Read bassa 2 SHƐRỤKWỤKWỤ SHI YEBI 29 Bible Online

2 SHƐRỤKWỤKWỤ SHI YEBI 29 - bassa bible

2 SHƐRỤKWỤKWỤ SHI YEBI 29

¹Gɛ Hɛzɛkia namɛ shiywa woshi-na-shɛba-shɛ-ta te e meci bu, nazhɛ bee kwuni tugwama tiya. Baa yɛ tugwama nu Jɛrusalɛm shiywa woshi-na-shɛba-shi-cinjishi. Ɛ hiɛŋ izeci bino bwa ga Abija yɛu Zɛkaria.

²Bu 'wa ụpapụ ugwunukwoshi ubwa ge Devid kpaaŋ, iwɛbɛ po baa njɛ iyi nɛ teni cɛŋ ne eshe AGWANGWAMA.

³Nu uywa ata gɛ Hɛzɛkia yɛ tugwama ne Bihiiŋ,[30] bee kepeshenji shidubo shu Umwono wa Agwatana, baa nanganganɛ shụ.

⁴Baa suyanɛ udungbe wo onongbo, ta Alivai oko, aa ulwa nu ukpogwu ata namɛ geri bu uwaŋna-banụ bu umwono wa Agwatana,

⁵bɛɛ hiɛŋ aŋ, Ahiɛba Alivai, shɛlaga ma iwe mi, mama njɛ ma shɛshɛshɛ; maa hiɛ njɛ du Umwono wa AGWANGWAMA na shɛ Agwatana ogwunukwoshi hiŋ shɛshɛshɛ. Bacɛnga ma iyi elele nɛ ge heshigeni uŋ la no ohwolu ata tijilo.

⁶Ogwunukwoshi tu zasana AGWANGWAMA na shɛ Agwatana tu cara o, iwɛbɛ po aa njɛ iyi nɛ heshigeni bu amɛ. E jineci bu sasana a 'wa sụ iwɛ ofwo na baa namɛ o, aa panɛ bụ aba.

⁷E kepi shidubo shu Umwono wa Agwatana, ee 'werecenji asụtụla ubwa, ee genji iturɛre tuhwoŋzhingo keeni arụpɛ tuhwoŋzhingo tuta no ofwo tijilo ta Agwatana Isrɛl.

⁸Iwɛbɛ po amɛ AGWANGWAMA hashɛganụ na atwa Juda keeni atwa Jɛrusalɛm. Iyi nɛ du kaa baa njɛ aŋ dama atwa, yee zweni kaa bụtụ be elele inyɛsɛ keeni ohwulu tuhoroko. Ahiɛba du kaa hiɛ kwụbɛ ijɛ tebiye ne eshe hiŋ.

⁹Iwɛ ijɛ kaa upo aa kwụnɛ eshi tu nu ujasa, aa 'imɛ eyikwo tu, ta miaụŋ mu tu me eyi to mu na mo o maa a njɛ aŋ ajama.

¹⁰Ma jala maa ma twa-unu na AGWANGWAMA na shɛ Agwatana Isrɛl, iwɛ maa kede amɛ ubwa hashɛganụ ya no tu o.

¹¹A-miaụŋ mi mi me eyi, ta ngbaraka ma ijɛ cwɛŋ o, iwɛnɛ po ahiɛba AGWANGWAMA teri maa hi shikono na agba ubwa maa hi na ndana bụ iyi, maa hi no hwoŋzhingono bu iturɛre, maa hi na 'yagaga du atwa ga maa a na zhɛba bụ.

¹²Nazhɛ Alivai na ga namba apata ishijɛ. Atwa na banɛ nu umwamwa Kohat na: ga Mahat yɛu Amasai, no Joɛl yɛu Azaria; atwa na banɛ nu umwamwa Merari na: ge Kish yɛu Abidi, na Azaria yɛu Jɛhalɛlɛl; atwa na banɛ nu umwamwa Goshɛn na: go Joash yɛu Zima, ne Idɛn yɛu Joa.

¹³Atwa na banɛ nu ukpogwu Ɛlizafan na: ge Shimri keeni Jɛuwɛl. Atwa na banɛ nu umwamwa Asaf na: gɛ Zɛkaria keeni Matania.

¹⁴Atwa na banɛ nu umwamwa Heman na: ge Jehiɛl keeni Shimei atwa na banɛ nu umwamwa Jɛdutun na: gɛ Shɛmaya keeni Uziɛl.

¹⁵Atwa ga sotulonu anya aba Alivai a na vwɛ, aa mama njɛ shɛshɛshɛ, nazhɛ ee kwuni Umwono wa Agwatana tijilo tɛnda gana na ta agwuma peni aŋ unu te teni cɛŋ nu n-ndumwa ma AGWANGWAMA.

¹⁶Nazhɛ onongbo teni na amɛ ohwolu tijilo Umwono wa Agwatana maa a njɛ uŋ shɛshɛshɛ. Aa bwajɛ iyi elele nɛ zasa shɛshɛshɛ nu ukpogwu Umwono ata wa AGWANGWAMA, onongbo suji iŋ ee becinji nụ ụshɛpwụ ata ɛɛ 'wɛŋ nu ulomu Kidron.

¹⁷E kwuni ugondu ata nụ ụjita uhiiŋ ne Bihiiŋ,[31] yaa namɛ ijitɛ itindɛtu nazhɛ ee ci angba Umwono ata, aa ndaananɛ ijitɛ itindɛtu nazhɛ ee hwuwi. A njɛ ugondu tijilo tu Umwono ata wa Agwatana ijitɛ upwa-ni-bɛ-cihiŋ nazhɛ ee hwuwi uŋ hwɛɛ.

¹⁸Nazhɛ onongbo zhe ee mbishi agwuma Hɛzikia, ɛɛ hiɛŋ bụ, Tu hwuwo Umwono wa AGWANGWAMA tijilo tɛnda, tu uteburu ụrụpɛ tuhwoŋzhingo, ti i'wɛŋni'wɛŋni ibwɛ hwɛɛ, tu uteburu iyimɛyɛ tijilo, ti i'wɛŋni'wɛŋni ibwɛ hwɛɛ.

¹⁹Tu gwuricingwo du i'wɛŋnɛ ɛtɛ agwuma Ahaz bwajɛ la iwɛnɛ baa zasa cara na Agwatana, nazhɛ atu nduwa iŋ tijilo sasana. I tileni ba nu umbe utukwu-ụrụpɛ wa AGWANGWAMA hwɛɛ ibɛ.

²⁰Ti iyi heri, ibɛ agwuma Hɛzɛkia gbatụ ti'ishijɛ nu uvwungwa dididi, boo sotulonu anjɛ-ugondu ụshɛpwụ ata, nazhɛ ee teni nu Umwono ata wa AGWANGWAMA hwɛɛ aba.

²¹Aa 'waŋnɛ inɛ ye eyi icenje, na adagba ecenje, na miaụŋ-ma-agwụdụ mi cenje, ne epi ecenje, iwɛ maa o to ụrụpɛ iwɛwɛ icɛnjɛ ta ata, ti iwɛ ohwolu tijilo, ti iwɛ atwa Juda. Bee peni onongbo a na shɛ umwamwa Aron unu maa go to ụrụpɛ ni ibɛ nu utukwu-ụrụpɛ wa AGWANGWAMA.

²²Inɛ, ibɛ onongbo kwụnɛ hiiŋ, nazhɛ aa kwụnɛ adagba, nazhɛ aa kwụnɛ miaụŋ-ma-agwụdụ, e zhizhenji mehieŋ ma aba hwɛɛ nu utukwu-ụrụpɛ.

²³Nu ukwunanga ibɛ, nazhɛ ee suji epi ata pa agwuma keeni pa atwa ata sotulonu maa e petengeni aŋ i'ɛlɛ ya aba.

²⁴Nazhɛ onongbo kwụnɛ epi ata, ee dudweji mehieŋ ma aba nu utukwu ata maa i shɛ ụrụpɛ iwɛwɛ tu'urugono iwɛ atwa ata Isrɛl kpaaŋ. Iwɛnɛ po agwuma, ubwa peni aŋ unu maa go to ụrụpɛ tuhwoŋzhingo keeni una iwɛwɛ iwɛ atwa Isrɛl hwɛɛ.

²⁵Gana na ta Agwuma 'wa unu na AGWANGWAMA tɛtaganɛ la agwuma Devid tedure na Gad na shɛ bụkwụbɛ-bu-uhwaŋna ba agwuma keeni Natan bigesere ata; ibɛ po baa gɛgacanjɛ onongbo nu Umwono wa AGWANGWAMA, na shiduma sha aba, to shikoko sha aba keeni apalụ aba ti'nyama, iwɛnɛ tu unu ata tụpana banɛ no olugwo AGWANGWAMA tedure ne egesere ubwa.

²⁶Alivai shikekeni ni i'nyemi 'nyemi ɛtɛ ge Devid njɛ la uhwara ni ibɛ. Onongbo shikekeni du apata na akakacɛ aba.

²⁷Nazhɛ gɛ Hɛzɛkia peni-unu maa ge e kwuni ụrụpɛ tuhwoŋzhingo tuta nu utukwu-ụrụpɛ. Gana na te e kwuni, nazhɛ atwa ata kwuni du AGWANGWAMA azunga ashɛtwa tuzungangana, akakacɛ kwuni du tuhwulo, e'nyemi kwuni du i'nyemi 'nyemi ya aba hwɛɛ.

²⁸Bụtụ be elele na namba apata kwuni tɛzhɛba, shɛzunga shi to tuhwulo hwɛɛ ta akakacɛ tuhwulo, uuwa i ci aka na iyi ụrụpɛ tuhwoŋzhingo hwuwowu tuhwoŋtu hwɛɛ.

²⁹Aka na ti iyi ụrụpɛ hwuwowu tuhwoŋtu hwɛɛ, nazhɛ agwuma Hɛzɛkia, medenji atwa ata namɛ nu bwa hwɛɛ kwuzenji, aa zhɛbɛ Agwatana.

³⁰Nazhɛ Agwuma Hɛzhɛkia ne ehwurembe atwa ata eni Alivai maa ga a zunganganɛ AGWANGWAMA shɛzunga sha ashɛtwa shɛ na ata Devid na Asaf bụkwụbɛ ata bu uhwaŋna 'nyeci la. Aa zụnjɛ ga shɛzunga nu unyasa ụ'wụtụ tubwada. Ee kwuzenji, aa zhɛbɛ Agwatana.[32]

³¹Nazhɛ gɛ Hɛzɛkia hiɛŋ atwa ata, Gana na ta ahiɛ namanɛ ya bana AGWANGWAMA rụmbɛɛ, asha kaanɛ ma izhɛ, maa hi sugeni ya AGWANGWAMA iyi ya arụpɛ, keeni apwaŋ a'walụ. Ibɛ po atwa na sotulonu apata suje ga iyi nɛ maa o to arụpɛ keeni apwaŋ a'walụ. Ibɛ po du atwa oko meme heŋseji ee suje iyi ya arụpɛ tuhwoŋzhigo na tukwulangana ta shɛmɛ sha aba.

³²Ufwugwo iyi ụrụpɛ tuhwoŋzhingo nɛ tu'ulwa ta ata tu 'waŋnɛ i shɛ: inɛ ye eyi dupu-nu-woshi (70), na adagba dipi-yebi (100), na miaụŋ-ma-agwụdụ kpakwụ (200) ee peni AGWANGWAMA ụrụpɛ tuhwoŋzhingo.

³³Ufwugwo iyimabiga nɛ ee tileni swooŋ iwɛ ụrụpɛ i shɛ: inɛ ye eyi akpakwụ-atatụ (600) keeni agwụdụ ugbaa-na-akpakwụ-a-ta (3,000).

³⁴Gana na to onongbo twa sụ ufwugwo maa a kwụnɛ iyimabiga ɛtɛ kpaaŋ, iwɛbɛ po Alivai a na shɛ miaụŋ-mo-bino ma aba mi mbiyeni aŋ uuwa ee hwuwi ugondu ata. Nazhɛ onongbo kwuni tizhajɛ maa a mama njɛ shɛshɛshɛ. Iwɛnɛ po Alivai mama 'imɛ na tumama nda shɛshɛshɛ uhwuri onongbo.

³⁵Iyi ụrụpɛ tuhwoŋzhingo gembi tebiye, medenji manɛbɛ mi iyi ụrụpɛ wa amɛ-olom keeni ụrụpɛ tuswa, inɛ ɛtɛ togotogwu na arụpɛ tuhwoŋzhingo. Gabata ɛɛ hicinjɛ tɛzhɛba tu Umwono wa AGWANGWAMA.

³⁶Gɛ Hɛzɛkia na atwa ata kpaaŋ bweji unyasa, iwɛnɛ ta Agwatana mbiyeni aŋ, aa njɛ ijɛ hwɛɛ kakayɛ.