Read bassa ESTA 8 Bible Online

ESTA 8 - bassa bible

ESTA 8

¹Nụ ụjita ata gbaa, agwuma Zɛksis shepi ihwɛ Heman, bụtụ ata bi i'ime be Eju, bee peni biyikwo bwa ge Esta. Go Modɛkai zhajɛ na agba agwuma, iwɛnɛ ti ge Esta dumwa ya gana na tu ụmatụ wa aba shɛ nu bwa.

²Ibɛ po agwuma hwucice bukanɛ bu bwa, bu gata bee leshiji ne Heman bee peni Modɛkai. Nazhɛ ge Esta peni Modɛkai ihwɛ Heman maa sha uhiu ibɛ.

³Nazhɛ ge Esta zhajɛ bee leyi na agba agwuma sasana, baa tabwa bụ na malaba, maa go ngwuricingo iyi iwɛ ɛtɛ ge Heman Bu'agag ata ge heŋsegeni Eju.

⁴Nazhɛ agwuma sakanɛ Esta bukwuto bu bwa ba azhɛnarɛya, ge Esta ishijɛ bee shikeni na agba agwuma.

⁵Bɛɛ hiɛŋ, Yaa shɛ yaa bụ kwụlanɛ maa hieci inyɛmɛnyɛmɛ mi, yee teni kaa cɛŋ ne eshe bu, ti yaa shɛ iwe mi ụbụ kwụlanɛ, asha lono maa e 'nyeci utakada maa e ngwuricinji utakada ata ge Heman yɛu Hamɛdata na shɛ Bu'agag ata go 'nyotwo la maa ge iricinji Eju elele na namɛ ne ekpeleshi cɛnjɛ-ta-tugwama tụ bụ.

⁶Gana naa Ngee eri ma ima-isɛbwɛ maa Ma kwụba te ebe zhɛ a mana atwa mii? Kwo kaa gana naa Ngee eri ma ima-isɛbwɛ maa Ma kwụba to o iricingo atwa umwamwa muu?

⁷Nazhɛ agwuma Zɛksis jishijɛ biyikwo ata ubwa ge Esta, keeni Modɛkai Biju ata, bɛɛ hiɛŋ, Hioko, M pwonuo Esta ihwɛ Heman, oo swotwo bu kaa nụ ụ'wụ'wụ ata, iwɛnɛ tu baa sukakanɛ Eju.

⁸Ahiɛba ni ikɛnyi hiŋ, 'nyatana ma Eju utakada ni izeci mi, iwɛnɛ po ti'nyeci te elele ti'nyeci ni izeci mi, tu na kaa aa njɛ useyida na bukanɛ mi Gamba agwuma, i zasa ya bụtụ be elele na eri bo sheyingo tu o.

⁹Aa suyanɛ e'nyeci iyi agwuma na aka ata, nu upiana Sivan,[14] na shɛ bụtatụ nụ ụjita woshi-ni-bɛ-tɛtu nu upiana ata. Ee 'nyeteni atwa elele nu gana na tu go Modɛkai peni Eju unu, ta azhɛgba agwuma, te egwomina keeni amadanga agwuma, a na namɛ ne ekpeleshi cɛnjɛ dipi-yebi-nu-woshi-na-aba-ecenje (127), a na kwune ni India tutu i ci Itiopia. E 'nyeteni atwa ukpeleshi cɛnjɛ te elele keeni atwa elele gana na te ti'nyeci ta aba tɛ shɛ, keeni gana na ta rɛjɛmɛ ra aba rɛ shɛ keeni Eju, gana na te ti'nyeci ta aba tɛ shɛ keeni gana na ta rɛjɛmɛ ra aba rɛ shɛ du.

¹⁰Go Modɛkai 'nyeci ti'nyeci ta ata ni izeci ya agwuma Zɛksis, bee peteni tu useyida na bukanɛ ba agwuma, baa tumwanganɛ tụ tedure na asụcɛ idɛkwɛ nɛ 'yebi usumwa tebiye, anaa na agwuma 'yajɛ iwɛ ugondu gana ata cinji.

¹¹Agwuma leneni Eju na amɛ utakada ata maa go o momo sotulonu na ashɛpwụ a'wụtụ elele na aa namanjɛ urubwo uko, maa e meme lesheji, maa a njɛ iyi ufwu, maa a kwụnɛ ikwunɛ, maa e iricinji ukpahiŋ wa atwa elele keeni cɛnjɛ te elele tu na ta sukakana aŋ. Ta miaụŋ ma aba keeni eyikwo aba; maa ge suji i'wɛŋnɛ ya aba a yɛ.

¹²Ụjita ata ee dweji Eju maa ga njɛ ikwunɛ gɛ ne ekpeleshi cɛnjɛ-ta-tugwama ta agwuma Zɛksis hwɛɛ, ụ shɛ nụ ụjita umpwa-ni-bɛ-tɛtu nu upiana bụvwụvwụ bi yebi.

¹³Tuzwogo tu utakada undwa ata tɛ shɛ oo hwoŋso nu ukpeleshi cɛnjɛ te elele no ofwo atwa elele maa ge Eju mama 'imɛ jita ata maa a njɛ itɛpwɛ uhiuhiu wa aba no ofwo atwa i'ime ya aba.

¹⁴Asụcɛ idɛkwɛ agwuma nɛ yo gozhigo tebiye beni ga, unu-tɛtɛtagana wa agwuma kaa wa ta aŋ izɛlɛgwu, woo shishongono aŋ. Ibɛ po ɛɛ bɛcinjɛ iwɛ ɛtɛ nu Susa na shɛ ụshɛpwụ ata shɛ uhiuhiu na cɛnjɛ ta ata.

¹⁵Go Modɛkai beni na agba agwuma, ti bee urigeni utogwo tugwama uduhwa keeni una ụcɛnjɛ, baa patanɛ kaa udara ata ụ'wụtụ wa azhɛnarɛya nu uhiuhiu ubwa keeni idikɛ ɛtɛ ilinɛn ibiye i nɛ ụlụma keeni inɛ uduhwa ushenje. Nazhɛ atwa ụshɛpwụ ata Susa keri ewili taawụụ, nu unyasa ụ'wụtụ tubwada.

¹⁶Eju 'yajɛ ya amɛ-olom, nu unyasa tubwada keeni ụjɛrụma.

¹⁷Ukpeleshi cɛnjɛ te elele keeni ụshɛpwụ ụ'wụtụ we elele na unu-tupana keeni unu-tɛtɛtagana ata wa agwuma teni, Eju 'yajɛ amɛ-olom keeni unyasa tubwada keeni isene Ụjita-ụhinjanụ. Atwa ofwugwo na ashashɛ atwa cɛnjɛ ta ata jɛshɛrɛjɛ ee teni Tiju, iwɛnɛ aa sụmɛ Eju inyɛsɛ.