Read bassa 2 SHƐRỤKWỤKWỤ SHI YEBI 26 Bible Online

2 SHƐRỤKWỤKWỤ SHI YEBI 26 - bassa bible

2 SHƐRỤKWỤKWỤ SHI YEBI 26

¹Atwa Juda hwɛɛ teri Uzia[24] yɛu Amazia nɛ ta namɛ shiywa umpwa-na-shɛba-shi-cihiŋ te e meci bu maa ya tugwama te bishi bwa.

²Na aba tu'wo te bishi bwa ga Amazia, go Uzia leshigeneni ụshɛpwụ ata ụ'wụtụ, ɛɛ hiɛŋ, Ɛlat nazhɛ bee meeneni uŋ, bee gwuricingeni uŋ atwa Juda.

³Go Uzia namɛ shiywa umpwa-na-shɛba-shi-cihiŋ te e meci bu, nazhɛ bee kwuni tugwama tiya. Baa yɛ tugwama nu Jɛrusalɛm shiywa dupu-na-shɛba-shi-yebi. Ɛ hiɛŋ izeci bino bwa ge Jekolia yɛu ya atwa Jɛrusalɛm baa shɛ.

⁴Bɛ njɛ iyi nɛ teni cɛŋ ne eshe AGWANGWAMA gana na te bishi bwa ga Amazia njɛ la kpaaŋ gom.

⁵Bu ndanɛ AGWANGWAMA iyi na tɛcara uuwa i ci tu'wo tu Zɛkaria na bo sokokono bu iwɛ inyɛsɛ ya Agwatana tɛnda. Gana na tu baa 'wa Agwatana na tɛcara, ibɛ du po Agwatana njɛ maa ge iyi na zhɛmana bụ.

⁶Go Uzia jeshi ujasa na Afilistia. Bee hwuŋzetenji uba wa ashɛpwụ ata a'wụtụ, ɛɛ hiɛŋ Gat, tu uba Jebine keeni uba Ashdod. Nazhɛ boo mo ụshɛpwụ uko ụ'wụtụ dongonu Ashdod keeni ofwo anya ni Filistia.

⁷Agwatana mbiyeni bu baa lasụ Afilistia, ta atwa Arab a na jɛjɛ nu Gubeal ti Meun hwɛɛ.

⁸A'amon a tụpa Uzia ụdalụ wa aba, bi 'yajɛ ukpahiŋ tebiye harɛ urishi ubwa mburusonu tutu Ijipti.

⁹Shɛ inɛ ɛtɛ kiri o, go Uzia mengeni shɛshɛkpa nu Jɛrusalɛm, no Odubo Tiringeni, to Odubo Ulomu hwɛɛ, te Tiringeni tu uba, bee kepi aŋ nu uba.

¹⁰Bi mengeni du shɛshɛkpa nụ ụshɛka, bee kepenji aŋ, bee hinenji du a'ibwa meni. Iwɛnɛ po bi 'yajɛ iyimabiga tebiye ne embi nshama keeni adadarɛ. Bi 'yajɛ ahwɛŋ ntuma nu ntuma mu bwa ma afwafwa keeni ananganganɛ afwafwa nu nshama keeni ofwo na cɛnjɛ ti 'yajɛ ugwungwu, iwɛnɛ boo lubo itimɛ tuhwaŋ.

¹¹Go Uzia 'yajɛ ejeshi gembi ufwugwo a na mama 'imɛ iwɛ ujasa. E'nyeci ubwa a shɛ: ge Jeiyɛl keeni Measeiya, ga Hanania na shɛ bɛnjɛ-bu-ugondu wa agwuma, ubwa tuba shɛ bihikekeni ba aba.

¹²Ufwugwo we eberezhe ejeshi a na beni urishi nu ujasa a na namɛ nu nhwaŋ me eshi aba namɛ ugbaa-na-akpakwụ-atatụ (2,600).

¹³A 'yajɛ ejeshi igbɛɛ-dipi-tɛtu-ni-bɛ-tɛtu-na-akpakwụ-ecenje-ni-dipi-yebi (307,500) a na eri a jasa ujasa na atwa i'ime ya agwuma tebiye.

¹⁴Go Uzia jelekeni ejeshi ubwa, shabula shu ujasa, nu nsanụ, na akata ujasa, nu n-nduka mu ujasa, ti itɛ keeni [a'inla],[25] tu nkwolo keeni atayɛ.

¹⁵Atwa ubwa a na shɛ egwoni njɛ iyi ike nɛ ya kala a'inla keeni atayɛ a'wụtụ a'wụtụ na shɛshɛkpa keeni ne esugwulumi uba nu Jɛrusalɛm. Urishi ubwa mburusonu no ofwo elele, baa 'yajɛ kaa ukpahiŋ ụ'wụtụ iwɛnɛ ta Agwatana[26] o mbiyono bu.

¹⁶Gana na tu go Uzia 'yajɛ ukpahiɛŋ, baa kaana ya tubusa, ibɛ i shɛ ya ulayɛ ubwa. Bi shanɛ shɛ ya AGWANGWAMA na shɛ Agwatana ubwa bụtụ bɛ tɛcara o, iwɛnɛ bee teni nu Umwono wa AGWANGWAMA maa hwoŋzhingo iturɛre nu utukwu na oo hwoŋzhingo iturɛre.

¹⁷Ga Azaria na shɛ bunongbo ishijɛ no onongbo AGWANGWAMA anya dupu-nu-talacɛ (80) a na 'yajɛ ikɛnyi, aa 'wa bụ nu umwono ata,

¹⁸aa lakanɛ bụ. Ɛɛ hiɛŋ bụ, Uzia! Bi teni shi cɛŋ maa hwoŋzhingeni AGWANGWAMA iturɛre o. Onongbo na shɛ ụlamụ Aron kiri ee teri maa a na nda iŋ. Bana no ohwolu ga tijilo. Hioko ta bɛ njɛ AGWANGWAMA na shɛ Agwatana bụ iwɛwɛ, AGWANGWAMA zha shɛ ma bụ muna ya ụjɛrụma o.

¹⁹Go Uzia shikeni nu umwono ata wa AGWANGWAMA to dogonu utukwu iturɛre tuhwoŋzhingo, baa 'waŋnɛ ujejebi maa hwoŋzhingo iturɛre. Amɛ ubwa hashɛganụ no onongbo ata, ibɛ po ụngwụ-uwaŋna[27] banɛ bụ ni itune gunu urubwo ata.

²⁰Aka na ti ga Azaria na shɛ uhiu wo onongbo keeni onongbo a na vwɛ kwụbɛ ụngwụ-uwaŋna na namɛ ni itune ibwɛ, aa njɛ bụ ni iji maa bana nu umwono ata. Bee beni ga ni izɛlɛgwu, iwɛnɛ ta AGWANGWAMA peni bu ulwapɛ.

²¹Gabata agwuma Uzia 'yajɛ ya ụngwụ-uwaŋna uuwa bo to 'wo nu bwa. Nu umwono ubwa kiri boo shiyono ya, bi teni shi ya cɛŋ maa tono nu umwono wa AGWANGWAMA o, ee leshiji ugondu we elele na baa ga shɛ bu na nda. Iwɛbɛ po yɛu ibwɛ ye eyi go Jotam ngbaracɛ ya ihwɛ ɛtɛ ya agwuma, baa untanganɛ ya atwa cɛnjɛ ta ata.

²²Bigesere ga Ayizaya yɛu-ye-eyi Amos, ubwa 'nyeci iyi inyɛ nɛ agwuma Uzia ndanjɛ na tugwama tu bwa, no tukwuno ta tugwama tu bwa tutu i ci ukwunanga.

²³Go Uzia 'wi gana eshi ubwa, ee ni bu na cɛnjɛ tu na oo no shɛgwuma, ama e ni shi bu ne e'uye na oo no shɛgwuma o, iwɛ ụngwụ-uwaŋna ata baa 'yajɛ. Nazhɛ yɛu ibwɛ go Jotam yɛ tugwama no ohwolu ubwa.