Read bassa ỤBANỤ 12 Bible Online

ỤBANỤ 12 - bassa bible

ỤBANỤ 12

¹Nazhɛ AGWANGWAMA hiɛŋ Moses keeni Aron, na amɛ cɛnjɛ ti Ijipti,

²Upiana ga ubwa zhɛ ma hi shana tukwuno tu upiana; ubwa zhɛ ma hi shana upiana uhiiŋ nu uywa we elele.

³Mbiso ma tu'ulwatagwụ tu miaụŋ mi Isrɛl kpaaŋ maa, Nụ ụjita umpwa na amɛ upiana ga, bụtụ bụtụ ga shapɛ yɛu-ụgwụdụ, gana na ta atwa ihwɛ bishi bwa namɛ. Yɛu-ụgwụdụ ike i shɛ iwɛ ihwɛ ike du.

⁴Yaa shɛ kaa ihwɛ ike twa sụ maa a yɛ yɛu-ụgwụdụ ike, asha bụtụ na ihwɛ ibwɛ sweni shonungwu na binya bwa, ge shepi bu ko nu gana na tu ufwugwo wa atwa ata namɛ; gana na ta bụtụ bụtụ eri ba ya, ibɛ ɛhi zhɛ hia rɛta atwa iwɛ yɛu-ụgwụdụ ike.

⁵Gɛ yɛu-ụgwụdụ ata hiŋ nama shɛshɛshɛ, ga sha bu na be eyi, ga sha yɛu uywa uko; bacɛnga bu ma na agwụdụ kwo kaa ni iyweywe vwɛ.

⁶Hiɛ shɛ kaa hia ngbaraka bụ tutu ụjita umpwa-ni-bɛ-neshi nu upiana ata, nazhɛ tusotulonu tu tu'ulwatagwụ tu miaụŋ mi Isrɛl kpaaŋ ti zhɛ ta kwụna miaụŋ-ma-agwụdụ aba nu ụrụmɛ ata.

⁷Nazhɛ ɛɛ zhɛ a sala mehieŋ ma aba, a sụkwụtwa mụ ni i'wɛ'wɛ shidubo zalụ hweehwe keeni nụ ụ'wụ'wụ wa azuba odubo umwono ata aa ya aŋ.

⁸Nụ ụjita ata ɛɛ zhɛ a ya usunda ubwa, tinyoso ɛɛ zhɛ o nyoso maa a yɛ na atụla ni iyimɛyɛ nɛ zasa Ifucingɛ.

⁹Kede a yɛ ụnyɛshɛnyɛshɛ o, kede kaa e shiteji o, semi tinyoso, tu uhiuhiu, ti ivwunɛ keeni i'wɛŋnɛ ibwɛ ya amɛ.

¹⁰To lono ma maa inɛ ye elele vwɛ maa iyi heleni iŋ o, inɛ ye elele nɛ vwɛ iyi heleni hwoŋzhingo iŋ ma.

¹¹Gana ɛhi zhɛ hia ya aŋ na: umpo ma amazhɛya ne shimbi shi hiŋ, zwono ma shɛbɛda nɛ shivwɛvwɛjɛ shi hiŋ, 'waŋna ma shekwute ni i'ɛlɛ hiŋ, ya ma ni izɛlɛgwu, tɛkashɛka ta AGWANGWAMA ta a shɛ.

¹²N zhɛ mo dulogo cɛnjɛ ti Ijipti nụ ụjita ata, Ngɛɛ zhɛ ma kwụna miaụŋ-me-eyi mu umbe mɛ cɛnjɛ ti Ijipti kpaaŋ, ta bụtụ, ti iyimabiga. N zhɛ ma pana tuwa ta atwa Ijipti kpaaŋ ulwapɛ: Gamba AGWANGWAMA na.

¹³Mehieŋ ma ata muba mi zhɛ ma sha useyida hiŋ no shimwono shɛ na ahiɛ namanjɛ. Aka na Ngaa kwụbɛ mehieŋ, N zhɛ ma hi kashɛka, tishikpe te elele kaa ti zha shɛ te hi teneni maa tɛ hiɛ njɛ ufwu, na aka na Ama pana atwa Ijipti ulwapɛ o.

¹⁴Hwayɛ ga i shɛ ụjita na maa hi ne teyinje, untangana uŋ ma maa ụ shɛ ụjita isene ya AGWANGWAMA. No shiyono uŋ ma eshe maa u shanɛ awaŋnɛ hiŋ okpogo tutu unyizo-nom.

¹⁵Na amɛ ijitɛ icenje ɛhi zhɛ hia ya iyimɛyɛ nɛ zasa Ifucingɛ. Bacɛnga ma Ifucingɛ no shimwono shi hiŋ nụ ụjita uhiiŋ. Bụtụ be elele na yɛ iyi nɛ 'yajɛ Ifucingɛ; te kwuni nụ ụjita ata tutu ụjita ucenje, ɛ zhɛ o bogwu bu na atwa Isrɛl.

¹⁶Ụjita uhiiŋ ụ shɛ tụ'ulwa te tijilo, ụjita ucenje shaananɛ tu'ulwa te tijilo, hiɛ shɛ shɛ hia nda ugondu we elele na amɛ ijitɛ ɛtɛ iyebi o; semi ugondu iyimɛyɛ nɛ bụtụ bụtụ zhɛ ba ya kiri ɛhi zhɛ hia imanganga.

¹⁷Shiyono ma eshe iwɛ iyi nɛ zasa Ifucingɛ. Iwɛnɛ po nụ ụjita ata gom Ngɛɛ bɛcinjɛ la unyama hiŋ na cɛnjɛ ti Ijipti. Na nda ma isene gɛ na awaŋnɛ hiŋ tutu, okpogo unyizo-nom aa shɛ.

¹⁸Kwuno ma iyimɛyɛ nɛ zasa Ifucingɛ tiya nụ ụrụmɛ ụjita ata umpwa-ni-bɛneshi na amɛ upiana ata uhiiŋ, gana ata ɛhi zhɛ hia ya iŋ tutu ụrụmɛ ụjita woshi-nu-boo-ko nu upiana ata.

¹⁹Kede a kwụbɛ Ifucingɛ no shimwono shi hiŋ tutu ijitɛ ɛtɛ icenje o. Bụtụ be elele na yɛ iyi nɛ 'yajɛ Ifucingɛ, okwo baa shɛ bugaiŋ, kwo kaa umamata, ɛ zhɛ o bogwu bu na tu'ulwa te E'isrɛl.

²⁰Ta ya ma iyi elele nɛ 'yajɛ Ifucingɛ; tutu ofwo na bɛjɛjɛ hiŋ teje o, na ya ma iyi nɛ zasa Ifucingɛ.

²¹Nazhɛ go Moses suyanɛ n-nyarɛ mi Isrɛl kpaaŋ, bɛɛ hiɛŋ aŋ, Bụtụ bụtụ ga tala yɛu-ụgwụdụ iwɛ ukpogwu ubwa, maa hiɛ kwụnɛ iŋ iwɛ isene tɛkashɛka.

²²Jwɛ ma ambɛ ụ'wụ'wụ hisop, iwɛ maa hi shiyeni aŋ ne mehieŋ ma ata mu zweni nu ugbamgbam, maa hi zhizhenji mu nụ ụ'wụ'wụ wa azuba odubo, keeni i'wɛ'wɛ i'ɛŋbi shidubo zalụ hweehwe. Kede bụtụ be elele banɛ no tupohondo uuwa gi iyi yo holo.

²³Iwɛnɛ po AGWANGWAMA zhɛ a kashɛka cɛnjɛ tu ga maa kwụna Ejipti, aka na kaa baa kwụbɛ mehieŋ nụ ụ'wụ'wụ wa azuba odubo keeni i'wɛ'wɛ i'ɛŋbi shidubo zalụ hweehwe, bi zhɛ ba kashɛka odubo ata, bi zha shɛ bo lonono butumwa ata bu tu'wo maa me hi teneni no shimwono shi hiŋ maa ma hi kwụna o.

²⁴No shiyono ma ijɛ eshe, okpogo hiŋ keeni una miaụŋ mi hiŋ aa shɛ tutu unyizo-nom.

²⁵Aka na ehi ci hwuŋ cɛnjɛ ta ata AGWANGWAMA zhɛ ma hi pana, nu gana na ti bee shiri la unu ibɛ, hiɛ shɛ hia untangana ugondu ga.

²⁶Aka na ta miaụŋ mi hiŋ mi hi heŋteni hwuŋ, ɛɛ hiɛŋ, Imbe kwuŋ shɛ ecilo ugondu ga ahia nda banaa?

²⁷Mbiso aŋ ma maa, Ụrụpɛ tɛkashɛka wa AGWANGWAMA na, iwɛnɛ ti bee keshici la shimwono she Isrɛl ni Ijipti, aka na tu baa kwụnɛ la Ejipti, bee bicinji nhwaŋ mu tu. Ibɛ po atwa ata to bizhiri aa zhɛbɛ AGWANGWAMA.

²⁸Nazhɛ miaụŋ mi Isrɛl mi zhe maa njɛ gana na ta AGWANGWAMA peni Moses keeni Aron unu.

²⁹Nụ ụjita tudwonu, ibɛ AGWANGWAMA kwụnɛ miaụŋ-me-eyi mu umbe me Ejipti kpaaŋ, te kwune ni yɛu umbe Faro nɛ jɛjɛ ni idwɛtwɛ ibwɛ, ti yɛu umbe nɛ namɛ nu u'ibwa umwono-tishi, ti yɛu umbe iyimabiga.

³⁰Ga Faro zhinjɛ na amɛ ụjita ata, tu bwa, ta anjɛ-ugondu ubwa kpaaŋ, keeni Ejipti kpaaŋ; iwɛnɛ tu n'ungwa mụ 'wụtụ mɛ shɛnjɛ ni Ijipti. Iwɛnɛ po i zasa ihwɛ ye elele nɛ ru'wo rụ bụtụ ru zasaba o.

³¹Ibɛ po ga Faro suyanɛ Moses keeni Aron nụ ụjita ata, bɛɛ hiɛŋ aŋ, ishijɛ ma, ta ahiɛba ta miaụŋ mi Isrɛl bana ma no olugwo atwa mi, zhaga zhɛba ma AGWANGWAMA gana na ɛhi hiɛŋ.

³²Sugo ma agwụdụ hiŋ, ti iyweywe hiŋ keeni inɛ hiŋ, maa hi hwuri gana na ahiɛ jɛmɛ, maa hi m peni du uwebiye!

³³Ejipti o shishongono atwa ata Isrɛl, maa e beni na cɛnjɛ ta aba ni izɛlɛgwu; iwɛnɛ po ɛ hiɛŋ, Tɛ shɛ ya n'wo kpaaŋ tu.

³⁴Ibɛ po atwa ata suji mihiuŋ ma aba mi iyimɛyɛ mu na mu ta zasa Ifucingɛ, mu na oo go nokwo, e umpenji nkwodo ma aba no tugwuno e petengeni no shitutu sha aba.

³⁵Miaụŋ mi Isrɛl mɛ njɛ ga gana na tu go Moses ge mbishi aŋ, aa lụpɛ Ejipti iyi utakashɛ ya azụrụfa keeni azhɛnarɛya keeni iyi tu'urugono;

³⁶AGWANGWAMA kaa leni maa gɛ iwɛ miaụŋ mi Isrɛl kwụlanɛ atwa Ijipti, ee penenji aŋ iyi nɛ aa lụpɛ aŋ. Tedure ni inɛ ɛtɛ miaụŋ mi isrɛl mu suji i'wɛŋnɛ ye Ejipti kpaaŋ.

³⁷Nazhɛ E'isrɛl kwuni tahaŋnụ ta aba nu Rameses i ci Sukot. Etwenyi na zhe tahaŋnụ ni ivwunɛ a shɛ gana igbɛɛ-akpakwụ-atatụ, (600,000) a 'imɛ shɛ eyikwo na miaụŋ o.

³⁸Unyama wa anya atwa ufwugwo du u 'wa aŋ, ta agwụdụ, ti iyweywe keeni inɛ.

³⁹Ee suji mihiuŋ me ebe aa ga 'waŋnɛ ni Ijipti aa njɛ akara na zasa Ifucingɛ. Iwɛnɛ po e ge te zweni shi mu Ifucingɛ o, iwɛnɛ te e unzhe aŋ na cɛnjɛ ti Ijipti ni izɛlɛgwu, e eri shi a nda ti'insu o, a mama 'imanganjɛ shɛ kaa iwɛ iyimɛyɛ ya aba o.

⁴⁰Bɛ jɛjɛ ba miaụŋ mi Isrɛl na cɛnjɛ ti Ijipti namɛ shiywa akpakwụ-eyebi-nu-talacɛ (430).

⁴¹Nụ ụjita ata ta shiywa sha ata akpakwụ-eyebi-nu-talacɛ shɛ ulwa gom, nazhɛ unyama wa atwa AGWANGWAMA banɛ na cɛnjɛ ti Ijipti.

⁴²Ụjita ata shɛ ụjita na AGWANGWAMA njɛ u'iywa maa bɛcinjɛ aŋ na cɛnjɛ ti Ijipti. Te kwuni nụ ụjita ata ibɛ miaụŋ mi Isrɛl me elele mi shileni AGWANGWAMA maa o no shiyono ụrụmɛ u'iywa ata eshe tutu awaŋnɛ aba kpaaŋ.

⁴³Nazhɛ AGWANGWAMA hiɛŋ Moses keeni Aron, Okpogo isene tɛkashɛka na: Kede bugaiŋ be elele yɛ tu o.

⁴⁴Ama bujama be elele na oo so nu ukwuribi, ee jeji bu teleyi nazhɛ bɛɛ zhɛ ba ya tụ.

⁴⁵Bụtụ bɛ cɛnjɛ ti nya keeni bɛnjɛ-bu-ugondu na aa tụpa alụbashɛ zha shɛ ba ya o.

⁴⁶Na amɛ umwono uko kiri a shɛ a ya tụ; tɛ bɛcinjɛ ma usunda ubwa no tupohondo. Ta bwada ma kaa u'umpwo ubwa okwo uko.

⁴⁷Tụ'ụlwatagwụ ti Isrɛl kpaaŋ tɛ shɛ ta untangana iŋ kpaaŋ aba.

⁴⁸Aka na ta bugaiŋ zhajɛ baa jɛjɛ pi hiŋ, yaa shɛ baa jala maa untanganana AGWANGWAMA tɛkashɛka, asha ge etwenyi aba hwɛɛ jeji teleyi, nazhɛ bee eri bo dongonu maa untangana tụ gana yɛu cɛnjɛ ti Isrɛl. Ama kede bụtụ be elele na te jeji shi teleyi yɛ tu o.

⁴⁹Undwa yɛu-cɛnjɛ ti Isrɛl na bụtụ na zokwu pi hiŋ, ụ shɛ uko.

⁵⁰Miaụŋ mi Isrɛl mɛ njɛ iyi elele nɛ AGWANGWAMA peni Moses keeni Aron unu hwɛɛ.

⁵¹Nụ ụjita ata gbaa ibɛ AGWANGWAMA bɛcinjɛ unyama wa atwa Isrɛl na cɛnjɛ ti Ijipti.