Read bassa ESTA 6 Bible Online

ESTA 6 - bassa bible

ESTA 6

¹Agwuma eri shi o woto malabụ nụ ụrụmɛ ata o, bee peni atwa ubwa unu maa ga shapɛrɛganɛ bụ utakada shɛrụkwụkwụ shi iyi nɛ njɛ la cala, aa rɛcɛ iŋ na agba agwuma.

²Oo to ugbe ti yee 'nyeci apata maa, go Modɛkai ubwa vwɛ la Bigtana keeni Tɛrɛsh uvwi, aba ata ebeyebi a na namɛ na ashashɛ nvwala ma agwuma a na zweni na atwa na a 'yaka odubo umwono wa agwuma, aba kaa a jalakaka la ohwolu maa a 'imɛ agwuma Zɛksis.

³Bee heŋteni, bɛɛ hiɛŋ, Ụjɛrụma imbe la kwuuŋ ee peni Modɛkai kwo kaa ule imbe la bee leshiji iwɛ ijɛ baa njɛɛ? Miaụŋ mu bwa mu ugondu mi jishijɛ bụ, mɛɛ hiɛŋ, I zasa la iyi elele nɛ aa ndanɛ bu o.

⁴Agwuma heŋteni, bɛɛ hiɛŋ, Gaaba kwuuŋ namba nu umwamwa ataa? Gunu gatata kaa ge Heman teni nu umwamwa umwono wa agwuma maa mbiso agwuma maa ge sweci ya Modɛkai nụ ụ'wụ'wụ ata baa ga shɛndwa iwɛ ubwa.

⁵Ibɛ miaụŋ mu bwa mu ugondu mi hiɛŋ bụ, Ge Heman kaa shikeni nu umwamwa ata. Agwuma peni-unu, bɛɛ hiɛŋ, Ge teni.

⁶Aka na ti ge Heman teni, agwuma heŋteni bu, bɛɛ hiɛŋ, Imbe kwuuŋ i lanɛ maa a ndanɛ bụtụ na Ama nda unyasa nu bwa, na kaa Ama jala maa ma pana ụjɛrụmaa? Ge Heman heŋshi na amɛ ubwa, bɛɛ hiɛŋ, Gaaba ta namba maa agwuma njɛ unyasa nu bwa, maa pana bụ ụjɛrụma te me hwurii?

⁷Bɛɛ jishijɛ agwuma, bɛɛ hiɛŋ, Bụtụ na agwuma a ndana unyasa, na kaa baa jala maa pana ụjɛrụma,

⁸ge suje otogwo tugwama anaa na agwuma a shana boo hwuŋtono keeni budakwa ata agwuma a suka keeni udara tugwama maa e peteni bụtụ ata nu uhiuhiu.

⁹Nazhɛ ga a shapɛ utogwo ata, na budakwa ata maa e utegeni bụtụ bu ko na 'yajɛ ụjɛrụma uhwuri atwa ụjɛrụma agwuma hwɛɛ, maa urugono bụtụ ata na agwuma a ndana unyasa, na kaa bee peni ụjɛrụma. Ge peteni bu na budakwa maa e duri ukpekiti ụshɛpwụ ga, maa a na ananga nu umbe ubwa maa, Gana ga aa nda bụtụ na agwuma a ndana unyasa, na kaa bee peni ụjɛrụma.

¹⁰Agwuma hiɛŋ Heman, Zhaga kakayɛ maa suje otogwo ata keeni budakwa ata, gana na abɛ jɛmɛ, maa ndanɛ Modɛkai Biju ata jɛjɛ no odubo agwuma. Kede ijɛ abɛ jɛmɛ iwɛ ibɛ okwo ike ngwuri o.

¹¹Ge Heman suje ga otogwo ata keeni budakwa ata, bee urigeni Modɛkai otogwo ebe. Go Modɛkai munji budakwa, ge Heman hwuri umbe nu bwa, baa ananga, bɛɛ hiɛŋ, Gana aa ndana bụtụ na agwuma a nda unyasa nu bwa, na kaa bee peni ụjɛrụma na.

¹²Nazhɛ go Modɛkai gwure no odubo umwamwa wa agwuma sasana. Ama ge Heman fwuleji uhiuhiu ubwa ne ezuye, bee ji kakayɛ ni ihwɛ ibwɛ.

¹³Ge Heman swegeni biyikwo bwa gɛ Zɛrɛsh keeni eyejilo ubwa hwɛɛ iyi elele nɛ jiteni bu. Nazhɛ atwa ata ubwa shihaŋsa keeni biyikwo bwa gɛ Zɛrɛsh, hiɛŋ bụ, Taa tu go Modɛkai ga ebu kwuni ekwunyi tugwulo nu bwa ɛ shɛ Biju, asha bi zha shɛ ba ala bu ya o, gabụ kaa bi zhɛ ba laya nu umbe ubwa tilɛɛ!

¹⁴Gana na te e tileni apata aa ta dumanga n-ndumwa ma ata nu bwa, nvwala ma agwuma mu pushe, oo to Heman izɛlɛgwu maa e zhe no ofwo iyimɛyɛ ɛtɛ ge Esta imanganjɛ.