Read bassa ESTA 9 Bible Online

ESTA 9 - bassa bible

ESTA 9

¹Tụ ụjita ata umpwa-ni-bɛ-tɛtu nu upiana Ada na shɛ bụvwụvwụ bi yebi ci, oo mburusonu unu-tupana ata wa agwuma no ofwo elele. Nụ ụjita ata gbaa ibɛ atwa i'ime Eju ga shɛlanɛ maa aba zhɛ a 'yaga ụhwada we Eju gom, ama iwɛ ɛtɛ jɛshɛrɛjɛ ya, Eju aba 'yajɛ ya ụhwada wa atwa i'ime ya aba.

²Eju momo sotulonu urubwo uko na amɛ ashɛpwụ aba a'wụtụ elele, ne ekpeleshi cɛnjɛ-ta-agwuma ti Zɛksis hwɛɛ, maa a sukakanɛ atwa na ga jala maa e iricinji aŋ. I zasa kaa bụtụ be elele na eri bo shikono maa sukakana aŋ o, iwɛnɛ ta atwa na namɛ no ofwo elele a sụma aŋ ya inyɛsɛ.

³Eju ekpeleshi cɛnjɛ ta ata hwɛɛ, ta azhɛgba agwuma, te egwomina keeni anjɛ-ugondu agwuma mbiyeni Eju, iwɛnɛ aa nda inyɛsɛ Modɛkai.

⁴Iwɛnɛ po go Modɛkai shɛ ya bụtụ bụ 'wụtụ nu umwamwa wa agwuma. Urishi ubwa mburusonu ne ekpeleshi cɛnjɛ ta ata hwɛɛ. Bụtụ ata go Modɛkai ba kaana gu ugombo nụ ụjɛrụma ti'yaga.

⁵Eju kebi atwa i'ime ya aba no otokwobi, aa kwụnɛ aŋ, ee iricinji aŋ hwɛɛ. Aa njɛ atwa elele na go to aŋ ni i'ime gana elele na kwụlanɛ aŋ.

⁶Eju kwụnɛ etwenyi akpakwụ-eyebi-ni-dipi-yebi (500) nu Susa ata shɛ uhiu wa ashɛpwụ na cɛnjɛ ta ata.

⁷A kwụnɛ du miaụŋ-me-eyi mi Heman yɛu ɛtɛ Hamɛdata umpwa: ga Pashandata, na Dalfon keeni Aspata,

⁸no Porata, na Adalia keeni Aridata,

⁹na Pamashta, na Arisai, na Aridai, keeni Vaizata, ubwa ata na go to Eju ni i'ime.

¹⁰Ama e timengeni shi i'wɛŋnɛ ya aba tusugo.

¹¹Gunu ụjita ata gbaa ee mbishi agwuma ufwugwo we etwenyi na aa kwụnɛ nu Susa, na shɛ ụshɛpwụ ata ụ shɛ uhiu cɛnjɛ ta ata.

¹²Nazhɛ agwuma mbishi Esta biyikwo bwa, bɛɛ hiɛŋ, Eju kwụnua etwenyi akpakwụ-eyebi-ni-dipi-yebi nu Susa na shɛ ụshɛpwụ ata ụ shɛ uhiu, medenji miaụŋ-me-eyi mi Heman umpwa, asha gana na aa njɛ ya ne ekpeleshi cɛnjɛ-ta-agwuma tu na tụ vwɛɛ? Imbe ta shɛ ilupwɛ nɛ aba ndaa? Ɛ zhɛ kaa ma bụ pana. Imbe ta shɛ iyi nɛ abu ta jalananaa? Ɛ zhɛ kaa ma bụ ndana iŋ.

¹³Ge Esta jishijɛ agwuma, bɛɛ hiɛŋ, Yaa shɛ ya bụ kwụlanɛ gabụ agwuma, maa peni Eju na namɛ nu Susa ụhwada maa gana na aa njɛ unu-tɛtɛtagana ata hwayɛ ga, maa o to tuhwulo tu bwa sasana beyi ga, maa leneni aŋ maa e sweteji n'wo mu miaụŋ-me-eyi mi Heman umpwa ni i'wɛ'wɛ ɛtɛ.

¹⁴Agwuma peni aŋ ga unu maa ga a njɛ gana ata, ee peni aŋ ụhwada ata nu Susa, ee sweteji n'wo mu miaụŋ-me-eyi mi Heman umpwa ni i'wɛ'wɛ.

¹⁵Eju na namɛ nu Susa ụlwatagwụ sasana urubwo uko nụ ụjita umpwa-ni-bɛ-neshi nu upiana ata bụvwụvwụ bi yebi, aa kwụnananɛ etwenyi anya kpakwụ-ni-dipi-yebi (300) nu Susa, ama e timengeni shi i'wɛŋnɛ ya aba tusugo sasana o.

¹⁶Na aka ata, Eju anya a na namɛ ne ekpeleshi cɛnjɛ-ta-agwuma, ta ata sotulonu maa e meme lesheji, aa hwungwa ya na atwa i'ime ya aba. Aa kwụnɛ etwenyi na shɛ atwa i'ime ya aba igbɛɛ-talacɛ-ni-bɛ-cenje-na-akpakwụ-a-ta, (75,000) ama e timengeni shi i'wɛŋnɛ ya aba tusugo.

¹⁷A njɛ ijɛ nụ ụjita umpwa-ni-bɛ-tɛtu nu upiana Ada, na shɛ bụvwụvwụ bi yebi, oo to ụhinjanụ nụ ụjita umpwa-ni-bɛneshi, aa njɛ ụjita ata ụjita isene keeni ụjita unyasa tubwada.

¹⁸Eju na namɛ nu Susa ụlwatagwụ nụ ụjita umpwa-ni-bɛ-tɛtu, ni-bɛ-neshi keeni ni-bɛ-tɛ nu upiana ata uko uko, oo to ụhinjanụ, aa njɛ ụjita ata ụjita isene keeni ụjita unyasa tubwada.

¹⁹Iwɛbɛ po Eju na namanjɛ na ashɛpwụ na gwụmwatangwụ, a njɛ ụjita ata umpwa-ni-bɛ-neshi nu upiana ata bụvwụvwụ bi yebi ụjita isene ụhinjanụ, ụ shɛ ụjita na oo momo pononu apwaŋ iyimɛyɛ.

²⁰Go Modɛkai 'nyeci titeyinje ti ijɛ hwɛɛ, baa tumwanganɛ utakada ata no ofwo Eju elele a na namanjɛ ne ekpeleshi cɛnjɛ-ta-agwuma ti Zɛksis, ta atwa na gwumwongonu, ta atwa na dụlụmanjɛ,

²¹maa go ono shiyono ụjita umpwa-ni-bɛ-neshi keeni-ni-bɛ-tɛ nu upiana Ada na shɛ bụvwụvwụ bi yebi eshe nu uywa uywa.

²²Ijitɛ ɛtɛ ibɛ shɛ ijitɛ nɛ Eju hwungwa na atwa i'ime ya aba, keeni upiana ata aa jɛshɛrɛjɛ amɛ-tụhaŋtụ aba maa a shɛ amɛ-olom, na kaa ee beni nụ ụkwụla-tuta ee teni nu unyasa ubiye. Bee 'nyeteni aŋ maa go o no shiyono ijitɛ ɛtɛ eshe maa i shɛ ijitɛ isene unyasa tubwada keeni ijitɛ nɛ oo momo pononu iyimɛyɛ keeni okofwo apwaŋ tụpana.

²³Eju leni maa o to tuhwulo nụ ụjita ata isene unyasa tɛnda gana na te e kwuni, aa nda kaa iyi nɛ go Modɛkai 'nyatanɛ aŋ.

²⁴Iwɛnɛ po ge Heman ata yɛu Hamɛdata, Bu'agag ata na to Eju kpaaŋ ni i'ime, bee heŋsegeni Eju iwɛ maa iricingo aŋ hwɛɛ keeni iwɛ maa 'waŋ Pụ, iwɛ maa iricingo aŋ maa ndaanana aŋ ufwu.

²⁵Ama aka na ti ge Esta zhajɛ[15] na agba agwuma, nazhɛ agwuma eni atwa ubwa utakada ti'nyata, maa ge iyi iwɛ ɛtɛ ge Heman ge heŋsegeni Eju gwuri nu uhiuhiu ukɛnyi ibwɛ. Iwɛbɛ po ee sweci aŋ ni i'wɛ'wɛ ɛtɛ, tu bwa, ta miaụŋ mu bwa.

²⁶Iwɛbɛ po oo po ijitɛ ɛtɛ iyebi izeci maa Pụrim, iwɛnɛ ti yaa banɛ ni izeci Pụ. Iwɛ iyi elele nɛ 'nyeci nu utakada ata Modɛkai keeni iwɛ iyi nɛ aa kwụbɛ keeni iwɛ iyi nɛ vwuteni aŋ,

²⁷Eju meme shileni iŋ, ta miaụŋ ma aba keeni bụtụ be elele na teni Tiju. A shɛ o no shiyono ijitɛ ɛtɛ iyebi eshe uywa uywa na aka ibɛ nɛ ee shiri nu utakada ata.

²⁸Awaŋnɛ elele, ta amwamwa elele, keeni ekpeleshi cɛnjɛ te elele a shɛ e ne teyinje ijitɛ ɛtɛ maa o no shiyono iŋ eshe nụ ụshɛpwụ we elele. Kede Eju genji isene ijitɛ ɛtɛ Pụrim tɛnda kwukwuŋ, kede kaa e genji titeyinje ti ijitɛ ɛtɛ na ashashɛ miaụŋ ma aba mu na mi tee ci o.

²⁹Nazhɛ biyikwo ata ba agwuma ge Esta, yɛu Abihail, medenji Modɛkai Biju ata, 'nyeci utakada na ụhwada Esta shini nu bwa hwɛɛ, iwɛ maa i keeni utakada ata go Modɛkai ge 'nyeci hiiŋ ukpahiŋ iwɛ Pụrim.

³⁰Go Modɛkai tumwanganɛ utakada ata no ofwo elele na namɛ ne ekpeleshi cɛnjɛ-ta-agwuma ti Zɛksis dipi-yebi-nu-woshi-na-ba-ecenje (127). N-ndumwa ma ata mu bwa kaa mɛ shɛ amɛ-olom keeni iwɛ-tɛkana,

³¹maa go o no shiyono ijitɛ ɛtɛ Pụrim eshe na aka ibɛ nɛ ee shiri gom, ta miaụŋ ma aba me ekwunyi, nu gana na tu go Modɛkai Biju ata keeni biyikwo ba agwuma ge Esta shikicingeni aŋ iwɛ ezumi tɛnda keeni ụkwụla-tuta.

³²Ibɛ po unu-tɛtɛtagana Esta shikicinji andwa iwɛ Pụrim ata dimi; ee 'nyeci uŋ nu utakada u titeyinje.