Read bassa 2 SHƐRỤKWỤKWỤ SHI YEBI 32 Bible Online

2 SHƐRỤKWỤKWỤ SHI YEBI 32 - bassa bible

2 SHƐRỤKWỤKWỤ SHI YEBI 32

¹Na aba na ti gɛ Hɛzɛkia ndanɛ AGWANGWAMA iyi na tɛcara, nazhɛ gɛ Sɛnakɛrib agwuma atwa Siria tefuleji Juda, bee hweri ashɛpwụ aba a'wụtụ a'wụtụ, nazhɛ bee heŋshi maa bi zhɛ mama lasagwụ aŋ.

²Aka na ti gɛ Hɛzɛkia kwụbɛ maa gɛ Sinakɛrib ba jala maa sukakana Jɛrusalɛm sasana nu ujasa,

³baa njɛ ushaura na anjɛ-ugondu ubwa keeni ejeshi ubwa maa go o to meni na ma fwunga no tupohondo tụ ụshɛpwụ ata, ee mbiyeni bu ga.

⁴Ibɛ anjɛ-ugondu ubwa suji atwa ufwugwo ụ'wụtụ oo to ɛmɛzhiɛnjɛ ata keeni nsoso ma aba hwɛɛ, meni ma aba mu fwụnjɛ shɛ ya o. Ɛɛ hiɛŋ, Kede shɛgwuma sha Asiria shi gwushiji meni mi gembi aŋ tuswa ta a zhajɛ o.

⁵Boo to ikepi ibwɛ ikɛnyi hwɛɛ, baa nanganɛ ofwo ata uba go hwuzotongwu, bee mengeni shɛshɛkpa na azuba ubwa, boo mo uba unya no tupohondo. Boo mo uba no ofwo ata ee shidinji osombo ala Jɛrusalɛm. Baa nje nsanụ mu ufwugwo ta shabula shu ujasa shu ufwugwo.

⁶Bee shikecengeni atwa ata shɛ eberezhe ujasa hwɛɛ, nazhɛ bɛɛ hiɛŋ ga a ulwa ya pu bwa nu ukpogwu wo odubo ụshɛpwụ ata. Bee keeni aŋ ikɛnyi nu n-ndumwa mu ga, bɛɛ hiɛŋ,

⁷Mama 'imɛ ma tebiye, ta nda ma inyɛsɛ ya agwuma Siria keeni ejeshi ata baa 'waŋnɛ o. Iwɛnɛ po bụtụ na namɛ no tu 'yajɛ ukpahiɛŋ bee hwuri atwa na baa 'yajɛ.

⁸Ejeshi na baa 'yajɛ a shɛ atwa, ama o noo tu shɛ AGWANGWAMA na shɛ Agwatana tu atɛ 'yajɛ maa ma tu jasaga ujasa tu. N-ndumwa ma ata agwuma Juda gɛ Hɛzɛkia jɛmɛ, mɛ hiɛcɛnjɛ atwa ata u'waba tebiye.

⁹Ti ge Sinakɛrib te hweri cɛnjɛ tu Lakish, aa ta namɛ apata ne ejeshi ubwa, baa tumwanɛ anjɛ-ugondu ubwa no ofwo agwuma Hɛzɛkia keeni atwa Juda elele na namɛ nu bwa nu Jɛrusalɛm, bɛɛ hiɛŋ aŋ,

¹⁰Gamba gɛ Sinakɛrib agwuma Siria mo hi hoŋtono maa, Imbe kwuuŋ ihi peni ohwulu tishito upo ehi te zweni nu Jɛrusalɛm na Ngɛɛ zhɛ ma hwalaa?

¹¹Gɛ Hɛzɛkia ihi mbishi maa AGWANGWAMA na shɛ Agwatana hiŋ zhɛ me hi bicingo ni i'ɛlɛ ya agwuma Siria. Gɛ Hɛzɛkia ma hiɛ halakaka, baa jala maa imunɛ ni i'uyɛ ihiɛ kwụnɛ.

¹²Hi mepi shi ree maa gɛ Hɛzɛkia hwuŋzetenji tikpekwu, tu ntatanuwaŋ mu tuwa keeni otukwu-ụrụpɛ tuba. Nazhɛ bɛɛ hiɛŋ atwa Juda keeni atwa Jɛrusalɛm, Na ta ma ya arụpɛ tuhwoŋzhingo nu utukwu-ụrụpɛ uko gba?

¹³Hiɛ kwụbɛ shɛ ree iyi nɛ ogwunukwoshi mi tu Gamba, atɛ njɛ anya edenji? Hiɛ kwụbwa suu tatuwa te edenji elele tu loshigwo aŋ ni i'ɛlɛ mi kwukwuŋ?

¹⁴Aka na bwaa tuwa ta atwa cɛnjɛ te elele tu loshigwo atwa tuba a na ogwunukwoshi mi iricinji no olugwo tuu? Asha iwɛmbe po ehi heŋshi maa Agwatana hiŋ eri ma hiɛ lashɛga ni i'ɛlɛ mii?

¹⁵Iwɛ ecilo ata to lono ma maa gɛ Hɛzɛkia ihi helekeci maa ma hi inzhɛnga nu uhwaŋna ata o. Ta tɛtana ma n-ndumwa mu bwa rishe o! I ta Zasa udenji we elele kwo kaa cɛnjɛ te elele tu na tuwa ta aba tu loshigwo aŋ ni i'ɛlɛ mi kwo kaa ni i'ɛlɛ eshi mi kwukwuŋ o. Gana ata du Agwatana ga hiŋ eri shi ma hiɛ lashɛga ni i'ɛlɛ mi.

¹⁶Atwa shihwolu Asiria dumanganɛ AGWANGWAMA na shɛ Agwatana n-ndumwa mụ wɛ tebiye keeni Hɛzɛkia na shɛ yɛu ibwɛ ugondu nu n-ndumwa ma aba.

¹⁷Utakada na agwuma ata 'nyacɛ twajɛ AGWANGWAMA na shɛ Agwatana Isrɛl tebiye. U hiɛŋ, Tuwa ta anya edenji ti eri shi ta lashɛga aŋ nu ukpahiŋ na Ngaa 'yajɛ o, gana ata du Agwatana Hɛzɛkia eri shi a lashɛga atwa ubwa no olugwo mi o.

¹⁸Ibɛ po atwa ubwa shihwolu keri n'ungwa ne Riju maa inyɛsɛ shɛ atwa Jɛrusalɛm a na patanganɛ nu uba maa u'waba du kwuswa aŋ, iwɛ maa kede i 'yagana bu iwɛ gana na maa lashɛga ụshɛpwụ ata o.

¹⁹A duma iwɛ Agwatana Jɛrusalɛm gana na ta a duma iwɛ tuwa ta anya edenji, tu ntatanuwaŋ ma aba mu na atwamwa a nda ni i'ɛlɛ.

²⁰Nazhɛ agwuma Hɛzɛkia na Ayizaya yɛu Amoz na shɛ bigesere njɛ adua no ofwo Agwatana, aa ugananɛ bụ maa mbiyono aŋ.

²¹Ibɛ po AGWANGWAMA tumwanɛ butumwa bwa ba azuba nu ugba we ejeshi agwuma Siria, baa kwụnɛ ejeshi Siria hwɛɛ, te ehiu ejeshi ata. Gana ata agwuma ata ji ni Siria ne ezuye. Jitoo ko bee teni ni isume tuwa tu bwa, miaụŋ mu bwa me eyi mu ko mu kwụnɛ bụ no otokwobi.

²²Gana AGWANGWAMA bicinji Hɛzɛkia keeni atwa Jɛrusalɛm ni i'ɛlɛ Sinakɛrib agwuma Siria ta, keeni i'ɛlɛ ya atwa aba i'ime anya. Bee leni maa ga atwa ata nama na amɛ-olom na cɛnjɛ tu na tu hogogonu aŋ hwɛɛ.

²³Atwa gembi ufwugwo zhajɛ nu Jɛrusalɛm, aa 'waŋnanɛ AGWANGWAMA apwaŋ, aa 'waŋnanɛ du Hɛzɛkia agwuma Juda apwaŋ ogwumishi. Te kwuni na aka ata edenji ata hwɛɛ mụnɛ ya Hɛzɛkia ụjɛrụma.

²⁴Na aka ata gɛ Hɛzɛkia leyi nụ ụngwụ, baa vwɛ cwɛŋ maa i shɛ bu 'wi. Baa njɛ adua ibɛ po AGWANGWAMA ndanɛ bụ useyida maa bi zhɛ ba zhɛmanana.

²⁵Okwo ti yaa shɛ gana ata, gɛ Hɛzɛkia njɛ shɛ ugwoje ni iyi nɛ AGWANGWAMA ndanɛ bụ iwɛ tubusa tu bwa o. Ibɛ po AGWANGWAMA njɛ isɛbwɛ nu bwa, nazhɛ atwa Juda, ta atwa Jɛrusalɛm njɛ ụbaụta iwɛ ibɛ.

²⁶Okwo ti yaa shɛ bwonu gɛ Hɛzɛkia jɛshɛrɛjɛ-ahaŋsa nu ukwunanga ibɛ, ta atwa Jɛrusalɛm hwɛɛ, iwɛbɛ po AGWANGWAMA peni shi aŋ ya ulwapɛ na aka ubwa uuwa gɛ Hɛzɛkia to 'wo.

²⁷Gɛ Hɛzɛkia 'yajɛ uduciya tebiye, bụtụ be elele ba muna bụ ụjɛrụma. Bi 'yajɛ shimwono shɛ na ee meni bu maa bu no zwono azhɛnarɛya ubwa, ta azụrụfa, ta atayɛ ogwumishi, ta manɛbɛ mụ ụhiụŋ ụlatụ, ta shabula shu ujasa, keeni i'wɛŋnɛ ibwɛ uhwara hwɛɛ.

²⁸Bi 'yajɛ shimwono shɛ na ee meni bu boo zwono iyimɛyɛ ibwɛ, te meni mụ tụ'walụ ta afwafwa, ta manɛbɛ ma buta, tu nsumo mi inɛ ibwɛ; ti ikepi ya agwụdụ ubwa hwɛɛ.

²⁹Na aba inɛ gɛ, Agwatana peni bu inɛ na agwụdụ tebiye, tu uduciya iyi inyɛ uuwa boo mo ashɛpwụ a'wụtụ a'wụtụ.

³⁰Gɛ Hɛzɛkia, ubwa to ufwunga umɛzhinjɛ Gihon, baa jɛshɛrɛganɛ mu ufwunga maa fwunga ya nu uhwacɛ na teni nu uba Jɛrusalɛm. Iyi elele nɛ gɛ Hɛzɛkia njɛ 'yaganɛ bu eshe.

³¹Okwo aka na te eseci-i'ɛlɛ banɛ na cɛnjɛ tu Babulon aa zhajɛ maa e hweyigeni iwɛ iyi ụrụhwajɛ nɛ njɛ. Agwatana genji Hɛzɛkia maa manga bụ maa kwụba gana na ahaŋsa ubwa shɛ.

³²Iyi inyɛ elele nɛ gɛ Hɛzɛkia ndanjɛ, ta tumama pana tu na bee meme peni AGWANGWAMA, e 'nyeci iŋ hwɛɛ nu utakada shizobu she bigesere ga Ayizaya yɛu Amoz keeni utakada shɛrụkwụkwụ shɛ shɛgwuma shi Juda keeni una Isrɛl.

³³Gɛ Hɛzɛkia 'wi gana eshi ubwa, ee ni bu nu u'uye wa ajalalo Devid na patanɛ ne bikpekwu. Atwa Juda, ta atwa Jɛrusalɛm hwɛɛ peni tu'wo tu bwa ụjɛrụma. Nazhɛ yɛu ibwɛ ga Manasɛ yɛ tugwama no ohwolu ubwa.