Read bassa EZRA 3 Bible Online

EZRA 3 - bassa bible

EZRA 3

¹Nu upiana Bicenje,[1] bɛ atwa Isrɛl hwɛɛ gɛgajɛ na ashɛpwụ aba, oo sotulonu nu Jɛrusalɛm hwɛɛ aba gana maa bụtụ mokondo.

²Ibɛ po gɛ Jɛshua yɛu Jozadak na anya ubwa a na shɛ onongbo keeni Zɛrubabɛl yɛu Shɛaltiɛl na atwa umwamwa ubwa ishijɛ ee meeneni utukwu-ụrụpɛ wa Agwatana Isrɛl, maa a na ta arụpɛ tuhwoŋzhingo nu bwa, gana na ti yee 'nyeci nu undwa Moses bụtụ ata ba Agwatana.

³Okwo ti yaa shɛ gana ata, atwa ata ti'ima a na jiye a nda inyɛsɛ ya atwa na jɛjɛ na cɛnjɛ ta ata. Ibɛ po ee meeneni utukwu-ụrụpɛ nu uluji ubwa ụngwụshɛ. Nazhɛ ee kwuneneni arụpɛ aba uvwungwa keeni a na ụrụmɛ tuhwoŋzhingo nu bwa.

⁴A untanganɛ isene shidulo tɛnda gana na ti yee 'nyeci, aa pana arụpɛ tuhwoŋzhingo ụjijita gana na tu ofwugwo wo okpogo ibɛ namɛ te teni cɛŋ gana na maa a njɛ jita ata.

⁵Na aba inɛ ɛtɛ a ta arụpɛ aba tuhwoŋzhingo ɛgbɛ ɛgbɛ, ta arụpɛ upiana ufwo, keeni arụpɛ isene ya AGWANGWAMA ye elele inɛɛ nɛ ee shiri aka ibɛ, keeni apwaŋ u tukwulangana elele na ee sugeni AGWANGWAMA.

⁶Te kwuni nụ ụjita uhiiŋ nu upiana Bicenje, ee kwuni AGWANGWAMA arụpɛ tuhwoŋzhingo tụpana, ama e te shiri shi kaa ukoshilo umwono ata wa AGWANGWAMA o.

⁷E peni omo tuma keeni eshebi i'wɛ'wɛ ukwuribi; ee peni atwa Saidụn keeni atwa Taya iyimɛyɛ keeni iyi tuswa keeni manɛbɛ iwɛ maa e suje i'wɛ'wɛ yo osobu maa i banɛ ni Lɛbanon nụ ụpalanụ itekwu maa a zhajɛ nu Jopa, nu gana na ga Sairos agwuma Pɛsia peni aŋ ụhwada.

⁸Na aba na te e ci umwono wa Agwatana na namɛ nu Jɛrusalɛm ne Biyebi[2] nu uywa uyebi, gɛ Zɛrubabɛl yɛu Shɛaltiɛl, ne Jɛshua yɛu Jozadak keeni miaụŋ-mo-bino ma aba mu vwɛ a na shɛ onongbo keeni Alivai keeni atwa elele na banɛ na ti'ima a na jiye nu Jɛrusalɛm, kwuni ugondu tɛnda. Ee teri Alivai a na shiywa sha aba shi tuwo woshi i zhɛ geri-be-eshe maa a na ngbaraka tuma ta ata tu umwono wa AGWANGWAMA.

⁹Gɛ Jɛshua na miaụŋ mu bwa me eyi na miaụŋ-mo-bino bwa keeni Kadmiɛl na miaụŋ mu bwa me eyi (aba shɛ umwamwa Hodavia)[3] keeni miaụŋ mi Hɛnadad na miaụŋ ma aba me eyi na miaụŋ-mo-bino ma aba hwɛɛ, aba shɛ Alivai, oo togwu na tungbaraka ta anjɛ-ugondu umwono wa Agwatana.

¹⁰Aka na to omo tuma shiri ukoshilo umwono ata wa AGWANGWAMA, nazhɛ onongbo hwuŋtengeni n-nduka ma aba, ee suji akakacɛ aba, ta Alivai a na shɛ miaụŋ-me-eyi mu Asaf suji apalụ aba ashɛmbɛrɛ ti'nyama. Ee zhe no ofwo aba maa a shɛtana AGWANGWAMA, gana na ti ge Devid agwuma Isrɛl sekekeni aŋ la.

¹¹Aa shɛtanɛ AGWANGWAMA na azunga, ɛɛ hiɛŋ, AGWANGWAMA zhɛmɛ, tulubo tu na bee lubi atwa Isrɛl kaa tɛ shɛ unyizo-nom. Nazhɛ atwa ata hwɛɛ keleni AGWANGWAMA n'ungwa ma ashɛtwa, iwɛnɛ te e shiri ukoshilo umwono wa AGWANGWAMA.

¹²Ama okwo ta atwa vwɛ a kala n'ungwa mu unyasa, onongbo ofwugwo, na Alivai keeni shɛgwuma shu nhwaŋ a na shɛ n-nyarɛ a na kaa kwụbɛ la umwono wa Agwatana una ala u cala, ee tileni nu u'wo gboo.

¹³I zasa bụtụ be elele na eri ba mapa ya tuswoswoswo tu n'ungwa mu unyasa keeni n'ungwa mu u'wo, iwɛnɛ ta atwamwa a nda rundu rụ 'wụtụ. Ibɛ po aa hwụjɛ rundu ru n'ungwa ma aba taa dụlụ.