Read bassa ESTA 4 Bible Online

ESTA 4 - bassa bible

ESTA 4

¹Aka na tu go Modɛkai mepi ijɛ aa njɛ bana hwɛɛ, bee eŋsetenji tugwuno tu bwa, bee urigeni tugwuno tụ ụcɛnjɛ tɛnda[9] baa dula ma'alụ, bee beni bee zhe na ashashɛ ụshɛpwụ ata bee tileni nu u'wo gboo, boo jirongono na cɛnjɛ.

²Bee zhe tutu odubo umwono wa agwuma, ama bi teni shi o, iwɛnɛ te e leneni shi bụtụ be elele na urigeni tugwuno tụ ụcɛnjɛ tɛnda maa tono no odubo ata.

³Ofwo elele na unu-tupana ata wa agwuma teni ne ekpeleshi cɛnjɛ ta ata, ụkwụla-tuta ụ'wụtụ nambana Eju, aa nda ezumi,[10] aa twa-u'wo, aa kala n'ungwa. Atwa aba ofwugwo urigeni tugwuno tụ ụcɛnjɛ tɛnda, ee weteji na ma'alụ.

⁴Aka na to showo shi Esta keeni nvwala mu bwa mu zhajɛ ee mbishi bu iwɛ Modɛkai, amɛ ubwa hashɛganụ tebiye. Baa tumwananɛ Modɛkai otogwo, iwɛ maa e ushiji bu tugwuno ta ata tụ ụcɛnjɛ tɛnda, ama bi leshiji shi aŋ o.

⁵Nazhɛ ge Esta tumwanɛ maa ga suyananɛ bụ Hatak bụtụ bu uko na ashashɛ nvwala ma agwuma, bu naa na ee shileni bu maa bu na ngbaraka bụ. Bee peni bu unu, bɛɛ hiɛŋ, Zhaga no ofwo Modɛkai, hweyigeni iyi nɛ teneni bu upo baa nda gana go.

⁶Ga Hatak beni ga bee zhe no ofwo Modɛkai, nụ ụshɛpwụ no odubo umwamwa wa agwuma.

⁷Go Modɛkai mbishi bu iyi elele nɛ teneni bu keeni tugom tu ulumo ukwuribi na ge Heman shiri-unu maa bi zhɛ ba tụpa atwa umwono ukwuribi wa agwuma iwɛ ti'iricingo te Eju hwɛɛ.

⁸Go Modɛkai peni du Hatak tuzwogo tu utakada ata unu-tɛtɛtagana tu ko maa pana Esta, ibɛ shɛ una ata ee hweŋshi na amɛ cɛnjɛ tu Susa, iwɛ maa ge iricinji Eju hwɛɛ. Go Modɛkai hiɛŋ bụ, Swegeni Esta iyi elele hwɛɛ, bee eni Esta maa ga zha na agba agwuma maa tabwa bụ, maa lụpa bụ iwɛ atwa ubwa.

⁹Ga Hatak zhe bee mbishi ga Esta n-ndumwa ma ata go Modɛkai mbishe bu.

¹⁰Nazhɛ ge Esta tumwananɛ Hatak utumwa maa go gwulo no ofwo Modɛkai maa mbiso bu maa,

¹¹Atwa elele na zweni no shihwolu shu ugondu wa agwuma keeni atwa ukpeleshi cɛnjɛ-ta-tugwama tu ga, e mepi maa bụtụ be elele okwo biyikwo na teni taa na amɛ umwamwa wa agwuma, na kaa aa suyanɛ shɛ, ụhwada na namba iwɛ ubwa ụ shɛ uko gba, ubwa shɛ maa ga a kwụnɛ bụ. Uhwaŋna na kiri bụtụ eri ba banangana ụ shɛ maa ga agwuma sakanɛ bụtụ ata bukwuto bu bwa ba azhɛnarɛya, nazhɛ bụtụ ata zhɛ bo bino. Agwuma kaa ta zha shɛ ma n suyana uuwa i ci ijitɛ gɛ talacɛ o.

¹²Aka na te e mbishi Modɛkai utumwa Esta.

¹³Go Modɛkai tumwanɛ ajɛshɛgwa gana ga no ofwo Esta, bɛɛ hiɛŋ, Ta haŋsa maa bi zhɛ ba banangana uhwuri Eju na vwɛ, iwɛnɛ ta abu namɛ ni ihwɛ ya agwuma o.

¹⁴Yaa shɛ abu namɛ saiiŋ na aka ga, asha nekeshi timbiyono keeni tubanangana te Eju ti zhɛ ta banɛ nyapadụ, ama gabụ, na atwa ihwɛ bishi bu tuba hi zhɛ hio ilono. Gaaba mepi okwo iwɛ ecilo gana ga upo abu namɛ no ohwolu gana ga na aka gaa?

¹⁵Nazhɛ ge Esta tumwananɛ Modɛkai ajɛshɛgwa ga, bɛɛ hiɛŋ,

¹⁶Zhaga sotulonu Eju elele na namɛ nu Susa, maa hiɛ njɛ ezumi iwe mi. Ta ya ma iyi elele o, ta swa ma o tutu ijitɛ itɛtu, tụ ụjita tu uwaŋna. Gamba no showo shi mi, ti zhɛ du ta nda ezumi gana ata. Aka na ta ahiɛ njɛ gana ga, nazhɛ Ngɛɛ zhɛ mo tonono agwuma, okwo tu undwa leni shi. Yaa shɛ Ngɛɛ zhɛ mo 'wo go mo 'wo.

¹⁷Go Modɛkai beni bee zhe baa njɛ iyi nɛ ge Esta peni bu unu ibɛ.