Read bassa 2 SHƐRỤKWỤKWỤ SHI YEBI 8 Bible Online

2 SHƐRỤKWỤKWỤ SHI YEBI 8 - bassa bible

2 SHƐRỤKWỤKWỤ SHI YEBI 8

¹Shiywa woshi go Sụlụmụn mo Umwono ata wa AGWANGWAMA ti ihwɛ ibwɛ nazhɛ bee hwuwi.

²Go Sụlụmụn meeneni du ashɛpwụ a'wụtụ a'wụtụ a na agwuma Hiram[10] peni bu, nazhɛ baa gɛgacanjɛ atwa Isrɛl na aba.

³Go Sụlụmụn zhe bee lesheji cɛnjɛ tu Hamat-zoba.

⁴Boo mo Tadmo na namɛ nụ ụshɛka. Bee meeneni ashɛpwụ a'wụtụ a na namɛ nu Hamat maa a shɛ ashashɛ na ɛɛ zhɛ no sutono i'wɛŋnɛ ye elele.

⁵Go Sụlụmụn du meeneni ashɛpwụ na ɛɛ hiɛŋ, Bɛt-horon na namɛ ni Ishɛmɛ keeni Bɛt-horon na namɛ nu ugodo, boo mo du uba ata 'yajɛ ikɛnyi, baa ndanɛ uŋ shidubo keeni imbele tukapa,

⁶tụ ụshɛpwụ ata ɛɛ hiɛŋ, Bealat keeni ashɛpwụ a'wụtụ na boo sutongono iyi elele nɛ aa lashajɛ, ta ashɛpwụ a'wụtụ a na bee tileni idɛkwɛ ibwɛ keeni ihɛŋtu ibwɛ ujasa. Bee mengeni tuma te elele tu na baa imanganjɛ maa ma nu Jɛrusalɛm, ti Lebanon keeni ofwo elele na cɛnjɛ tu bwa ti teje nu gana elele na baa jala.

⁷Atwa elele na ta vwɛ na ashashɛ Ekenan, nɛ Ɛhit, na A'amon, nɛ Ɛpɛrɛz, nɛ Ɛhiv keeni Ɛjɛbus hwɛɛ aba shɛ shɛ atwa Isrɛl o.

⁸Aba shɛ ajalalo anya denji ata wa atwa Isrɛl kwụnɛ shɛ la, na aka na te e leshiji cɛnjɛ ta ata. Aba go Sụlụmụn zweni nu ugondu tijama tɛnda, a ta nda tu ba tutu taa hwayɛ.

⁹Ama go Sụlụmụ zweni shi atwa Isrɛl nu ugondu ubwa u tijama o, ama aba tuba shɛ ejeshi, na atwa na untanganganɛ shihwolu, ne eberezhe ejeshi, na asụcɛ ihɛŋtu ujasa, keeni asụcɛ idɛkwɛ.

¹⁰Aba shɛ ehiu atwa shihwolu Sụlụmụn atwa kpakwụ-nu-dupu (250), aba shɛ atwa na o hikokono ugondu na atwa ata a nda no ofwo swoswoswo.

¹¹Go Sụlụmụn bɛcinjɛ biyikwo ata ubwa ɛ shɛ yɛu ya agwuma Ijipti nụ ụshɛpwụ ata wa agwuma Devid, bee tecinji bu nu umwono na bee meni bu. Bɛɛ hiɛŋ, Bɛ shɛ shɛ ba nama ni ihwɛ Devid na shɛ agwuma Isrɛl o, iwɛnɛ to ofwo elele na Ikpɛtɛ Unu-tutwa namɛ la, a shɛ ofwo tijilo na hwuri ofwo vwɛ kpaaŋ.

¹²Go Sụlụmụn peni AGWANGWAMA ụrụpɛ tuhwoŋzhingo nu utukwu-ụrụpɛ ata boo mo nu umbe angba umwono ata wa AGWANGWAMA.

¹³Bu to arụpɛ ata gana na tu Undwa Moses jɛmɛ, iwɛ ụjita we elele: ibɛ shɛ iwɛ Ụjita-ụhinjanụ, ni Isene Upiana Ufwo, keeni iwɛ nsono mu tatụ mu na aa nda uywa uywa. Ibɛ shɛ Isene Iyimɛyɛ nɛ zasa Ifucingɛ, ni Isene ya Alade, ni Isene Shidulo.

¹⁴Baa imanganjɛ onongbo, na Alivai, nu gana na te bishi bwa ge Devid shileji la undwa ibɛ. Ugondu wa aba ụ shɛ maa o no mbiyono onongbo, ta shɛzunga keeni ugondu wa aba na aa shɛ a na nda iyi-heri. Bee tilegeni du a'iywa shidubo no orubwo swoswoswo, gana na ti ge Devid bụtụ ata ba Agwatana peni aŋ la unu ibɛ.

¹⁵Onongbo, na Alivai, na a'iywa shidubo shu umwono wa Agwatana untanganɛ unu we elele na ge Devid peni aŋ la iwɛ shimwono sha ata oo zwono i'wɛŋnɛ keeni iwɛ iyi inyɛ.

¹⁶Aka ga ibɛ go Sụlụmụn kwunanjɛ ya ugondu ubwa hwɛɛ, te kwuni nu ukoshilo Umwono wa AGWANGWAMA tishilo uuwa i ci tukwunanga tu bwa. Ugondu ubwa kaa 'yaganɛ bu eshe kpaaŋ.

¹⁷Go Sụlụmụn zhe Ɛzion-gɛbɛ keeni Elat[11] na namɛ nụ ụpalanụ itekwu ɛtɛ namɛ na cɛnjɛ ti Idụm.

¹⁸Nazhɛ agwuma Hiram tumwananɛ bụ ihɛŋtu tinyakpa nyakpa tedure nu uhiu wa anjɛ-ugondu ubwa, eheŋteni a na nyiwoŋnowuŋ ni itekwu, aba haŋtanɛ iŋ. E heŋteni iŋ na anjɛ-ugondu Sụlụnụn, ee zhe Ofi, ee sugeni Sụlụmụn azhɛnarɛya akpakwụ-eyebi-nu-dupu (450).