Read bassa 2 SHƐRỤKWỤKWỤ SHI YEBI 25 Bible Online

2 SHƐRỤKWỤKWỤ SHI YEBI 25 - bassa bible

2 SHƐRỤKWỤKWỤ SHI YEBI 25

¹Ga Amazia namɛ shiywa woshi-na-shɛba-shɛ-ta te e meci bu, nazhɛ bee kwuni tugwama tiya. Baa yɛ tugwama tu Jɛrusalɛm shiywa woshi-na-shɛba-shi-cinjishi. Ɛ hiɛŋ izeci bino bwa ge Jehoadin yɛu ya atwa Jɛrusalɛm baa shɛ.

²Bɛ njɛ iyi nɛ kwụlanɛ AGWANGWAMA, ama bɛ njɛ shɛ iŋ na ahaŋsa ubwa oko hwɛɛ o.

³Gunu na ti bee munji na tugwama ta ata kpaaŋ, baa kwụnɛ anjɛ-ugondu ata kwụnɛ la bishi bwa na shɛ la agwuma.

⁴Ama bu kwụnɛ shɛ miaụŋ ma aba o, iwɛ iyi nɛ AGWANGWAMA peni atwa unu nu Undwa Moses, nɛ hiɛŋ, A shɛ shɛ a kwụna eshi iwɛ iwɛwɛ nɛ miaụŋ ma aba mɛ njɛ o. A shɛ shɛ kaa du a kwụna miaụŋ iwɛ iwɛwɛ nɛ eshi aba njɛ o. Ama bụtụ be elele na njɛ iwɛwɛ, ubwa kiri shɛ bo 'wo, iwɛ iwɛwɛ ikɛnyi ibwɛ.

⁵Ga Amazia sotulonu atwa Juda, boo dwotwogonu aŋ hwɛɛ, ta atwa Benjamin orubwo orubwo gana na ta amwamwa eshi aba namanjɛ. Bee jeri eberezhe na zhɛ a untangana orubwo ejeshi igbɛɛ igbɛɛ, no orubwo kpakwụ kpakwụ. Atwa na aa rɛcɛ aba shɛ atwa na shiywa sha aba shi tuwo woshi kwo kaa uhwuri ya. Ufwugwo we ejeshi ata hwɛɛ shɛ igbɛɛ-kpakwụ-ni-dipi-yebi (300,000). A shɛ ejeshi na ee zenji, a na 'yebi nsanụ tukala, na shabula shu ujasa tu'waŋna.

⁶Baa njɛ du ejeshi Isrɛl a na beni urishi nu ukpahiŋ igbɛɛ-dupu (100,000) ụgwụ na azụrụfa dipi-yebi (100).

⁷Ama bụtụ ba Agwatana bu ko zhegeni bu, bɛɛ hiɛŋ bụ, Oo agwuma, ta zhaga ne ejeshi ga Isrɛl o, iwɛnɛ po AGWANGWAMA zasaba na atwa Isrɛl a na banɛ ni Ifrem hwɛɛ o.

⁸Yaa shɛ ebi heŋshi maa aba zhɛ mo bu mbiyono nu ujasa, asha manga maa kwụbɛ. Agwatana ubwa 'yajɛ ukpahiŋ maa pana bụtụ maa lasụ, ubwa kaa du eri ba nda maa a lasụ bụtụ. Ubwa zhɛ ba nda maa ga atwa i'ime bu a bụ lasụ.

⁹Ga Amazia heŋteni bụtụ ata ba Agwatana, bɛɛ hiɛŋ, Gana na tuba Ngɛɛ zhɛ ma nda iwɛ ukwuribi ata Ngaa tupwa aaŋ? Nazhɛ bụtụ ata ba Agwatana jishijɛ bụ, bɛɛ hiɛŋ, AGWANGWAMA ubwa eri me bu gwuricingeni unaa na uhwuri gana ata.

¹⁰Iwɛbɛ po ga Amazia hiɛŋ ejeshi ata banɛ ni Ifrem maa ge e ji. Ama shɛmɛ sha aba shɛ hashaganụ na atwa Juda, ibɛ po ee hwuri ujiyo ni isɛbwɛ i'wɛtwɛ.

¹¹Iwɛbɛ po ga Amazia mama 'imɛ bee hwuleni ejeshi ubwa umbe, bee zeriji aŋ nu Ulomu Manɛ. Apata aa kwụnɛ ejeshi Idụm, igbɛɛ-itɛ (10,000).

¹²Asaza Juda 'imɛ anya atwa igbɛɛ-itɛ (10,000) buumwa buumwa, ee mungicinji aŋ ni ihiŋhiŋ utayɛ uko ụ'wụtụ, aa 'wɛŋ aŋ na tụbagwụ tu utayɛ ata, ibɛ po utayɛ ata rukwuteji aŋ rukwu rukwu.

¹³Nazhɛ ejeshi ebe ga Amazia ge jicinji sukakanɛ atwa Juda no tugwungwu tu Samaria ni Bɛt-horon, aa kwụnɛ etwenyi ugbaa-na-akpakwụ-a-ta (3,000), ee suji i'wɛŋnɛ ifwugwo ee hwuri ujiyo.

¹⁴Tu ga Amazia jiye ti bɛɛ kwụnɛ atwa Idụm, bee suje tuwa ta aba, bee shikicinji tu boo kwuzono tu, baa taga tụ ụrụpɛ tuhwoŋzhingo.

¹⁵Iwɛbɛ po amɛ AGWANGWAMA hashɛganụ na Amazia, baa tumwananɛ bụ bigesere bwa. Bigesere ata heŋteni bu, bɛɛ hiɛŋ, Iwembe po aba zhɛba tuwa tu na tu zasa ukpahiɛŋ maa ti leshiji atwa na 'yajɛ tụ ni i'ɛlɛ bụụ?

¹⁶Aka na te bigesere ata ta njɛ n-ndumwa, agwuma hiɛŋ bụ, Aka na kwuuŋ atụ bụ njɛ bipeni ba agwuma ahaŋsaa? Abu namɛ shɛ shiru, N zhɛ ma bụ kwụna. Ibɛ po bigesere ata namɛ ga shiru, ama bi hiɛŋ bụ, M mepi maa AGWANGWAMA heŋshi maa ma bụ kwụna, iwɛnɛ ebi leni shi ahaŋsa na Ama bụ pana, ibɛ po abɛ njɛ ijɛ.

¹⁷Ga Amazia agwuma Juda, na atwa na a pana bụ ahaŋsa, heŋshi maa a sukakanɛ atwa Isrɛl nu ujasa. Nazhɛ baa tumwanɛ agwuma Isrɛl ge Jehoash,[23] yɛu Jɛhoaz, bụjalụ Jehu, boo mbisogo bu n-ndumwa, bɛɛ hiɛŋ, Zhajɛ tu twa maa tu momo ponu agba.

¹⁸Ge Jehoash jishijɛ Amazia, bɛɛ hiɛŋ, Aka oko namba la, ukokoto uko u buka na namɛ ni Ishɛmɛ Lebanon tumwanɛ butumwa no ofwo usobu, wɛɛ hiɛŋ bụ, Pana yɛu mi ye eyi yɛu bu yo o maa zana. Ibɛ usunda we ehilo uko zhe wee rikeci buka ata ni ivwunɛ ibwɛ.

¹⁹Gabụ ga Amazia, ba busa iwɛnɛ abu lasụ atwa Idụm, ama ma bu pana ahaŋsa maa gɛga ni ihwɛ bu saiiŋ. Iwembe kwuŋ po ɛbu mɛmɛ kpɛnjɛ iyi nɛ zhɛ ma bu shapɛrɛganɛ ụbaụta ta atwa Juda hwɛɛɛ?

²⁰Ama ga Amazia hwụjɛ shɛ iwɛ ɛtɛ o, iwɛnɛ ti yaa shɛ ukwulana wa Agwatana maa a lasụ Amazia, iwɛnɛ tu baa zhɛba tuwa ta atwa Idụm.

²¹Ibɛ po agwuma Isrɛl ge Jehoash zhe ga maa e jeshi ujasa na Amazia agwuma Juda, Aa twa ni Bɛt-shɛmɛsh na namɛ nu Juda.

²²Nazhɛ atwa Isrɛl unzhi ejeshi Juda, ibɛ po ejeshi Juda gezheji ee ji nu nhwaŋ ma aba.

²³Ge Jehoash 'imɛ Amazia bee shepi bu nu Jɛrusalɛm. Nazhɛ bee hwuŋzhi uba Jɛrusalɛm te kwuni no Odubo Ifrem tutu i ci Odubo tiringeni. Ụdụlụ ibɛ u ci gana avwuna akpakwụ-atatụ (600).

²⁴Bee suji azhɛnarɛya na azụrụfa, ti i'wɛŋnɛ nɛ ge zweni nu Umwono wa Agwatana inɛɛ nɛ go Obɛd Idụm ga ngbaraka, tu uduciya na ga namɛ ni ihwɛ ya agwuma. Baa 'imɛ du atwa oko bee suji aŋ bee hwuri Samaria.

²⁵Ga Amazia yɛu Joash agwuma Juda ta yɛ uraiŋ shiywa umpwa-na-shɛba-shɛ-ta, na aba na ta agwuma Isrɛl ge Jehoash yɛu Jehoahaz agwuma Isrɛl 'wi, nazhɛ bee 'wi du.

²⁶Iyi nɛ ga Amazia ndanjɛ no tukwuno ta tugwama tu bwa tutu ukwunanga tuba, i 'nyeci shi suu nu utakada shɛrụkwụkwụ shɛ shɛgwuma shu Juda keeni Isrɛl?

²⁷Te kwuni aka na bee teni AGWANGWAMA tigezhe, ibɛ du po ee kwuni tuhaŋsa maa a kwụnɛ bụ nu Jɛrusalɛm. Nu ukwunanga ibɛ, bee gezhiji bee hwuri Lakish. Ama atwa i'ime ibwɛ 'wa bụ aa kwụnɛ bụ apata,

²⁸Aa shapɛ ru'wo ru bwa na budakwa, ee ni ru ne e'uye eshi ubwa nụ ụshɛpwụ Devid.