsanụ. Anaa na banɛ nụ ụlamụ Bɛnjamin namɛ igbɛɛ-dipi-yebi-na-buhanda (280,000). A 'yajɛ shabula shu ujasa keeni itɛ kpaaŋ aba, ee seshi kaa ujasa, aa shɛ kaa etwenyi na eri teleyi tɛnda tebiye.

⁹Ge Zera bụtụ bi Itiopia sukakanɛ Juda ne ejeshi igbɛɛ-akpakwụ-a-ta (1,000,000), ni ihɛŋtu ujasa kpakwụ-ni-dipi-yebi (300), aa zhajɛ uuwa ee ci Marisha.

¹⁰Ga Asa zhe baa twa nu bwa maa a njɛ ujasa, ibɛ atwa ata keri bụkpagwụ ba aba bu ujasa nu Ulomu Zɛfata, to dongonu Marisha.

¹¹Ga Asa keri AGWANGWAMA na shɛ Agwatana ubwa ụhiɛŋshɛ, bɛɛ hiɛŋ, Oo AGWANGWAMA, ibu zana iwɛ maa mbiyeni ejeshi na 'yajɛ ukpahiŋ o, gobwonu du yaa bu zasanasa iwɛ maa mbiyeni ejeshi na zasa ukpahiŋ. AGWANGWAMA na shɛ Agwatana tu, iti mbiyeni hwuwayɛ go. Iwɛnɛ po gabụ otu to aba, ni izeci bu atu banɛ maa ta nda ujasa ne ejeshi ga gembi ufwugwo gana ga. AGWANGWAMA, gabụ bɛ shɛ Agwatana tu, kede bụtụ be elele heŋshi maa bi eri ma bụ lasụ o.

¹²Aka na tu ga Asa ne ejeshi Juda sukakanɛ ejeshi Itiopia, nazhɛ AGWANGWAMA lasụ ejeshi Itiopia aa bwadụ nụ usumwa.

¹³Ga Asa ne ejeshi ubwa urigeni aŋ nụ usumwa uuwa i ci Gera. Atwa Itiopia 'wi hwɛɛ, i zasa bụtụ ba aba be elele na vwɛ o. AGWANGWAMA lasụ aŋ tedure ne ejeshi ubwa. Nazhɛ atwa Juda suji ufwa ujasa tebiye.

¹⁴E iricinji ashɛpwụ a'wụtụ a'wụtụ a na rungwutwonu Gera, iwɛnɛ ti inyɛsɛ ya AGWANGWAMA shɛ aŋ. Ejeshi ata Juda suje i'wɛŋnɛ nɛ gembi tebiye na ashɛpwụ ata ee irecenji.

¹⁵E zhe du aa sukakanɛ unyama wa a'iywa iyimabiga nu ugba wa aba, ɛɛ imɛ agwụdụ keeni nruhondo mu ufwugwo. Nazhɛ ee gwure nu Jɛrusalɛm.