Read bassa NEHEMAYA 13 Bible Online

NEHEMAYA 13 - bassa bible

NEHEMAYA 13

¹Jita ata aa rɛtanjɛ atwa ata utakada undwa Moses taawụụ, oo to ugbe ti yee 'nyeci nu bwa maa A'amon keeni Amoab shɛ shɛ e teni na tu'ulwa ta atwa Agwatana kwukwuŋ,

²iwɛnɛ te e teji shi la miaụŋ mi Isrɛl uhwaŋna ni iyimɛyɛ keeni meni na aka na ta a banɛ ni Ijipti, aa njɛ Balam ụgwụ maa kalana aŋ unu. Ama kaa Agwatana tu jɛshɛrɛjɛ unu ata tukalana waa shɛ ya uwebiye-tupana.

³Aka na ta atwa Isrɛl hwụjɛ ta a rɛcɛ undwa ata, oo bogotogwu atwa ata cɛnjɛ ti nya swooŋ na atwa Isrɛl.

⁴Ge Ɛliashib bunongbo, ubwa ee peni ụhwada shɛmɛ sho shimwono shi i'wɛŋnɛ nu umwono wa Agwatana tu, tobwolo aka ga te ci shi o. Ama gana na tu baa 'yajɛ ụmatụ no Tobia kpɛm kpɛm,

⁵baa imanganɛ bụ amɛ umwono uko ụ'wụtụ na aa shana o zwono apwaŋ iyi izɛgwu, ti iturɛre, ti i'wɛŋnɛ umwono wa Agwatana, ti iyi-a'umpwa izɛgwu, te meni mụ tụ'walụ ta afwafwa mu ufwo mu na ee ge peni iwɛ Alivai, na azụnjɛ, ta a'iywa shidubo keeni apalajɛma na aa nda iwɛ onongbo.

⁶Ama N zasaba nu Jɛrusalɛm na aka na ti ijɛ ya nda o. Iwɛnɛ po aka na tu ga Atɛzɛksis yɛ tugwama tu Babulon shiywa talacɛ-na-shɛba-shi-yebi, nazhɛ Ngee gwuri pa agwuma maa me mbishe bu. Ti yaa namɛ aka fwalaa na aba ibɛ, Ngaa lụpɛ agwuma, bee m peni ohwolu.

⁷Ti Ngee gwure nu Jɛrusalɛm, nazhɛ Ngoo to iyi iwɛ nɛ gɛ Ɛliashib njɛ ugbe iwɛ Tobia na bee leneni maa nama na amɛ umwono uko nu umwono wa Agwatana.

⁸Isɛbwɛ mi ishijɛ tebiye, Ngaa 'waŋtatanjɛ i'wɛŋnɛ Tobia no tupohondo hwɛɛ.

⁹Ngee eni aŋ maa ga a njɛ shɛmɛ shu umwono ata shɛshɛshɛ, nazhɛ Ngee gwurecenji iyi uhwugwa umwono wa Agwatana keeni apwaŋ iyimɛyɛ keeni iturɛre.

¹⁰Ngoo to du ugbe sasana maa e ge te peni shi ya Alivai iyi nɛ i shɛ urobwo wa aba o, iwɛbɛ po Alivai keeni azụnjɛ a na ga nda ugondu, bụtụ bụtụ gezhiji bee hwuri ne ehilo ubwa.

¹¹Iwɛbɛ po Ngee tezhigeni atwa shihwolu, Ngɛɛ hiɛŋ aŋ, Iwembe po ee jineci umwono wa Agwatanaa? Ngee suje Alivai ata keeni azụnjɛ Ngee gwuricinji nu umwono ata wa Agwatana maa a na ndaanana ugondu wa aba.

¹²Nazhɛ atwa Isrɛl elele kwuni ya iyi-a'umpwa aba, iyimɛyɛ keeni meni mụ tụ'walụ ta afwafwa keeni manɛbɛ tusuje maa e zweni nu umwono i'wɛŋnɛ.

¹³Ngee jeri atwa na zhɛ na ngbaraka umwono ata i'wɛŋnɛ; aba shɛ: gɛ Shɛlɛmia bunongbo, na Zadok bi'nyeci bu undwa, nɛ Pɛdaya na shɛ Bilivai. Bụtụ na 'wa aŋ i shɛ, ga Hanan yɛu Zaku bụjalụ Matania. Iwɛnɛ po a rɛcɛ atwa ata maa a shɛ atwa tɛcara, ugondu wa aba ụ shɛ iyimɛyɛ tuhwoŋso anjɛ-ugondu ata, a na shɛ miaụŋ-mo-bino ma aba.

¹⁴Oo Agwatana mi, ne me teyinje, to 'woricingo kaa iyi nɛ Ngaa njɛ na tɛcara iwɛ umwono bu keeni iwɛ tɛzhɛba tụ bụ o.

¹⁵Na aka ata, Ngaa kwụbɛ atwa Juda oko to o pilo meni mụ tụ'walụ ta afwafwa. Aa patanganɛ eshi ohiu, te meni mu tụ'walụ ta afwafwa, ta tụ'walụ ta afwafwa, ta tụ'walụ to owowo keeni i'wɛŋnɛ tuswoswoswo ye elele na shɛba shi nzhinyacɛ ma aba, ee jicinje iŋ nu Jɛrusalɛm nụ Ụjita-ụhinjanụ. Ngaa tɛtaganɛ aŋ unu maa kede a na sanga ya iyimɛyɛ ye elele nụ ụjita ata o.

¹⁶Atwa Taiya a na jɛjɛ nu Jɛrusalɛm du e suje ijɛnɛ keeni iyi udukwo swoswoswo aa sangana atwa Juda nu Jɛrusalɛm nụ Ụjita-ụhinjanụ.

¹⁷Ngaa tɛtaganɛ atwa ụjɛrụma Juda unu, Ngɛɛ hiɛŋ aŋ, Iyi ci'nyɛ imbe nɛ ahia ndaa? Kwụba ma ta ahia hashɛgana Ụjita-ụhinjanụ.

¹⁸Shɛ iyi nɛ ogwunukwoshi hiŋ njɛ la gbaa upo Agwatana utu sugeni iyi iwɛ gɛ hwɛɛ maa iti urigeni, medenji ụshɛpwụ ga na hŋ? Hwuwayɛ go, ɛhi ishicinjɛ sasana isɛbwɛ ya Agwatana nu uhiuhiu wa atwa Isrɛl tedure nụ Ụjita-ụhinjanụ na ahia hashɛgana.

¹⁹Iwɛbɛ po Ngee eni aŋ maa a na kapa shidubo shu uba Jɛrusalɛm tu Ụjita-ụhinjanụ we elele ta vwɛ beyi gunu na ti iyi kwuni turumono,[25]

²⁰Kpalụ ko kwo kaa kpalụ yebi ta ahinya keeni esenji iyi udukwo tuswoswoswo o zokwu no tupohondo tu Jɛrusalɛm hwɛɛ aba.

²¹Ngaa tɛtaganɛ aŋ unu, Ngɛɛ hiɛŋ, Iwembe po ehi zokwu no tupohondo tu ubaa? Ahiɛ ndaananɛ gana ga nyajita, N zhɛ ma hi ima. Te kwuni na aka ata e zhe shi ya nụ Ụjita-ụhinjanụ o.

²²Ngee eni Alivai maa ga a mama njɛ shɛshɛshɛ, iwɛ maa e zhe a ngbaraka shidubo shu uba, maa a untangana Ụjita-ụhinjanụ ne tijilo. Oo Agwatana mi, ne me teyinje iwɛ inɛ gɛ du sasana, maa hieci inyɛmɛnyɛmɛ mi, nu gana na to tulubo tụ bụ ti biye tụ 'wụtụ tu namɛ.

²³Na aka ata du Ngaa kwụbananɛ Eju oko ofwugwo a na zeni eyikwo Ashdod, ne eyikwo A'amon keeni eyikwo Amoab.

²⁴Ashashɛ miaụŋ ma aba ma duma Ri'ashdod kwo kaa rɛjɛmɛ ri nya ru ko, e eri shi a duma Riju o.

²⁵Ngee tezhigeni aŋ, Ngee keleni aŋ unu, Ngee jibi etwenyi aba oko, Ngee mushenji tihiŋzhe ta aba. Nazhɛ Ngee eni aŋ izeci ya Agwatana tuta maa, Hi zha shɛ hia pana ya miaụŋ mi hiŋ mo o maa miaụŋ ma aba me eyi mi zeni o, miaụŋ mi hiŋ me eyi kaa du mi zha shɛ ma zanɛ ya miaụŋ ma aba mo o, ta ahiɛba ni ikɛnyi hiŋ du o.

²⁶Shɛ iwɛ tụmbụla tu gana ga hŋ go Sụlụmụn agwuma Isrɛl njɛ la iwɛwɛ? I zasa kaa agwuma elele na shɛ gana bwa na ashashɛ shɛgwuma she edenji ofwugwo. Agwatana kaa lubi bu, Agwatana kaa njɛ bụ maa sha agwuma Isrɛl hwɛ hwɛɛ. Ama okwo ti yaa shɛ bwonu, eyikwo ata anya edenji zeriji bu maa nda iwɛwɛ.

²⁷Ti tɛ zhɛ suu to hi shilono acɛbɛ maa ta ndaanana iyi tugworozwo i'wɛtwɛ gɛnɛ ɛtɛ maa ta nda tụmbụla na anya edenji maa ta nda Agwatana tu iwɛwɛ?

²⁸Yɛu Jɛhoiyada na shɛ bụjalụ Ɛliashib uhiu wo onongbo ike zeni yɛu Sanbalat Buhoron ata; iwɛbɛ po Ngee becinji bu no olugwo mi.

²⁹Oo Agwatana mi, ne teyinje aŋ, iwɛnɛ po e heshigeni ugondu tunongbo keeni unu-tutwa wo onongbo na Alivai.

³⁰Gana Ngaa njɛ aŋ shɛshɛshɛ ta, maa e beni ni iyi elele nɛ i shɛ iyi ya anya edenji. Ngoo dwotwogonu onongbo na Alivai iyi ya aba i tungbaraka maa ga atwa atwa nama nu ugondu wa aba.

³¹Ngaa imanjɛ gana na maa a na 'wananjɛ i'wɛ'wɛ nɛ maa o no hwoŋzhingo apwaŋ na aka ibɛ nɛ ee shiri keeni maa ga atwa na 'waŋnɛ apwaŋ aba ụ tụ'walụ ti hiiŋ inɛɛ nɛ i nɛ. Oo Agwatana mi, ne me teyinje iwɛ ijɛ hwɛɛ maa m peni-uwebiye.