Read bassa 2 SHƐRỤKWỤKWỤ SHI YEBI 15 Bible Online

2 SHƐRỤKWỤKWỤ SHI YEBI 15 - bassa bible

2 SHƐRỤKWỤKWỤ SHI YEBI 15

¹Mpiala ma Agwatana mu namɛ na Azaria yɛu-ye-eyi Odɛd,

²bee zhe pu Asa. Bɛɛ hiɛŋ bụ, Asa, ta ahiɛba atwa Juda keeni atwa Bɛnjamin hwɛɛ, shɛlaga ma! AGWANGWAMA namɛ ne hiŋ uuwa i ci ụkwụmbwụ na ɛhi zhɛ hia nama nu bwa. Yaa shɛ ehi jelekeci bu, hi zhɛ hia ta bu ugbe, ama yaa shɛ ehi jineci bu, bi zhɛ du mo hi jinoko.

³I ilegeji ya ta atwa Isrɛl 'wa sụ Agwatana tɛkana, aa namɛ ya uzawa onongbo a na go mbisogono aŋ iyi, a namɛ du uzawa undwa.

⁴Ama aka na te tiriri ti jiteni aŋ, nazhɛ ɛɛ jishirijɛ pa AGWANGWAMA na shɛ Agwatana atwa Isrɛl, ee gwure pu bwa aa zhɛba bụ.

⁵Na aka ata i zasa la bụtụ be elele na eri be teni, kwo kaa eri ba bana kwakwa i shɛ a njɛ shɛ bụ iyi iwɛ kwo kaa ụbaụta o. Iwɛnɛ po cɛnjɛ te elele tu namɛ nụ ụbaụta keeni tusukwutogwu.

⁶Udenji ye wɛ ishijɛ wa sukakana udenji na, atwa cɛnjɛ cɛnjɛ ɛ ishijɛ a na mama sukakanụ. Iwɛnɛ po Agwatana ubwa leni maa ga ụbaụta keeni tusukakana ta ata ti jiteni aŋ.

⁷Ama 'yaga ma ukpahiŋ, kede u'waba ihi kwuswa o. Hi zhɛ hia lashɛga titeni tu ugondu ata ahia nda.

⁸Gana na tu ga Asa hwụjɛ tigesere tu na ga Azaria yɛu[15] Odɛd jɛmɛ, ibɛ po u'waba hiɛ bụ. Nazhɛ bee zhe bee hwuŋzetenji ntatanuwaŋ ma ata mu namɛ na cɛnjɛ tu Juda keeni Bɛnjamin hwɛɛ, tu ntatanuwaŋ ma ata mu namɛ na ashɛpwụ a'wụtụ elele na bee lesheji nu nshama mɛ cɛnjɛ ti Ifrem. Nazhɛ baa nanganganɛ utukwu-ụrụpɛ wa AGWANGWAMA na namɛ nu ukpogwu umwono ata wa AGWANGWAMA.

⁹Ga Asa sotulonu atwa Juda, na atwa Bɛnjamin, ta atwa Ifrem, ta atwa Manasɛ keeni atwa Simion a na jɛjɛ na ashashɛ aba. Iwɛnɛ po ufwugwo wa atwa Isrɛl zhajɛ no ofwo ubwa, iwɛnɛ ta a kwụbɛ maa AGWANGWAMA na shɛ Agwatana ubwa namɛ nu bwa.

¹⁰Aa ulwa nu Jɛrusalɛm, ga Asa ulwa shiywa umpwa-na-shɛba-shɛ-ta ni ipiɛnɛ itɛtu tu baa yɛ tugwama na aka ata.

¹¹E peni AGWANGWAMA arụpɛ jita ata, oo to arụpɛ ni inɛ akpakwụ-atatụ-ni-dipi-yebi (700) keeni agwụdụ igbɛɛ-itɛtu-na-akpakwụ-a-ta (7,000).

¹²Apata aa twa-unu maa AGWANGWAMA na shɛ Agwatana ogwunukwoshi aba ɛɛ zhɛ na zhɛba na shɛmɛ sha aba keeni shihwulu sha aba hwɛɛ.

¹³Bụtụ be elele na lacɛ maa zhɛba AGWANGWAMA na shɛ Agwatana Isrɛl ɛ zhɛ a kwụna bụ, ta miaụŋ, ta atwa a'wụtụ, te etwenyi te eyikwo.

¹⁴Oo to izeci ya AGWANGWAMA na rụhwụŋ rụ 'wụtụ maa ɛ zhɛ a untangana unu ata aa twa. Ibɛ po aa uganɛ taawụụ ee hwuri akakacɛ keeni mahiuaŋ.

¹⁵Shɛmɛ sha atwa Juda shi lemi hwɛɛ, iwɛnɛ ta a twa-unu ata na amɛ oko hwɛɛ. A zhɛbɛ AGWANGWAMA na tukwulangana hwɛɛ, iwɛbɛ po bee peni aŋ amɛ-olom geri elele hwɛɛ.

¹⁶Agwuma ga Asa becinji ukaka ubwa maa kede sha ya e'uji agwuma o, iwɛnɛ tu baa njɛ ufwasa itɛtɛnuwɛŋ Ashɛra. Ga Asa jeji itɛtɛnuwɛŋ ɛtɛ bee kekebi iŋ wunzu wunzu, bee hwoŋzhinji owunzu ata ibɛ nu Ulomu Kidron.

¹⁷Okwo tu ga Asa hwuŋzetenji shi ofwo ata wa atwa na shɛ shɛ atwa Agwatana a ta arụpɛ hwɛɛ, bu shanɛ kaa AGWANGWAMA bụtụ bɛ tɛcara tutu tu'wo tu bwa.

¹⁸Bu suje i'wɛŋnɛ ye elele nɛ bishi bwa ga Abija tileneni la Agwatana, bee zweni iŋ nu Umwono wa Agwatana hwɛɛ, ti iyi nɛ aa njɛ na azhɛnarɛya, ti inɛɛ nɛ aa njɛ na azụrụfa nɛ du bee tileneni la Agwatana.

¹⁹Ujasa zana aŋ ya uuwa i ci aka na baa ulwa shiywa talacɛ-na-shɛba-shɛ-ta tu baa yɛ tugwama o.