Read bassa EZRA 10 Bible Online

EZRA 10 - bassa bible

EZRA 10

¹Aka na ti ge Ezra ba nda adua, boo lono-unu iwɛwɛ, baa twa-u'wo, baa mama pagana na cɛnjɛ nu umbe umwono wa Agwatana. Unyama wa atwa Isrɛl ụ'wụtụ 'wụtụ, te etwenyi, te eyikwo ta miaụŋ, ulwa oo rungwutwonu bu. Aba du a twa-u'wo gboo.

²Nazhɛ gɛ Shɛkania yɛu Jɛhiɛl, bụtụ bu ko na amɛ miaụŋ mi Ilam, jishijɛ, bɛɛ hiɛŋ Ezra, Ti pindeni Agwatana tu, eti zeni eyikwo atwa cɛnjɛ ti nya a na tu rungwutwonu. Ama okwo ti yaa shɛ bwonu, ashɛlatụ kaa ta nambana atwa Isrɛl.

³Hwuwayɛ go, lono maa ta twa-unu na Agwatana tu, maa ta 'waŋ eyikwo ata hwɛɛ, ta miaụŋ ma aba, ti zhɛ ta nda gana na ti iyɛri mi keeni atwa na a muna unu-tupana wa Agwatana tu ụjɛrụma iti mbishi. Lono maa ta nda iŋ te teni cɛŋ nu undwa wa Agwatana.

⁴Ishijɛ; iwɛnɛ po iwɛ gɛ i shɛ iwɛ bụ, ti zhɛ kaa ta nama na bụ, ima-isɛbwɛ maa njɛ iŋ.

⁵Nazhɛ ge Ezra ishijɛ, bee eni ehiu onongbo, na a na Alivai keeni atwa ata hwɛɛ unu-tishilo maa aba zhɛ a nda gana na ti gɛ Shɛkania shileni aŋ iwɛ ɛtɛ. Ee shiri ga unu ata.

⁶Nazhɛ ge Ezra ishijɛ nu umbe umwono wa Agwatana, bee teni taa na amɛ umwono Jɛhohanan yɛu Ɛliashib. Aka na tu baa namɛ apata, bɛ yɛ shɛ iyimɛyɛ, bu swe shi meni o, iwɛnɛ tu baa ta ta-ụkwụla iwɛ tipindo ta atwa ti'ima.

⁷Ee enengeni atwa ti'ima elele a na namɛ nu Juda keeni Jɛrusalɛm hwɛɛ maa go sotulonu nu Jɛrusalɛm.

⁸Ɛ hiɛŋ, Bụtụ be elele na zhe shi na amɛ ijitɛ gɛ itɛtu, ɛ zhɛ a lashɛga i'wɛŋnɛ ibwɛ hwɛɛ, ɛɛ zhɛ a gɛgɛcɛnga bụ swooŋ no tusotulonu ta atwa ti'ima, nu gana na ta atwa shihwolu nu n-nyarɛ jɛmɛ.

⁹Na amɛ ijitɛ ɛtɛ itɛtu, ibɛ atwa Juda keeni Bɛnjamin ụlwatagwụ nu Jɛrusalɛm hwɛɛ, nu ukpekiti umwono wa Agwatana, nụ ụjita woshi ne Bicinjishi.[10] Ibɛ po atwa ata a zhɛgɛdaga hwɛɛ aba iwɛ iwɛ gɛ, keeni iwɛ eshilo a'wụtụ na o ngbo.

¹⁰Ge Ezra na shɛ bunongbo ata ishijɛ bee shikeni, bɛɛ hiɛŋ aŋ, Hiɛ shɛ shɛ atwa tɛcara o, iwɛnɛ ehi zeni eyikwo cɛnjɛ ti nya, maa hi keeni tụwụma ti Isrɛl ugombo.

¹¹Hwuwayɛ go, hiɛ shɛ hio lono-unu iwɛwɛ hiŋ pa AGWANGWAMA na shɛ Agwatana eshi hiŋ, maa hiɛ njɛ ukwulana ubwa. Momo bogwu ma na atwa cɛnjɛ tu ga keeni eyikwo cɛnjɛ ta aba du.

¹²Nazhɛ atwa ata sotulonu apata, jishijɛ na rụhwụŋ rụ 'wụtụ hwɛɛ aba, ɛɛ hiɛŋ, Bi teni cɛŋ, i shɛ tilɛɛ maa ta nda gana na abɛ jɛmɛ.

¹³Ɛɛ hiɛŋ sasana, Ama atwa ga kaa gembi ofwugwo, eshilo kaa o ngbo duwa, ti eri shi kaa to shikono nu ukpogwu o. Iwɛ gɛ kaa eri shi yo hwuwowu jitoo ko kwo kaa ijitɛ eyebi o, iwɛnɛ ti i'ɛlɛ ya atwa ofwugwo namɛ ni iwɛwɛ gɛ.

¹⁴Ga atwa tu shihwolu gɛga nu Jɛrusalɛm maa a untangana iwɛ gɛ. Lono tuba maa bụtụ be elele na 'yajɛ biyikwo ba cɛnjɛ tu ga zhajɛ na aka na ee jwe, maa a zhagajɛ nu n-nyarɛ keeni ajɛmɛ-ụshɛrɛya ụshɛpwụ ubwa. Nu uhwaŋna ga kiri isɛbwɛ ya Agwatana i movwo nɛ ge tu ubi iwɛ iwɛ gɛ zhɛ ya pashɛngwa no tu.

¹⁵Semi go Jonatan yɛu Asahɛl keeni Jazeiya yɛu Tikva kiri lacɛ iwɛ ɛtɛ. Ibɛ po gɛ Mɛshulam keeni Shabɛtai Bulivai ata leni aŋ du.

¹⁶Ama atwa ti'ima a na jiye leni iwɛ ɛtɛ. Ge Ezra bunongbo ata teri atwa na shɛ shɛgwuma shu nhwaŋ na alamụ aba, ee 'nyeci nzeci ma aba hwɛɛ. Ee kwuni iwɛ ɛtɛ tudwalakaka nụ ụjita uhiiŋ na Bu'umpwa.[11]

¹⁷Ti yaa namɛ ipiɛnɛ itɛtu, ee hwuwi tudwalakaka ta atwa elele na ge zeni la eyikwo cɛnjɛ ta ata.

¹⁸Nzeci ma atwa na shɛ amwamwa onongbo a na zeni eyikwo ata na: Nu umwamwa Jɛshua yɛu Jozadak keeni miaụŋ-mo-bino bwa, a shɛ ge Measaiya, nɛ Ɛliezɛ, na Jarib keeni Gɛdalia.

¹⁹Atwa ata shiri-unu hwɛɛ aba maa ɛ zhɛ a 'waŋ eyikwo ata, ibɛ po bụtụ bụtụ peni udagba iwɛ ụrụpɛ tụwụma tu bwa.

²⁰Nu umwamwa Imɛ, i shɛ ga Hanani, nɛ Zɛbadia.

²¹Nu umwamwa Harim, i shɛ ge Measaiya, nɛ Elaija, nɛ Shɛmaya, nɛ Jɛhiɛl keeni Uzia.

²²Nu umwamwa Pashu, i shɛ gɛ Ɛlioyenai, ne Measaiya, ne Ishmɛl, nɛ Nɛtanɛl, no Jozabad keeni Ilasa.

²³Na ashashɛ Alivai, i shɛ go Jozabad, ne Shimei, nɛ Kɛlaya (ubwa gatata shɛ ge Kelita), nɛ Pɛtahia, no Juda, nɛ Ɛliezɛ.

²⁴Azụnjɛ, i shɛ gɛ Ɛliashib. A'iywa odubo uba, i shɛ ga Shalum, nɛ Tɛlɛm keeni Uri.

²⁵Na ashashɛ atwa vwɛ Isrɛl: Nu umwamwa Parosh, i shɛ ga Ramia, ne Izia, na Malkija, ne Mijamin, nɛ Ɛliaza, na Malkija keeni Bɛnaya.

²⁶Nu umwamwa Ilam, i shɛ ga Matania, nɛ Zɛkaria nɛ Jɛhiɛl, na Abdi, nɛ Jɛrɛmot keeni Elaija.

²⁷Nu umwamwa Zatu, i shɛ gɛ Ɛlioyenai, nɛ Ɛliashib, na Matania, nɛ Jɛrɛmot, na Zabad keeni Aziza.

²⁸Nu umwamwa Bebai, i shɛ gɛ Jɛhohanan, na Hanania, na Zabdai keeni Atlai.

²⁹Nu umwamwa Benai, i shɛ gɛ Mɛshulam, na Maluk, na Adaya, na Jashub, ne Shial keeni Jɛrɛmot.

³⁰Nu umwamwa Pahat-moab, i shɛ ga Adna, ne Cilal, nɛ Bɛnaya, ne Measaiya, na Matania, nɛ Bɛzalɛl, ne Binui keeni Manasɛ.

³¹Nu umwamwa Harim, i shɛ gɛ Ɛliezɛ, ne Ishija, na Malkija ne Shɛmaya, ne Shimion,

³²nɛ Bɛnjamin, na Maluk keeni Shɛmaria.

³³Nu umwamwa Hashum, i shɛ ga Matanai, na Matata, na Zabad, ne Elifɛlɛt, nɛ Jɛremai, na Manasɛ keeni Shimei.

³⁴Nu umwamwa Bani, i shɛ ge Meadai, na Amram, no Uyɛl,

³⁵nɛ Bɛnaya, nɛ Bɛdɛiya, nɛ Cɛluhi,

³⁶na Vania, nɛ Mɛrɛmot, nɛ Ɛliashib,

³⁷na Matania, na Matenai keeni Jeasu.

³⁸Nu umwamwa Binui, i shɛ ge Shimei,

³⁹nɛ Shɛlɛmia, na Natan, na Adaya,

⁴⁰na Maknadebai, na Shashai, na Sharai,

⁴¹na Azarɛl, nɛ Shɛlɛmia, ne Shemaria,

⁴²na Shalum, na Amaria keeni Josɛf.

⁴³Nu umwamwa Nebo, i shɛ gɛ Jɛiyɛl, na Matitia, na Zabad, ne Zebina, na Jadai, no Joel, nɛ Bɛnaya.

⁴⁴Atwa ga hwɛɛ aba, zeni eyikwo cɛnjɛ ta ata. Emeseyi ono oko kaa meci miaụŋ na aba, ama a 'wɛŋ aŋ kaa ta miaụŋ ma ata.[12]