Read bassa NEHEMAYA 3 Bible Online

NEHEMAYA 3 - bassa bible

NEHEMAYA 3

¹Gana na ee meeneni uba ụshɛpwụ ata na: Gɛ Ɛliashib na shɛ uhiu wo onongbo keeni anya ubwa onongbo, aba meeneni Odubo Agwụdụ. Aa njɛ uŋ tijilo, ee zweni akpa ubwa, aa njɛ aŋ tijilo tutu ashɛkpa dipi-yebi, (100) aa njɛ uba ata tijilo tutu ashɛkpa Hananɛl.

²Etwenyi Jɛriko, aba mo bụ'aŋbụ na 'wa aŋ, nazhɛ ga Zaku yɛu Imri 'wa aŋ na tuma na bụ'aŋbụ bi nya.

³Umwamwa Hasenea aba a maanana Odubo Bijana. Ee zweni ogbogolo ubwa keeni akpa ubwa, ti ikɛgbɛ ibwɛ keeni ezhibi odubo tukapa.

⁴Gɛ Mɛrɛmot yɛu Uria, bụjalụ Hakoz, namɛ na bụ'aŋbụ na 'wa bụ baa nangana. Bụtụ na 'wa bụ na tunangana i shɛ gɛ Mɛshulam yɛu Bɛrɛkia bụjalụ Mɛshɛzabɛl, bụtụ na 'wa bụ na tunangana i shɛ ga Zadok yɛu Beana.

⁵Atwa na 'wa aŋ na bụ'aŋbụ bi nya tunangana i shɛ atwa Tɛkoa, ama atwa aba ụjɛrụma shiyeni shi i'ɛlɛ ya aba nu ugondu wa atwa na a ngbaraka aŋ o.[3]

⁶Go Joiyada yɛu Pasea keeni Mɛshulam, yɛu Bɛsodaiya, nanganɛ Odubo Angwụshɛ,[4] ee shikecenji ogbogolo ubwa, ee zweni akpa ubwa keeni ikɛgbɛ ibwɛ keeni ezhibi odubo tukapa.

⁷Bụtụ na 'wa bụ na tunangana i shɛ gɛ Mɛlatia Bigibion, keeni Jadon Bumɛronot, a na shɛ atwa Gibion, keeni Mizpa, a na zweni nụ ụhwada ugwomina ukpeleshi cɛnjɛ tu Yufretis.

⁸Bụtụ na 'wa bụ na bụ'aŋbụ bi nya tunangana i shɛ go Uziɛl yɛu Hahaya, na shɛ bụlụma ba azhɛnarɛya. Ga Hanania na shɛ bɛnjɛ bi iturɛre, ba nangana bụ'aŋbụ na 'wa bụ[5] tutu ofwo ata uba heri.

⁹Gɛ Rɛfaya yɛu Hu, na shɛ uhiu ụzalụ uko na cɛnjɛ tu Jɛrusalɛm, zweni na bụ'aŋbụ na 'wa bụ aa nangana.

¹⁰Gɛ Jɛdaya, yɛu Harumaf, ba nangana bụ'aŋbụ na namɛ ririri ni ihwɛ ibwɛ. Ga Hatush yɛu Hashabnia, ba nangana bụ'aŋbụ na 'wa bụ.

¹¹Ga Malkija yɛu Harim keeni Hashub yɛu Pahat-moab nanganɛ bụ'aŋbụ bi nya keeni ashɛkpa ata 'yajɛ u'ibwa ata aa shana ulwa tuta.

¹²Ga Shalum yɛu Halohɛsh, na shɛ uhiu ụzalụ uko na cɛnjɛ tu Jɛrusalɛm, nanganɛ bụ'aŋbụ na 'wa bụ, miaụŋ mu bwa mo o mi mbiyeni bu.

¹³Ga Hanun keeni atwa na jɛjɛ nu Zanoa, aba nanganɛ Odubo Ulomu. Oo mo aŋ, ee zweni akpa, ti ikɛgbɛ ibwɛ keeni ezhibi odubo tukapa. Aba du nanganɛ sasana uba bimenji bi imbele i'ɛlɛ akpakwụ-a-ta (1,000) tutu Odubo Ubizo.

¹⁴Ga Malkija yɛu Rɛkab, na shɛ uhiu ụzalụ uko na cɛnjɛ ti Bɛt-hakɛrɛm, ubwa nanganɛ Odubo Ubizo. Boo mo uŋ bee zweni akpa ubwa ti ikɛgbɛ ibwɛ, te ezhibi odubo tukapa.

¹⁵Ga Shalum[6] yɛu Kolhoze, na shɛ uhiu ụzalụ uko na cɛnjɛ ti Mizpa, ubwa mo Odubo Umɛzhinjɛ. Bee peteni ukogo nu bwa, bee zweni akpa, ti ikɛgbɛ ibwɛ keeni ezhibi odubo tukapa. Ubwa du meeneni Uba Ukwokwo Shila,[7] ni ipɛlu itimɛ ya agwuma, tutu ogbudu ata banɛ nụ ụshɛpwụ Devid u zwe apata.

¹⁶Bụtụ na 'wa bụ na tuma i shɛ ge Nehemaya yɛu Azbuk, na shɛ uhiu wa ashashɛ cɛnjɛ ti Bɛt-zu, ubwa mo tutu eririri u'uye Devid, tutu i ci ukwokwo meni ma ata aa njɛ, tutu sotulonu nu umwono we ejeshi.

¹⁷Atwa na 'wa bụ na tunangana a shɛ Alivai, tedure na Rehum yɛu Bani. Na aba ubwa i shɛ ga Hashabia, na shɛ uhiu wa ashashɛ cɛnjɛ ti Keila, ba nangana iwɛ ukpeleshi cɛnjɛ tu bwa.

¹⁸Atwa na 'wa bụ na tunangana a shɛ miaụŋ-mo-bino ma aba, ibɛ shɛ ga Bavai[8] yɛu Hɛnadad, na shɛ uhiu wa ashashɛ cɛnjɛ ti Keila nụ ụzalụ unya.

¹⁹Bụtụ na 'wa bụ na tunangana i shɛ gɛ Ɛzɛ yɛu Jɛshua, na shɛ uhiu Mizpa, ubwa mo bụ'aŋbụ bi nya ne eririri i'wɛŋnɛ ye ejeshi, tutu ofwo ata uba ringeni.

²⁰Bụtụ na 'wa bụ i shɛ ga Baruk yɛu Zabai, ubwa nanganɛ bụ'aŋbụ bi nya nu uzezeri, te kwune ne tiringeni tu uba tutu odubo umwono Ɛliashib na shɛ uhiu wo onongbo.

²¹Bụtụ na 'wa bụ i shɛ gɛ Mɛrɛmot yɛu Uria bụjalụ Hakoz, ubwa nanganɛ bụ'aŋbụ bi nya, te kwune no odubo umwono Ɛliashib tutu i ci ukwunanga umwono ata.

²²Atwa na 'wa bụ a shɛ onongbo a na namɛ nu udadarɛ Jɛrusalɛm, a nanganɛ i'ɛŋbi ifwugwo.

²³Atwa na keshici aŋ a shɛ gɛ Bɛnjamin keeni Hashub, aba nanganɛ bụ'aŋbụ na namɛ nu umbe shimwono sha aba. Bụtụ na 'wa aŋ i shɛ ga Azaria yɛu Measaiya bụjalụ Anania, ubwa nanganɛ bụ'aŋbụ na namɛ nu umbe umwono ubwa.

²⁴Bụtụ na 'wa bụ i shɛ ge Binui yɛu Hɛnadad, ubwa ba nangana bụ'aŋbụ bi nya, te kwune nu umwono Azaria tutu i ci tiringeni tu uba.

²⁵Ga Palal yɛu Uzai, ubwa nanganɛ bụ'aŋbụ na 'wa bụ na aba, bee kwuni nu usugwulumi uba keeni ashɛkpa ata namɛ na azuba umwamwa wa agwuma, to dongonu umwamwa wa a'iywa. Bụtụ na 'wa bụ i shɛ gɛ Pɛdaya yɛu Parosh.

²⁶Anjɛ-ugondu umwono wa Agwatana a na jɛjɛ nụ ụshɛpwụ ata ɛɛ hiɛŋ Ofɛl, aba nanganɛ eririri Odubo Meni geri bu uwaŋna-banụ, tutu i ci ashɛkpa ata tuma ta aba tu banɛ.

²⁷Atwa na 'wa aŋ a shɛ atwa Tɛkoa, aba nanganɛ bụ'aŋbụ bi nya, te kwune na apanya ashɛkpa ata a'wụtụ tutu i ci uba ata dongonu Ofɛl.

²⁸Onongbo aba a nangana azuba Odubo Budakwa, bụtụ bụtụ aba namɛ ne eririri umwono ukɛnyi ibwɛ.

²⁹Bụtụ na 'wa aŋ i shɛ ga Zadok yɛu Imɛ, ubwa ba nangana ne eririri ihwɛ ibwɛ. Bụtụ na 'wa bụ na tunangana i shɛ gɛ Shɛmaya yɛu Shɛkania na shɛ bungbaracɛ bo Odubo Uwaŋna-banụ.

³⁰Atwa na 'wa bụ a shɛ ga Hanania yɛu Shɛlɛmia keeni Hanun yɛu Zalaf icihiŋ,[9] aba a nangana bụ'aŋbụ bi nya, uyebi wa aba ta. Bụtụ na 'wa aŋ i shɛ gɛ Mɛshulam yɛu Bɛrɛkia, ubwa ba nangana bụ'aŋbụ na namɛ ne eririri shigongo shɛ bwa.

³¹Bụtụ na 'wa bụ i shɛ ga Malkija bụlụma ba azhɛnarɛya, ubwa ba nangana tutu i ci umwono wa anjɛ-ugondu umwono wa Agwatana keeni umwono wa ahinya a'wụtụ, ne eririri Odubo Tiyalaga, tutu i ci amɛ umwono ata namɛ na azuba tiringeni tu uba.

³²Alụma keeni ahinya ata a'wụtụ, aba a nangana bụ'aŋbụ bu umɛwɛɛ, te kwune no olugwo amɛ umwono ata patanɛ na azuba tiringeni tu uba, tutu i ci Odubo Agwụdụ.