Read bassa ỤBANỤ 14 Bible Online

ỤBANỤ 14 - bassa bible

ỤBANỤ 14

¹Nazhɛ AGWANGWAMA hiɛŋ Moses,

²Mbiso miaụŋ mi Isrɛl maa, ge gwuri mabaaba maa o zokwu nu umbe Pihahirot, na ashashɛ Migdol ni Itekwu ɛtɛ Ishenje, to dongonu Bal-zɛfon.

³Ga Faro zhɛ ba duma iwɛ miaụŋ mi Isrɛl, bɛɛ hiɛŋ, A 'inɛ na cɛnjɛ tu ga, ee zweni kaa na ashashɛ ụshɛka.

⁴Nazhɛ Ngɛɛ zhɛ ma ta amɛ Faro tɛshɛshɛpana, maa mo hi urugono, Ejipti kaa zhɛ a mapa maa Gamba AGWANGWAMA na. Miaụŋ mi Isrɛl kaa mɛ njɛ gana na ta AGWANGWAMA mbishi aŋ.

⁵Aka na te e mbishi agwuma Ijipti, maa atwa ga hwulwo, nazhɛ ahaŋsa ubwa keeni shihaŋsa sha anjɛ-ugondu ubwa shi sheyinji iwɛ atwa ata, ɛɛ hiɛŋ, Imbe nɛ kwuŋ atɛ njɛɛ? Eti leneni E'isrɛl ee genji ugondu tu ee hwuri.

⁶Nazhɛ baa imanganjɛ ihɛŋtu ibwɛ ujasa, bee suji ejeshi ubwa aa 'wa bụ.

⁷Ihɛŋtu ujasa ye Ejipti nɛ kaa bee zenji inɛɛ nɛ zhɛmanjɛ, namɛ akpakwụ-atatụ (600), keeni ihɛŋtu ye Ejipti inyɛ nɛ vwɛ hwɛɛ keeni ehiu ibɛ.

⁸Nazhɛ AGWANGWAMA to amɛ Faro agwuma Ijipti tɛshɛshɛpana, bee urigeni miaụŋ mi Isrɛl iwɛnɛ ta miaụŋ mi Isrɛl mi beni na tụlasụ tụ 'wụtụ.

⁹Ejipti urigeni aŋ, ti idɛkwɛ ya aba, keeni ihɛŋtu Faro keeni ejeshi ubwa elele a na patanganɛ idɛkwɛ, ee jiteni aŋ to o sotulonu nụ ụpalanụ Itekwu Ishenje Pihahirot, nɛ dongonu Bal-zɛfon.

¹⁰Aka na tu ga Faro bo gwumwonu, nazhɛ miaụŋ mi Isrɛl mi shepi eshe, aa kwụbɛ te Ejipti 'wa aŋ ne ekwunyi, ibɛ po inyɛsɛ shɛ miaụŋ mi Isrɛl duwa, aa ugananɛ AGWANGWAMA.

¹¹Ɛɛ hiɛŋ Moses, E'uye bụtụ tuno suu zasaba ni Ijipti upo ebi tu suje maa to 'wo nụ ụshɛka ga? Iwembe po abɛ tɛ njɛ gana gaa; ɛbi ti bɛcinjɛ ni Ijiptii?

¹²Shɛ n-ndumwa mu na eti bi mbishe la ni Ijipti na hŋ? Maa iti genji maa ta ndana atwa Ijipti ugondu. Ugondu we Ejipti tɛnda debeji uhwuri tu'wo tụ ụshɛka ga.

¹³Go Moses hiɛŋ aŋ, Ta nda ma inyɛsɛ o, shikono ma zhirimi, maa hiɛ kwụbɛ gana na AGWANGWAMA zhɛ mo hi bicingo hwayɛ ga. Ejipti ga ahiɛ kwụbɛ hwayɛ ga, hi zha shɛ hia kwụba aŋ ya kwukwuŋ.

¹⁴AGWANGWAMA zhɛ ma hi twagwụ ifelu, nama ma saiiŋ.

¹⁵Nazhɛ AGWANGWAMA hiɛŋ Moses, Iwembe po abụ ma n kala n'ungwaa? Mbiso E'isrɛl maa ge e keeni izhɛ.

¹⁶Shapa bukwuto bu na azuba, maa peteni bu ni itekwu maa meni mu bagwụ, maa miaụŋ mi Isrɛl mu duri itekwu na cɛnjɛ tu hwoo.

¹⁷N zhɛ ma ta Ejipti tɛshɛshɛpana iwɛ maa a 'wa aŋ na amɛ ibɛ, Ngɛɛ zhɛ kaa ma 'yaga ụjɛrụma no ofwo Faro, te ejeshi ubwa hwɛɛ, ti ihɛŋtu ibwɛ ujasa, keeni asụcɛ idɛkwɛ ibwɛ.

¹⁸Ejipti kaa zhɛ a mapa maa Gamba AGWANGWAMA na, ibɛ shɛ aka na ti Ngee meme peteni ụjɛrụma no ofwo Faro, keeni ihɛŋtu ibwɛ ujasa, keeni asụcɛ idɛkwɛ ibwɛ.

¹⁹Nazhɛ butumwa-ba-azuba na go hwulono unyama we E'isrɛl umbe shɛdungwa nu umbe wa aba, bee zhe ne ekwunyi aba. Nazhɛ du udomu ata u tuwam na go hwulono aŋ umbe shɛdungwa nu umbe wa aba wee zhe ne ekwunyi aba,

²⁰waa zhajɛ na ashashɛ unyama we E'isrɛl nu unyama we Ejipti. Nazhɛ udomu ata shanɛ Ejipti tishi, waa shanɛ tuba E'isrɛl uhioko-uhwaŋna, e eri shi momo dongonu na anya uuwa gi iyi yo holo.

²¹Nazhɛ go Moses mbo u'ala ubwa bee peteni uŋ ni itekwu; nazhɛ AGWANGWAMA leni maa uvwugo banɛ zalụ bu uwaŋna-banụ duwa duwa maa u vwunji uuwa gi iyi yo holo, wee shishingeni itekwu ɛtɛ wee gwuricinji iŋ. Baa njɛ maa itekwu bagwụ na ashashɛ, nazhɛ cɛnjɛ tu hwoo tu banɛ.

²²Nazhɛ miaụŋ mi Isrɛl mi duri cɛnjɛ tu hwoo na ashashɛ itekwu, nazhɛ meni mi shikeni nu u'ala ubiye keeni u'ala ugwulwo wa aba gana uba.

²³Ejipti urigeni aŋ tutu ee teni ashashɛ itekwu, ti idɛkwɛ Faro kpaaŋ, ti ihɛŋtu ibwɛ ujasa keeni asụcɛ idɛkwɛ ibwɛ.

²⁴Aka na ti iyi kwuni tusuje nu uvwungwa, AGWANGWAMA kaa namɛ na amɛ ulwa ata u tuwam keeni udomu ata u tuwam, baa kwụbɛ unyama we Ejipti, bee kwuni unyama we Ejipti ụbaụta tụpana.

²⁵Baa unshanjɛ ikɛgbɛ ihɛŋtu ya aba, ibɛ po tusuka ti ibɛ tu gwumanɛ aŋ. Ejipti hiɛŋ, Hwure ti gezhigeni ma E'isrɛl; iwɛnɛ ta AGWANGWAMA a twagwụ aŋ ifelu no tu.

²⁶Nazhɛ AGWANGWAMA hiɛŋ Moses, Mba u'ala bụ maa peteni uŋ ni itekwu, iwɛ maa meni mu gwure mu twa maa mu tweri Ejipti, ti ihɛŋtu ya aba keeni asụcɛ idɛkwɛ ya aba.

²⁷Go Moses mbo ga u'ala ubwa bee peteni uŋ ni itekwu, maa uuwa iyi heri, meni mu gwure nu urubwo muba, Ejipti kwuni mu tugozhigono, AGWANGWAMA iricinji aŋ na ashashɛ itekwu ɛtɛ.

²⁸Ibɛ meni mu gwure maa 'imɛ ihɛŋtu ujasa, keeni asụcɛ idɛkwɛ, keeni unyama wa atwa Faro kpaaŋ a na ga 'wa E'isrɛl teni ni itekwu ɛtɛ; okwo bu ko aba benengeni shi o.

²⁹Ama miaụŋ mi Isrɛl mi zhe tahaŋnụ na cɛnjɛ tu hwoo ee keshi itekwu; meni mi shikeni nu u'ala ubiye keeni u'ala ugwulwo wa aba gana uba.

³⁰Gana AGWANGWAMA bicinji E'isrɛl ni i'ɛlɛ ye Ejipti nụ ụjita ata ta. E'isrɛl kwụbɛ n'wo me Ejipti tu ma patanganɛ nụ ụpalanụ itekwu ɛtɛ.

³¹E'isrɛl kwụbɛ ukpahiŋ ụ'wụtụ na AGWANGWAMA njɛ baa sukakanɛ Ejipti, ibɛ po aa sụmɛ AGWANGWAMA inyɛsɛ; aa tɛtanɛ bụ kaa du rishe keeni yɛu ibwɛ ugondu go Moses.