Read bassa NEHEMAYA 1 Bible Online

NEHEMAYA 1 - bassa bible

NEHEMAYA 1

¹N-ndumwa mi Nehemaya yɛu Hakalia na. Tu ga Atɛzɛksis yɛ tugwama ti Pɛsia, yaa namɛ shiywa woshi nu upiana Cislɛv[1] ibɛ du Ngaa namɛ nu Susa ụshɛpwụ ata ụ'wụtụ na shɛ uhiuhiu cɛnjɛ ta ata.

²Ga Hanani, yɛu-bino mi ike zhajɛ medenji emeseyi atwa Juda oko; Ngee heŋteni aŋ iwɛ Jɛrusalɛm keeni iwɛ Eju a na beni na ti'ima nu Babulon e ji.

³Ee m mbishi, ɛɛ hiɛŋ, Atwa cɛnjɛ ti nya a na namɛ apata a pana atwa ata ta vwɛ na cɛnjɛ ta ata ụbaụta keeni ụpụrụsa ụ'wụtụ. Uba Jɛrusalɛm hwuŋzwo, ee hwoŋzhenji kaa akpa uba hwɛɛ.

⁴Aka na tu Ngaa hwụjɛ iwɛ ɛtɛ, Ngaa jɛjɛ Ngee kwuni u'wo-tutwa. Ngoo to-ụkwụla maa ijitɛ imbɛnɛ, Ngaa njɛ ezumi, Ngaa njɛ adua pa Agwatana azuba.

⁵Ngɛɛ hiɛŋ, Oo AGWANGWAMA na shɛ Agwatana azuba, na shɛ Agwatana a'wụtụ 'wụtụ keeni bu na bi igɛhi, na kaa ba untangana unu bwa tutwa keeni tulubo tu bwa ti biye pa atwa na o lubo bu a na kaa a untangana unu bwa tụpana.

⁶Shilo acɛbɛ, ge eshe bu kwụbɛ maa hwụjɛ adua na Ama nda na agba bụ, tu uwaŋna tụ ụjita, Gamba yɛu gɛ bu ugondu iwɛ miaụŋ mụ bụ mu ugondu a na shɛ miaụŋ mi Isrɛl. Gana na Omo lono-unu iwɛwɛ nɛ atwa Isrɛl a bɛ njɛ hwɛɛ, tu Gamba du keeni atwa ihwɛ bishi mi.

⁷Tụ bụ njɛ iyi tugworozwo nɛ hwuleji. Tụ hwụjɛ shɛ kaa unu undwa bụ, to shikpogo shɛ bụ keeni onu bu tụpana a na ebi peni yɛu bu ugondu go Moses o.

⁸Teyinje iwɛ nɛ ebi sekekeni la yɛu bu ugondu go Moses, ɛbi hiɛŋ, Yaa shɛ ahiɛ n shanɛ shɛ atwa tɛcara, asha N zhɛ ma hi garataga hia nama na ashashɛ anya edenji.

⁹Ama yaa shɛ ehi gwure pi mi, ahia nda iyi nɛ Ngee hi peni-unu ibɛ, asha nazhɛ Ngɛɛ zhɛ me hi suje maa hiɛ banɛ no olugwo ata ee ge hi gereteji okwo tutu uce unyizo mo sotulonu, maa Mo hi tulono no ofwo na Ngee teri maa izeci mi nama.

¹⁰Atwa ga kaa shɛ miaụŋ mụ bụ mu ugondu keeni atwa bụ a na ebu gwube tedure nu ukpahiŋ bụ keeni ikɛnyi bu i'wɛtwɛ 'wɛtwɛ.

¹¹Oo AGWANGWAMA, hwuga adua na yɛu gɛ bu ugondu ya nda keeni adua miaụŋ mụ bụ mu ugondu mi nya a na ma bu muna ụjɛrụma. M peni ohwolu hwayɛ ga, maa bụtụ ga hieci inyɛmɛnyɛmɛ mi. Gamba kaa ma pana agwuma meni nu ukwopi.