Read bassa 2 SHƐRỤKWỤKWỤ SHI YEBI 35 Bible Online

2 SHƐRỤKWỤKWỤ SHI YEBI 35 - bassa bible

2 SHƐRỤKWỤKWỤ SHI YEBI 35

¹Go Josia njɛ Isene Tɛkashɛka nu Jɛrusalɛm maa a mụnɛ AGWANGWAMA ụjɛrụma, te Bihiiŋ namɛ ijitɛ umpwa-ni-bɛneshi, aa kwụnɛ iyimabiga iwɛ ụrụpɛ isene ɛtɛ.

²Bee tileni onongbo nu ugondu wa aba na aa shɛ a nda nu Umwono wa AGWANGWAMA, bee peni aŋ ohwulu tishito maa a njɛ uŋ tebiye.

³Baa tɛtaganɛ Alivai a na shɛ embisegeni atwa Isrɛl kpaaŋ a na kaa du meme tileneni AGWANGWAMA swooŋ unu, bɛɛ hiɛŋ, Sho ma Ikpɛtɛ ɛtɛ tijilo nu Umwono ata wa Agwatana na agwuma Sụlụmụn, yɛu Devid na shɛ agwuma Isrɛl mo la. Hiɛ shɛ shɛ hi na 'waŋna iŋ ya no shitutu shi hiŋ maa hi no rungo ni ibɛ o. Hiɛ shɛ hi na ndana AGWANGWAMA na shɛ Agwatana hiŋ iyi, maa hi na ndana du atwa Isrɛl iyi.

⁴Mama imanjɛ ma maa ga umwamwa umwamwa zhe no ohwolu ugondu wa aba te teni cɛŋ nu gana na ta agwuma Devid keeni yɛu ibwɛ nɛ shɛ agwuma Sụlụmụn 'nyeci la.

⁵Ahiɛba Alivai, momo dwotwogonu ma orubwo orubwo maa hi shikokono no ohwolu ata tijilo te teni cɛŋ nu gana na ta amwamwa atwa hiŋ Isrɛl namanjɛ maa hi no mbiyono aŋ.

⁶Ahiɛba hi zhɛ hia kwụna miaụŋ-ma-agwụdụ mi Isene Tɛkashɛka. Iwɛ ecilo ata zhaga ma maa hi mama njɛ rụmbɛɛ maa hi imanganɛ iyi ụrụpɛ maa tuba atwa vwɛ hiŋ 'wa unu na AGWANGWAMA peni la atwa ubwa tedure no Moses.

⁷Go Josia vwɛ iyimabiga ikɛnyi ibwɛ, agwụdụ, na miaụŋ-ma-agwụdụ, ni iyweywe igbɛɛ-umpwa-ni-bɛ-tɛ (30,000), ni inɛ ye eyi ugbaa-na-akpakwụ-a-ta (3,000) iwɛ atwa elele na namba apata maa o to ụrụpɛ tɛkashɛka.

⁸Anjɛ-ugondu ubwa palajɛ du iyi na tukwulangana, ee peni atwa ata keeni onongbo na Alivai. Nazhɛ anjɛ-ugondu a na untanganɛ Umwono wa Agwatana, aba shɛ ata Hilkia na shɛ uhiu wo onongbo, na Zɛkaria, tu ga Jɛhiɛl peni du onongbo apwaŋ agwụdụ ni iyweywe ugbaa-uko-na-akpakwụ-atatụ (2,600), keeni inɛ ye eyi kpakwụ-ni-dipi-yebi (300), iwɛ ụrụpɛ Isene ɛtɛ Tɛkashɛka.

⁹Go Konania, keeni miaụŋ-mo-bino mu bwa ge Shemaya ne Nitanɛl, medenji Hashabia, ne Jeiyɛl, tu go Jozabad a na shɛ ehiu Alivai. Ɛ vwɛ du agwụdụ, ni iyweywe igbɛɛ-iyebi-na-akpakwụ-a-ta (5,000), keeni inɛ ye eyi akpakwụ-eyebi-ni-dipi-yebi (500), iwɛ ụrụpɛ Isene ɛtɛ Tɛkashɛka.

¹⁰Gana na ta a imaganjɛ iyi elele iwɛ Isene ɛtɛ Tɛkashɛka ee hwuwi hwɛɛ, nazhɛ onongbo shikekeni no ofwo aba, Alivai shikekeni du ne edingbe edingbe aba.

¹¹Aka na aa kwụnɛ agwụdụ ata Isene Tɛkashɛka keeni iyweywe, nazhɛ ee peni onongbo mehieŋ ee zhizhenji mu nu utukwu-ụrụpɛ, Alivai tuba fwụcɛ aŋ.

¹²Nazhɛ oo dwotwogonu iyimabiga ụrụpɛ tuhwoŋzhingo na amwamwa aba, maa o to ụrụpɛ ata gana na ti yee 'nyeci nu Undwa Moses. Gobwonu du aa njɛ ni inɛ ɛtɛ ye eyi.

¹³Onongbo nyeshi usunda ata ụrụpɛ Tɛkashɛka nu ulwa gana na tu undwa ibɛ hiɛŋ. Ee shiteji usunda ụrụpɛ tijilo nu nkwasha, keeni abuta, ta apalụ, ee zhe aa panɛ atwa ata hwɛɛ kakayɛ.

¹⁴Te e hwuwi inɛ ɛtɛ tɛnda, nazhɛ Alivai momo hwoŋsonu una wa aba usunda keeni onongbo a na shɛ umwamwa Aron. Iwɛnɛ po onongbo aba o hwoŋzhingo iyi ụrụpɛ nɛ shɛ oo hwoŋzhingo hwɛɛ, ta manɛbɛ tuhwoŋzhingo, te kwuni nu uvwungwa uuwa gụ ụrụmɛ.

¹⁵Azụnjɛ Alivai a na banɛ nu umwamwa Asaf namɛ du no ohwolu aba gana na ge Devid peni aŋ la unu: aba shɛ ata Asaf, ne Heman, ne Jedutun ata shɛ bụkwụbɛ-bu-uhwaŋna ba agwuma. A'iywa shidubo shu umwono wa Agwatana genji shi u'iywa wa aba o, iwɛnɛ ta Alivai na vwɛ a imangana aŋ tɛkashɛka ta aba.

¹⁶A njɛ iyi elele jita ata iwɛ tɛzhɛba ta AGWANGWAMA, ti Isene ɛtɛ Tɛkashɛka tɛnda, ta arụpɛ tuhwoŋzhingo a na oo to nu utukwu-ụrụpɛ, gana na ta agwuma Josia peni aŋ unu ibɛ.

¹⁷Atwa Isrɛl untanganɛ isene ɛtɛ Tɛkashɛka tɛnda ijitɛ icenje, aa njɛ du ti Isene iyimɛyɛ nɛ Zasa Ifucingɛ.

¹⁸Te kwune na aka bigesere ga Samuɛl, a ga ta njɛ shɛ la ya kwukwuŋ Isene Tɛkashɛka gana ga o. I Zasa kaa agwuma na nduwa la isene gɛ kwukwuŋ gana na agwuma Josia, no onongbo, na Alivai, ta atwa Juda, ta atwa Isrɛl keeni atwa Jɛrusalɛm njɛ iŋ na aka ata o.

¹⁹Ijɛ njɛ na aka na tu go Josia ulwa shiywa umpwa-na-shɛba-shɛ-tụndatụ tu baa yɛ tugwama.

²⁰Na aba na tu go Josia shikecenji iyi elele nu umama 'wanụ nu umwono wa Agwatana, nazhɛ agwuma Ijipti ge Niko zhajɛ maa nda ujasa na Kakɛmish nu Urefu Yufretis. Go Josia ishijɛ maa sukakana bụ.

²¹Ama ge Niko tumwananɛ Josia atumwa, bɛɛ hiɛŋ, Gabụ Agwuma Juda, i zasa iyi elele shɛ inɛɛ bɛ nu ujasa ga Ama jasa o. N zhe shi maa ma nda ujasa na bụ o, ama semi na atwa i'ime mi. Agwatana du kaa n hiɛŋ ga ma shanɛ ikɛnyi nu bwa, iwɛ ecilo ata, ta lakana Agwatana o, shibwonu ubwa zhɛ ma bụ kwụna.

²²Ama go Josia ta mama 'imɛ waa maa nda ujasa nu bwa. Baa lacɛ maa shɛlaga iyi nɛ Agwatana jɛmɛ tedure na agwuma Niko, bee sheyinji i'wɛŋnɛ ibwɛ maa kede e mepi bu o, baa sanɛ maa nda ujasa nu bwa nu udadarɛ Megido.

²³Na aka ata aa nda ujasa ata, ekeri a'inla atwa Ijipti to agwuma Josia i'ilɛ. Nazhɛ bɛɛ hiɛŋ yɛu ibwɛ ugondu, M becinji nu ujasa, a n ngwụcɛnjɛ tebiye!

²⁴Nazhɛ yɛu ibwɛ ugondu becinji bu nu ụhaŋtụ ata ubwa, bee shiyeni bu nu ụhaŋtụ ujasa unya na shɛ du una ubwa. Ee jicinji bu nu Jɛrusalɛm bee 'wi, ee ni bu nu u'uye eshi ubwa. Atwa Juda hwɛɛ, ta atwa Jɛrusalɛm to-ụkwụla iwɛ ubwa.

²⁵Nazhɛ gɛ Jɛrɛmia twanɛ Josia u'wo-ụzhɛla. Yaa shɛ ya iyi uvwovwu wa azụnjɛ ni Isrɛl te etwenyi te eyikwo maa a na zunga azunga ata. Azunga ata namɛ na shɛzunga shu u'wo-ụzhɛla.

²⁶E 'nyeci iyi elele nɛ go Josia ndanjɛ na tugwama tu bwa, ta tumama pana tu na bee meme peni AGWANGWAMA, tu gana na baa njɛ iyi nɛ 'nyeci nu Undwa wa AGWANGWAMA,

²⁷e 'nyeci shɛrụkwụkwụ shi tukwuno tu bwa kpaaŋ tutu ukwunanga ubwa, nu utakada shɛrụkwụkwụ shɛ shɛgwuma shu Juda keeni maa shɛ shɛ Isrɛl.