Read bassa ESTA 2 Bible Online

ESTA 2 - bassa bible

ESTA 2

¹Okwo na aba na ti inɛ gɛ heŋnici, aka na ti isɛbwɛ ya agwuma Zɛksis kezhi, bu ta untanganɛ waa tuhaŋsa ti iyi nɛ ga Vashti njɛ keeni undwa na bee enenji iwɛ ubwa.

²Ibɛ po miaụŋ-mu-ugondu ma agwuma mu na ma ndana bụ iyi, mi hiɛŋ, Lono maa a bu dwalakakanɛ miaụŋ-mo-o mu na mu pilanụ, mu na kaa mi te mepi shi etwenyi.

³Tala atwa bu shihwolu shɛ 'wụtụ ne ekpeleshi cɛnjɛ tụ bụ te elele, maa ge bu sugeni miaụŋ-mo-o mu na mu pilanụ hwɛɛ ni ihwɛ ya agwuma Susa. Ge utegeni mu Hɛgai na shɛ ivwɛlɛ ya agwuma nɛ ba ngbaraka umwono we eyikwo; maa e peni aŋ manɛbɛ mu na mu pilanụ maa a mama njɛ shɛshɛshɛ.

⁴Gɛ yɛu-yo-o nɛ ubu kwụlanɛ i shɛ biyikwo bu, tụlụkpashɛ ti Vashti biyikwo bu. Ahaŋsa ata kaa kwụlanɛ agwuma, baa njɛ ga gana ata.

⁵Biju bu ko namba la ni ihwɛ ya agwuma Susa, ɛɛ hiɛŋ izeci ibwɛ go Modɛkai, yɛu Jai, na shɛ ụlamụ Bɛnjamin, bɛ shɛ bụtụ bu umwamwa Kish keeni Shimei.

⁶Go Modɛkai ata kaa shɛ bụtụ bu ko na atwa na gɛ Nɛbukadnɛza agwuma Babulon 'imɛ la na aka na tu baa 'imɛ Jɛhoiyakin[2] agwuma Juda, bee becinji bu nu Jɛrusalɛm.

⁷Bi 'yajɛ yɛu bishi bwa ike nɛ ɛɛ hiɛŋ ge Esta, inɛɛ nɛ Ehibru ɛ hiɛŋ bu ga Hadasa. Yɛu ɛtɛ yo o kaa pilanụ igbɛtɛtɛ tebiye. Aka na te bishi bi yɛu ɛtɛ 'wi te bino bwa, go Modɛkai tuba shepi bu baa 'yagajɛ bụ gana ti yɛu ibwɛ ikɛnyi ibwɛ.

⁸Aka na ta atwamwa hwụjɛ unu-tupana wa agwuma keeni ụhwada na agwuma shiri, ibɛ po miaụŋ-mo-o mu ufwugwo mu ụlwatagwụ ni ihwɛ ya agwuma Susa, ee utegeni mu Hɛgai. Aa shapɛ du Esta nu umwamwa ata wa agwuma, ee utegeni bu Hɛgai na shɛ bungbaracɛ be eyikwo.

⁹Iwɛ yɛu ɛtɛ yo o kaa kwụlanɛ Hɛgai; bee kwuni bu iwɛ tumapana. Bee peni bu manɛbɛ mu na maa mama nda shɛshɛshɛ kakayɛ, medenji iyimɛyɛ ticinji nɛ shɛ urobwo ubwa. Bee peni bu showo shu bwa shi cenje, shɛ na shi teni cɛŋ nu bwa, shɛ na shɛ banɛ nu umwamwa wa agwuma. Bee becinji bu apata medenji showo shu bwa shi cenje, ee zhe no ohwolu na ngezeni a na vwɛ nụ ụzhɛ hwɛɛ na amɛ umwono we eyikwo.

¹⁰Ge Esta leni shi maa e mepi olugwo na baa banɛ keeni bụtụ na shɛ udenji ubwa o; iwɛnɛ tu go Modɛkai tutwagwanua bụ unu maa kede mbiso bụtụ be elele o.

¹¹Ibɛ po go Modɛkai bo rungo nu ukpogwu ata umwono we eyikwo, bee ce beye, be ce bana iyi-heri, maa mapa gana na ti yɛɛ zhɛ ya shana Esta keeni gana na ɛɛ zhɛ a nda bụ.

¹²Yɛu-yo-o kaa i shɛ ya ụrɛcɛnga ipiɛnɛ umpwa-ni-bɛyebi na tumama nangangana tụ ụzhɛ ubwa gana na tu undwa we eyikwo namɛ. Inɛ iturɛre muru i shɛ ipiɛnɛ icihiŋ, inɛ iturɛre inyɛ i shɛ ipiɛnɛ icihiŋ, nazhɛ yɛu ɛtɛ yo o zhɛ yo to bu maa e shepi bu no ofwo agwuma Zɛksis.

¹³Gana na yɛu-yo-o i shɛ ya zha no ofwo agwuma na. Ɛ zhɛ a pana bụ iyi tu'urugono ye elele nɛ baa jala ti bee beni nu umwono ata we eyikwo maa zha nu umwamwa wa agwuma.

¹⁴Yɛu ɛtɛ yo o zhɛ ya zha apata nụ ụrụmɛ, ama iyi heri nu uvwungwa, ɛ zhɛ a shapa bụ a zha na amɛ umwono unya nu umwono ata we eyikwo maa ga Shashgaz na ba ngbaraka eyikwo magɛgashɛ agwuma na ngbaraka bụ. Bu ta zha shɛ bo gwulo no ofwo agwuma o, semi aka na ti yaa kwụlanɛ agwuma, nazhɛ bɛɛ zhɛ ba suyana izeci ibwɛ.

¹⁵Aka na ta aka Esta, yɛu-yo-o Abihail na shɛ udenji Modɛkai nɛ bɛɛ wɛŋnicinjɛ gana yɛu ikɛnyi ibwɛ i ci maa tono no ofwo agwuma. Bụ lụpɛ shɛ kaa iyi elele o, semi iyi nɛ gɛ Hɛgai na shɛ ivwɛlɛ ɛtɛ ya agwuma na ba ngbaraka eyikwo peni bu ahaŋsa ibɛ. Iwɛ Esta kaa kwụlanganɛ bụtụ be elele na kwụbɛ bụ.

¹⁶Ti gɛ Zɛksis yɛ tugwama tu bwa, yaa namɛ shiywa shi cenje, nazhɛ ee shepi Esta ee zhe no ofwo agwuma gɛ Zɛksis na amɛ umwamwa tugwama, nu upiana Tɛbɛt[3] na shɛ Bu'umpwa.

¹⁷Agwuma kaa lubi Esta tebiye uhwuri miaụŋ ma ata mo o mu vwɛ hwɛɛ. Bee peteni bu udara tugwama nu uhiuhiu, baa njɛ bụ biyikwo bwa tụlụkpashɛ tu Vashti.

¹⁸Nazhɛ agwuma njɛ iyimɛyɛ unyasa i'wɛtwɛ iwɛ Esta, baa suyaganɛ atwa shihwolu she ekpeleshi cɛnjɛ tu bwa hwɛɛ, keeni miaụŋ mu bwa mu ugondu. Bee peni aŋ ụhinjanụ uko, bee peni aŋ du apwaŋ gana na tu ukpahiŋ tugwama tu bwa ci.

¹⁹Aka na to o sotulonu miaụŋ ma ata mo o mi te mepi shi etwenyi urubwo uko na aka yebi, go Modɛkai ta kaa jɛjɛ no odubo agwuma.

²⁰Ge Esta kaa ta jɛmɛ shɛ udenji na baa shɛ kwo kaa atwa na shɛ atwa ubwa na aka ata o, nu gana na tu go Modɛkai tɛtaganɛ bu unu. Iwɛnɛ po baa hwuga-unu Modɛkai gana na tu baa nda la na aka na tu baa namɛ ni i'ɛlɛ ibwɛ.

²¹Na aka ata tu go Modɛkai jɛjɛ no odubo agwuma, ibɛ nvwala mi yebi: ge Bigtan[4] nɛ Tɛrɛsh a na zweni na ashashɛ atwa na a 'yaka odubo amɛ umwono wa agwuma njɛ isɛbwɛ, aa jala maa a 'imɛ agwuma gɛ Zɛksis maa a kwụnɛ bụ.

²²Go Modɛkai mepi iwɛ ɛtɛ, bee mbishi Esta biyikwo ba agwuma, ge Esta mbishi agwuma iwɛ ɛtɛ maa bwonu go Modɛkai mbishi bu.

²³Aka na te e hweleji iwɛ ɛtɛ, aa kwụbɛ maa gana ata ga yaa shɛ. Ee suji aŋ hwɛɛ aba ebeyebi ata ee sweci aŋ nụ ụ'wụ'wụ. Ee 'nyeci kaa iwɛ ɛtɛ nu utakada shɛrụkwụkwụ na namɛ na agba agwuma.