Read bassa 2 SHƐRỤKWỤKWỤ SHI YEBI 5 Bible Online

2 SHƐRỤKWỤKWỤ SHI YEBI 5 - bassa bible

2 SHƐRỤKWỤKWỤ SHI YEBI 5

¹Aka na tu go Sụlụmụn hwuwi ugondu umwono ata wa Agwatana hwɛɛ, nazhɛ bee zweni i'wɛŋnɛ ye elele nɛ bishi bwa ge Devid tileneni la AGWANGWAMA swooŋ, ta azụrụfa, ta azhɛnarɛya keeni i'wɛŋnɛ nɛ vwɛ hwɛɛ no shimwono shi i'wɛŋnɛ nu umwono ata wa Agwatana.

²Nazhɛ go Sụlụmụn suyanɛ n-nyarɛ mi Isrɛl, ne ehiu alamụ hwɛɛ, ta shɛgwuma shu nhwaŋ me eshi ma atwa Isrɛl maa a ulwa nu Jɛrusalɛm, maa ɛ vwɛ Ikpɛtɛ ɛtɛ Unu-tutwa ya AGWANGWAMA nu Zayon na shɛ Ụshɛpwụ Devid maa e tecinji iŋ nu umwono ata wa Agwatana,

³Atwa Isrɛl ulwa ga hwɛɛ aba na agba agwuma na aka Isene Shidulo nɛ aa nda nu upiana Bicenje.[7]

⁴Aka na tu n-nyarɛ ma ata mi Isrɛl mu ulwa hwɛɛ, nazhɛ Alivai shapɛ Ikpɛtɛ ɛtɛ,

⁵aa shapɛ Ikpɛtɛ ɛtɛ, tu udulo ata u tụ'ụlwatagwụ keeni i'wɛŋni'wɛŋni ɛtɛ tijilo udulo ata hwɛɛ, nazhɛ onongbo na Alivai suje iŋ ee tecinji nu umwono ata wa Agwatana.

⁶Nazhɛ Agwuma Sụlụmụn na atwa Isrɛl hwɛ hwɛɛ a na sotulonu na agba ubwa ulwa no ofwo ata Ikpɛtɛ ɛtɛ namɛ, oo to arụpɛ na agwụdụ keeni iyimabiga nɛ zasa ti'imanga kwo kaa tɛrɛta.

⁷Nazhɛ onongbo shepi Ikpɛtɛ ɛtɛ Unu-tutwa ya AGWANGWAMA ee tecinji iŋ nu umwono ata wa Agwatana. Ee shi iŋ no ofwo ata Tijilo na Hwuri ofwo vwɛ hwɛɛ, tuta ti iyi-uumwa ɛtɛ 'yajɛ apiambɛ.

⁸Iwɛnɛ po iyi-uumwa ɛtɛ berishiji apiambɛ aba, ee urugeni Ikpɛtɛ ɛtɛ keeni imbele ɛtɛ aa 'waŋna iŋ.

⁹Okwo ti imbele ɛtɛ njɛsanjɛ, e eri shi a kwụba iŋ no tupohondo, semi bụtụ na shikeni na amɛ na amɛ ofwo ata Tijilo kiri eri ba kwụba imbele ɛtɛ. I ta namba apata tutu taa hwayɛ

¹⁰I zasa iyi elele nɛ zweni na amɛ Ikpɛtɛ ɛtɛ o, semi atayɛ ata tụpatakwụ patakwụ eyebi go Moses zweni la taa ni Ishɛmɛ Horɛb,[8] aka na ta AGWANGWAMA twa la unu na atwa Isrɛl na aka na ta a banɛ ni Ijipti.

¹¹Aka na to onongbo banɛ no olugwo ata Tijilo, aa mama njɛ shɛshɛshɛ, aa ulwa hwɛɛ aba, a 'wa sụ ya iwɛ urubwo tuswoswoswo na aa bananjɛ o.

¹²Alivai na shɛ azụnjɛ na: ga Asaf, ne Heman ne Jedutun keeni edenji amwamwa aba a na uregeni tugwuno ti ilinɛn tu na aa nɛ tanɛ tanɛ, ee shikekeni nu uwaŋna-banụ utukwu-ụrụpɛ, aa 'wananjɛ apalụ ti'nyama, na shiduma keeni shikoko. Onongbo dipi-yebi-nu-woshi (120) shikekeni na aba oo hwulo akakacɛ.

¹³Azụnjɛ, ne ehwuri akakacɛ, e zweni zhiaaŋ, ne e'nyemi apalụ keeni i'nyemi 'nyemi vwɛ na ashɛtwa na aa shɛtana AGWANGWAMA na azunga, ɛɛ hiɛŋ; Shɛtana ma AGWANGWAMA, iwɛnɛ po ubwa zhɛmɛ, tulubo tu bwa kaa tɛ shɛ unyizo-nom. Nazhɛ udomu shini Umwono ata wa AGWANGWAMA.

¹⁴Iwɛbɛ po onongbo eri shi o shikono ya maa o to tuhwulo ta tɛzhɛba, iwɛnɛ tụ ụjɛrụma wa AGWANGWAMA shini ya Umwono ata wa Agwatana.