Read bassa EZRA 7 Bible Online

EZRA 7 - bassa bible

EZRA 7

¹Na aba na ti ijɛ kpaaŋ keshici, na aka na tu ga Atɛzɛksis yɛ tugwama ti Pɛsia. Ge Ezra dwelekeci ụlamụ we eshi ubwa uuwa i ci Aron na shɛ uhiu wo onongbo. Ge Ezra yɛu Sɛraya, bụjalụ Azaria, bujalalo Hilkia,

²na shɛ binyabɛshɛ Shalum, keeni ushishi wo ogwunukwoshi ubwa: ga Zadok, na Ahitub,

³na Amaria, na Azaria, nɛ Mɛraiyot,

⁴nɛ Zɛrahia, no Uzi, no Buki,

⁵na Abishua, ne Finihas, nɛ Ɛleaza, keeni Aron uhiu wo onongbo.

⁶Ge Ezra ga banɛ nu Babulon. Bɛ shɛ bi'nyeci na kaa shɛ bugwoni na tumapa tu undwa na AGWANGWAMA na shɛ Agwatana Isrɛl peni Moses. Iwɛnɛ po AGWANGWAMA na shɛ Agwatana, ubwa namɛ nu bwa, ibɛ po agwuma peni bu iyi elele nɛ baa lụpɛ.

⁷Tu ga Atɛzɛksis yɛ tugwama, yaa namɛ shiywa shi cenje nazhɛ ge Ezra banɛ nu Babulon bee munji Jɛrusalɛm, ne emeseyi atwa Isrɛl oko, no onongbo, na Alivai, na azụnjɛ, na a'iywa odubo uba, keeni anjɛ-ugondu na amɛ umwono wa Agwatana.

⁸Nu uywa ata ucenje na ta agwuma yɛ tugwama, ɛɛ ishijɛ tahaŋnụ ta aba, aa banɛ nu Babulon nụ ụjita uhiiŋ ne Bihiiŋ.

⁹Ee ci Jɛrusalɛm nụ ụjita uhiiŋ na Butana[6] iwɛnɛ to tulubo-ti-biye ta Agwatana ubwa tu namɛ nu bwa.

¹⁰Ge Ezra meme shiri swooŋ maa soso undwa wa AGWANGWAMA, maa du bu na nda uŋ, keeni maa bu no mbisogono atwa Isrɛl shikpogo shɛ bwa keeni unu-tɛtɛtagana na namɛ nu bwa hwɛɛ.

¹¹Tuzwogo tu utakada ata agwuma Atɛzɛksis 'nyeteni Ezra bunongbo, na shɛ bi'nyeci na kaa shɛ bugwoni na tumapa tu undwa keeni unu-tupana na AGWANGWAMA peni atwa Isrɛl na:

¹²Utakada ga banɛ no olugwo Atɛzɛksis na shɛ agwuma shɛgwuma, Zhaga no ofwo Ezra bunongbo, na shɛ bimbisegeni bu undwa wa Agwatana azuba: Ma bụ 'walụ duwa.

¹³Hwuwayɛ go, Ma pana unu-tɛtɛtagana ga maa bụtụ bi Isrɛl be elele na namɛ na cɛnjɛ-ta-tugwama ti mi, medenji onongbo keeni Alivai a na ya kwụlanɛ maa e munji e zhe Jɛrusalɛm, ga atwa ata zhe na bụ.

¹⁴Gamba keeni ajɛmɛ-ushaura mi ecenje, tụ bụ tumwanɛ maa hweyigeni okwo a hwuga ba unu undwa wa Agwatana bụ nu Jɛrusalɛm keeni Juda tebiye gana na zhɛ ma bụ tatụlanụ.

¹⁵Bɛ shɛ ba 'waŋna du apwaŋ u tukwulana azhɛnarɛya keeni azụrụfa anaa na agwuma keeni ajɛmɛ-ushaura ubwa peni Agwatana Isrɛl, ubwa na ofwo ubwa u tunama a shɛ nu Jɛrusalɛm.

¹⁶Bɛ shɛ du ba 'waŋna azụrụfa keeni azhɛnarɛya elele na ebi leshiji nu ukpeleshi cɛnjɛ tu Babulon hwɛɛ keeni apwaŋ u tukwulangana a na atwa Isrɛl keeni onongbo aba shiri-unu ee peni iwɛ umwono wa Agwatana aba na namɛ nu Jɛrusalɛm.

¹⁷Sugo ukwuribi ata maa so inɛ ye eyi, na adagba, na agwụdụ, no mihiuŋ mụ ụrụpɛ tiya keeni meni mụ tụ'walụ ta afwafwa mụ ụrụpɛ tuswa maa peni ụrụpɛ nu utukwu-ụrụpɛ umwono wa Agwatana hiŋ na namɛ nu Jɛrusalɛm.

¹⁸Gabụ na atwa vwɛ bụ a na shɛ Eju, nda ma uhwara we elele na teni cɛŋ ne eshe hiŋ na azụrụfa keeni azhɛnarɛya ata vwɛ, nu gana na kwụlanɛ Agwatana hiŋ.

¹⁹Sugo iyi uhwugwa ye elele nɛ ee bi peni iwɛ ugondu umwono ata wa Agwatana bụ, maa tileni iŋ nu umbe Agwatana bụ na namɛ nu Jɛrusalɛm.

²⁰Iyi elele nɛ to bu to ukekeshi iwɛ umwono wa Agwatana, bi eri bɛ bwɛ iŋ nu umwono uduciya wa agwuma.

²¹Gamba Agwuma ga Atɛzɛksis, m pwonuo angbaracɛ ukwuribi we elele na namɛ nu ukpeleshi cɛnjɛ tu Yufretis unu maa, Iyi elele nɛ ge Ezra na shɛ bunongbo, na shɛ du bi'nyeci bu undwa wa Agwatana azuba, ba jala no olugwo hiŋ, pana bu ma na tɛzhɛgɛdana,

²²tutu azụrụfa azhɛka dipi-yebi (100), no nkwuronu mi iyimɛyɛ izɛgwu wit dipi-yebi, nu nhilwo mu meni mụ tụ'walụ ta afwafwa dipi-yebi, keeni agaruwa manɛbɛ ma buta dipi-yebi keeni manɛ mu na mu zasa tɛrɛta.

²³Iyi elele nɛ Agwatana azuba peni-unu ibɛ, ga a njɛ iŋ ta ulwa iwɛ umwono ata ubwa. Shibwonu isɛbwɛ ibwɛ zhɛ ya sukakana atwa cɛnjɛ tu ga, ta agwuma keeni miaụŋ mu bwa.

²⁴Hiɛ shɛ du hia mapa maa hi zasa ụhwada maa hi na lashɛga ukwuribi ụdalụ, nu una cɛnjɛ keeni una ụhwada ni i'ɛlɛ yo onongbo, na Alivai, na azụnjɛ, na a'iywa odubo uba, na anjɛ-ugondu umwono wa Agwatana, kwo kaa anjɛ-ugondu anya nu umwono ata wa Agwatana o.

²⁵Gabụ ge Ezra, na nda uhwara na ti'inta tu na Agwatana bụ ibi peni, maa teri atwa shihwolu keeni ajɛmɛ-ụshɛrɛya a na mepi undwa wa Agwatana iwɛ maa a na duma ụshɛrɛya wa atwa elele na namɛ nu ukpeleshi cɛnjɛ tu Yufretis. Bụtụ be elele na mepi shi undwa ata, hiɛ shɛ hio mbisogono bu tilɛɛ.

²⁶Bụtụ be elele na kaa hwụjɛ shɛ unu wa andwa Agwatana bụ, keeni unu wa andwa agwuma, ge peni bụtụ ata ulwapɛ, no tu'wo, okwo no tu'umpo maa bana na cɛnjɛ ta ata, okwo i'wɛŋnɛ ibwɛ tusugo, kwo kaa tukapa nu umwono-tishi.

²⁷Ge Ezra hiɛŋ, Ga ashɛtwa shɛ a na AGWANGWAMA na shɛ Agwatana eshi tu! Ubwa shiyeni tukwulana na amɛ agwuma maa muna umwono wa AGWANGWAMA na namɛ nu Jɛrusalɛm ụjɛrụma nu uhwaŋna gana ga.

²⁸Ubwa njɛ maa ge iwe mi kwụlanɛ agwuma, ta ajɛmɛ-ushaura ubwa keeni atwa ubwa shihwolu shụ 'wụtụ 'wụtụ elele. Iwɛnɛ po uwebiye ya AGWANGWAMA na shɛ Agwatana mi namɛ ne mi, ibɛ po Ngaa 'yajɛ ikɛnyi, Ngoo sotulonu ehwurembe Isrɛl maa e ji ne mi.