Read bassa 2 SHƐRỤKWỤKWỤ SHI YEBI 22 Bible Online

2 SHƐRỤKWỤKWỤ SHI YEBI 22 - bassa bible

2 SHƐRỤKWỤKWỤ SHI YEBI 22

¹Atwa Arab oko ishijɛ aa kwụnɛ miaụŋ-me-eyi ma agwuma Jehoram mi hiiŋ hwɛɛ, semi ga Ahazia yɛu ibwɛ imɛwɛɛ kiri benengeni. Ibɛ po atwa Jɛrusalɛm peni Ahazia tugwama te bishi bwa.

²Ga Ahazia namɛ shiywa woshi-na-shɛba-shi-yebi[19] te e meci bu, nazhɛ bee kwuni tugwama tiya. Baa yɛ tugwama nu Jɛrusalɛm uywa uko. Ɛ hiɛŋ izeci bino bwa ga Atalia bụjalụ Omri.

³Ga Ahazia 'wa uhwaŋna na atwa umwamwa Ahab ndanjɛ iyi keeni gana na to bino bwa ga Atalia peni bu ahaŋsa, ibɛ zeriji bu ni iyi iwɛ tɛnda.

⁴Bɛ njɛ AGWANGWAMA iwɛwɛ, iwɛnɛ po aka na te bishi bwa 'wi, atwa oko banɛ nu umwamwa Ahab aa pana bụ ahaŋsa, ibɛ po ee kelegeji bu.

⁵Gana na tu baa 'wa ahaŋsa na ee peni bu, ibɛ po bee zhe boo togwu na agwuma Isrɛl go Joram maa e jeshi Hazaɛl agwuma Siria. Ejeshi ata twa nu Ramot na namɛ ni Giliad, ibɛ Asiria gwụcɛnjɛ Joram nu ujasa ata.

⁶Ibɛ po bee gwuri ni Jezriɛl maa mama nɛnga na tụgwụcɛnga ta ata ɛɛ gwucinjɛ bu nu Ramot[20] Giliad, na aka na ti bee zhe maa sukakana Hazaɛl agwuma Siria nu ujasa. Ibɛ po ga Ahazia yɛu Jehoram agwuma Juda zhe Jezriɛl maa kwubɛ Joram yɛu Ahab, iwɛnɛ tu baa arɛ la ụngwụ.

⁷Nu uhikwonuo ata ga Ahazia zhe Joram, ibɛ po Agwatana leni maa ga Ahazia leyi. Aka na tu ga Ahazia namɛ apata abana Joram, nazhɛ bụtụ bu ko na ɛɛ hiɛŋ ge Jehu, na shɛ yɛu-ye-eyi Nimshi sukakanɛ aŋ, ubwa kaa AGWANGWAMA ge dudugeni manɛbɛ maa iricingo ihwɛ Ahab.

⁸Gana na ti ge Jehu ba pana ụlamụ ata na yɛ tugwama ulwapɛ, bee jiteni ehwurembe Juda oko a na shɛ miaụŋ ma atwa Ahazia, te e she Ahazia na tahaŋnụ tu bwa, baa kwụnɛ aŋ apata hwɛɛ aba.

⁹Bee dwelekeci Ahazia, bɛɛ cɛ bu ugbe tu baa swacɛ nu Samaria. Ibɛ po ee shepi bu pi Jehu, baa kwụnɛ bụ. Ama e ni bu, ɛɛ hiɛŋ, Iwɛnɛ tu baa shɛ bụjalụ ba agwuma Jehoshafat na njɛ la ụkwụlana wa AGWANGWAMA na amɛ ubwa oko hwɛɛ. Ama i zasa bụtụ bu umwamwa Ahazia na ta vwɛ ya kwukwuŋ na te eri maa untangana cɛnjɛ-ta-tugwama ta ata o.

¹⁰Gunu na tu ga Atalia bino Ahazia hwụjɛ maa a kwụnɛ ba yɛu ibwɛ ga Ahazia, bee peni-unu maa ga a kwụnɛ du miaụŋ mu umwamwa wa agwuma Juda hwɛɛ.

¹¹Ga Ahazia 'yajɛ bụngwụfwụ na ɛɛ hiɛŋ izeci ibwɛ ge Jehosheba,[21] na cɛnɛ bunongbo na ɛɛ hiɛŋ izeci ibwɛ ge Jehoiyada. Ubwa bicinji yɛu-ye-eyi Ahazia ike nɛ ɛɛ hiɛŋ go Joash. Ubwa vwɛ bụ na amɛ miaụŋ mu umwamwa wa agwuma, mu na ɛɛ zhɛ a kwụna, baa intanɛ bụ nu umwono uko buweci. Baa pana bụ iyimɛyɛ apata. Ubwa bicinji bu na tụkwụna tu na ga Atalia ga jala maa kwụna bụ.

¹²Baa intanɛ apata nu umwono ata wa Agwatana abana na aba shiywa shi cihiŋ shɛ na ga Atalia yɛ tugwama.