Read bassa EZRA 5 Bible Online

EZRA 5 - bassa bible

EZRA 5

¹Na aka ata, ga Hagai na Zɛkaria,[5] a na shɛ egesere, a na shɛ miaụŋ mi Ido, jɛmɛ tigesere no ofwo Eju a na namɛ nu Juda keeni Jɛrusalɛm ni izeci ya Agwatana Isrɛl, na untanganɛ aŋ.

²Aka na ti gɛ Zɛrubabɛl yɛu Shɛaltiɛl ne Jɛshua yɛu Jozadak hwụjɛ i'enenji ya aba, ee kwuni umwono wa Agwatana na namɛ nu Jɛrusalɛm tumaanana. Egesere ata Agwatana eyebi kaa namɛ na aba oo mbiyono aŋ.

³Na aka ata gbaa, ga Tatenai ugwomina ụzalụ bu Yufretis, ne Shitabozɛnai keeni anya aba a na namɛ no shihwolu, zhajɛ nu Jɛrusalɛm, ee heŋteni aŋ, ɛɛ hiɛŋ, Gaaba ihi peni ụhwada maa hi meeneni umwono ga wa Agwatana maa hi sotulongonu sasana tuma tu gaa?

⁴Ee heŋteni aŋ sasana iwɛ nzeci ma atwa elele na o mbiyono aŋ umwono ata tuma.

⁵Ama Agwatana ngbaracɛ n-nyarɛ me Eju, iwɛbɛ po ee ngwuricinji shi aŋ uuwa i ci aka na tu unabarɛ ibɛ ci Darius tutu i ci aka na tu baa 'nyatanɛ aŋ iyi nɛ shɛ ajɛshɛgwa ubwa.

⁶N-ndumwa mu utakada ata ga Tatenai na shɛ ugwomina cɛnjɛ tụ ụzalụ bu Yufretis, ne Shitabozɛnai keeni anya aba na namɛ no shihwolu tumwananɛ agwuma Darius na.

⁷N-dumwa mu na aa jɛmɛ nu utakada ata mi hiɛŋ, No ofwo agwuma Darius, ta bụ 'walụ tebiye.

⁸Ga agwuma mepi maa ti zhe nu ukpeleshi cɛnjɛ tu Juda, no ofwo umwono ata wa Agwatana a'wụtụ. Atwa ata a ma uŋ ba na atayɛ a'wụtụ a'wụtụ, oo shikwocwongwo kaa ezhibi nu uba ubwa. A 'imɛ ugondu ata u'ala tebiye, waa ta kaa tuhwulo tebiye tebiye.

⁹Eti heŋteni n-nyarɛ ma aba, ɛti hiɛŋ, Gaaba ihi peni ụhwada maa hi meeneni umwono ga wa Agwatana maa hi sotulonu tuma tu bwaa?

¹⁰Ti heŋteni aŋ du iwɛ nzeci ma aba, iwɛ maa ta bụ 'nyatanɛ maa to bu mbiso tu nzeci ma aba.

¹¹Gana na ɛɛ ti jishijɛ na, ɛ hiɛŋ, Tɛ shɛ miaụŋ-mu-ugondu ma Agwatana azuba keeni cɛnjɛ tu unyizo, Ta maanana umwono ga agwuma ata a'wụtụ Isrɛl mowoŋ la cala, bee hwuwi na shiywa shu ofwugwo shɛ na shi koshikwo.

¹²Ama iwɛnɛ te eshi tu njɛ maa ga Agwatana azuba 'yaga isɛbwɛ na aba, ibɛ po bee zweni aŋ ni i'ɛlɛ Nɛbukadnɛza agwuma Babulon, Bukaldia ata. Ibɛ po agwuma ata njɛ la umwono ga ufwu, baa 'imɛ atwa ata bee hwuri Babulon.

¹³Okwo ti yaa shɛ bwonu nu uywa uhiiŋ na ti ga Sairos yɛ tugwama tu Babulon, nazhɛ agwuma Sairos iti peni ụhwada maa e meeneni umwono ga wa Agwatana.

¹⁴Okwo iyi uhwugwa ya azhɛnarɛya keeni inɛ ya azụrụfa umwono ga wa Agwatana, nɛ ge Nɛbukadnɛza becinji la nu umwono ga wa Agwatana na namɛ nu Jɛrusalɛm, bee suji bee zweni la ni isume tuwa tu bwa nu Babulon, ibɛ gɛnɛnɛ ga Sairos agwuma bɛcinjɛ ni isume ɛtɛ Babulon bee utegeni bụtụ ata ɛɛ hiɛŋ izeci ibwɛ ge Sheshbaza, ata bee teri maa sha ugwomina Juda.

¹⁵Ibɛ po agwuma mbishi bu, bɛɛ hiɛŋ, Sugo i'wɛŋnɛ ɛtɛ maa gwuricinji iŋ nu umwono ata wa Agwatana namɛ nu Jɛrusalɛm, ge e meeneni umwono ata wa Agwatana nu uluji ubwa.

¹⁶Ge Sheshbaza ata, ubwa zhajɛ bee shileji okoshilo umwono wa Agwatana na namɛ nu Jɛrusalɛm. Te kwuni na aka ata uuwa i ci aka ga ata ma uŋ, u to hwuwowu su kaa tuma o.

¹⁷Yaa shɛ yaa zhɛmanɛ agwuma, asha ge e dwelekeci iwɛ ibɛ nu umwono i'wɛŋnɛ ya agwuma na namɛ nu Babulon, maa a kwụbɛ okwo gabata ga yaa shɛ, maa agwuma Sairos ubwa shiri ụhwada maa ge meeneni umwono ga wa Agwatana na namɛ nu Jɛrusalɛm. Ga agwuma tuba utu tumwananɛ iyi nɛ shɛ ukwulana ubwa ni iwɛ ɛtɛ.