Read bassa 2 SHƐRỤKWỤKWỤ SHI YEBI 2 Bible Online

2 SHƐRỤKWỤKWỤ SHI YEBI 2 - bassa bible

2 SHƐRỤKWỤKWỤ SHI YEBI 2

¹Na aka ga ibɛ agwuma Sụlụmụn heŋshi maa ma umwono wa Agwatana, na ɛɛ zhɛ na zhɛba AGWANGWAMA, baa jala du maa ma una ihwɛ ibwɛ.

²Bee jeri etwenyi igbɛɛ-talacɛ-ni-bɛ-tɛ (70,000) maa a na 'wananjɛ i'wɛŋnɛ ugondu, bee jeri etwenyi igbɛɛ-buhanda (80,000) maa e ne hine atayɛ na cɛnjɛ tu nshama. Bee jeri etwenyi ugbaa-na-akpakwụ-atụndatụ (3,600) maa o no hikokono ugondu ata.

³Go Sụlụmụn tumwanɛ atwa no ofwo agwuma Taya ge Hiram, bɛɛ hiɛŋ bụ, Ta tuhwulo ta tihinya tɛnda ne mi gana na abɛ njɛ la ne bishi mi ge Devid, ebi sengeni bu la ezhibi osobu boo mo umwono ubwa.

⁴Ma jala maa Ma mana AGWANGWAMA na shɛ Agwatana mi umwono. U zhɛ wa sha ofwo tijilo na ɛti zhɛ tu na zhɛba bụ nu ụrụpɛ iyi nɛ 'yajɛ ụhiụŋ ụlatụ tuhwoŋzhingo, keeni ofwo na ɛti zhɛ tu na pana bụ arụpɛ akara tijilo unyizo-nom. Apata zhɛ a sha ofwo na ɛti zhɛ tu na pana bụ ụrụpɛ tuhwoŋzhingo uvwungwa uvwungwa keeni ụrụpɛ ụrụmɛ, tụ Ụjita-ụhinjanụ we elele. Ti zhɛ du tu na nda Isene Upiana Ufwo nu bwa, maa tu na nda iyi nu bwa ni ijitɛ tijilo ye elele maa tu na muna AGWANGWAMA na shɛ Agwatana tu ụjɛrụma. Bi peni atwa Isrɛl unu maa a na nda ijɛ unyizo-nom.

⁵Ma jala maa go umwono ata wa Agwatana Ngɛɛ zhɛ ma ma u gembi, iwɛnɛ ta Agwatana tu gembi bee hwuri tuwa te elele.

⁶Umwono gana na kwuuŋ bụtụ eri ba mana Agwatanaa? Okwo azuba na zeci uhwuri ofwo vwɛ kpaaŋ twa sụ bu o. Gana na Ngee eri ma mana bụ umwonoo? Ti yaa shɛ shɛ maa Ma ma kwakwa ofwo na ɛɛ zhɛ no hwoŋzhingono bu iturɛree?

⁷N tumwananɛ bụtụ na shɛ bugwoni ba atayɛ tɛshaba, nụ ụlụma wa azhɛnarɛya, na azụrụfa, nɛ ɛtumburɛ keeni ashɛmbɛrɛ, na kaa du 'yebi taa na tugwuno ti shenje berebere keeni ma ti ti shenje howu keeni ma tu tu uduhwa ushi. Ubwa zhɛ ba nda ugondu na anjɛ-ugondu i'ɛlɛ Juda keeni Jɛrusalɛm a na bishi mi ge Devid teri la.

⁸M mepi gana na te eshebi bu i'wɛ'wɛ 'yebi ugondu, n dwɛjɛ ezhibi osobu, na agwugwa keeni akwụrụgba ni Lebanon maa n tumwananɛ aŋ. M mama 'imɛ maa ma tumwana miaụŋ mi mi mu ugondu maa e mbiyeni miaụŋ mụ bụ mu ugondu,

⁹no ogbogolo ata tɛshaba duwa. Iwɛnɛ po umwono ga wa Agwatana Ama jala tuma zhɛ wo gombo tebiye, wɛɛ zhɛ kaa wa pilanụ du tebiye.

¹⁰N zhɛ ma bu tumwananɛ izɛgwu witi nɛ nokwo na azhɛka igbɛɛ-umpwa, (20,000) ni izɛgwu bali, na azhɛka igbɛɛ-umpwa (20,000), ne meni ma afwafwa nhiŋlwo igbɛɛ-umpwa (20,000) keeni manɛbɛ ma buta agaruwa igbɛɛ-umpwa (20,000), iwɛ iyimɛyɛ ya anjɛ-ugondu bu.

¹¹Nazhɛ agwuma Taya ge Hiram, 'nyatanɛ agwuma Sụlụmụn ajɛshɛgwa, bɛɛ hiɛŋ, Iwɛnɛ ta AGWANGWAMA lubi atwa ubwa, ibɛ po baa bɛ njɛ agwuma aba.

¹²Ge Hiram hiɛŋ sasana, Zhemonjino ma AGWANGWAMA na shɛ Agwatana Isrɛl, na njɛ azuba keeni cɛnjɛ. Bi peni agwuma Devid yɛu nɛ incɛ, nɛ kaa mepi iyi, na kaa shɛ bugwoni, na imanganjɛ maa ma umwono wa Agwatana keeni una ubwa umwono.

¹³N zhɛ ma bụ tumwananɛ Huram na incɛ, na shaananɛ bugwoni bu ugondu i'ɛlɛ.

¹⁴Bino bwa shɛ ụlamụ Dan, bishi bwa shɛ bụtụ bu Taya. Bi 'yebi injɛɛ njɛɛ na azhɛnarɛya, ta azụrụfa, tɛ ɛtumburɛ, ta ashɛmbɛrɛ, ta atayɛ keeni i'wɛ'wɛ. Bi eri ba nda iyi no tugwuno tu uduhwa ushi, keeni uduhwa ushenje ta ma ti ti shenje howu keeni ihwehwe ilinɛn nɛ aa hiɛŋshɛ tanɛ tanɛ. Bi 'yebi iyiri i'nyɛtɛ ye elele tɛta ni iyi, bee eri ba 'wa tusakakana te elele tu na ee peni bu. Ga nda ugondu i'ɛlɛ na atwa bụ keeni atwa na ndanɛ la bishi bu na shɛ iyɛri mi ge Devid ugondu.

¹⁵Iyɛri mi, asha utu tumwananɛ ya izɛgwu ɛtɛ witi, ni inɛ bali, ne meni ma ata ma afwafwa keeni manɛbɛ ma buta mu gata ebi shiri la unu.

¹⁶Ti zhɛ tɛ bu dwɛjɛ ezhibi osobu gana na aba jala ni Lebanon te umpe iŋ te zweni ne meni maa i fwunjɛ i zwe tutu Jopa, apata tuba ɛbi zhɛ bo sugo iŋ ya bo hwulo Jɛrusalɛm.

¹⁷Agwuma Sụlụmụn rɛcɛ agaiŋ etwenyi a na jɛjɛ na cɛnjɛ ti Isrɛl, gana na te bishi bwa njɛ la tɛrɛcɛ. Agaiŋ na jɛjɛ ni Isrɛl shɛ igbɛɛ-dupu-nu-woshi-ni-bɛ-cihiŋ-na-akpakwụ-atụndatụ (153,600).

¹⁸Bee eni atwa igbɛɛ-talacɛ-ni-bɛ-itɛ (70,000) maa a na 'wananjɛ i'wɛŋnɛ ɛtɛ ugondu. Bee eni atwa igbɛɛ-buhanda (80,000) maa e ne hine atayɛ na cɛnjɛ tu nshama, bee teri etwenyi ugbaa-uko-na-akpakwụ-atụndatụ (3,600) maa a shɛ ehikekeni a na zhɛ na kwụba ugondu wa atwa ata okwo a nda ba ga ugondu ata.