Read bassa ỤBANỤ 16 Bible Online

ỤBANỤ 16 - bassa bible

ỤBANỤ 16

¹Nazhɛ tu'ulwatagwụ tu miaụŋ mi Isrɛl kpaaŋ kpaaŋ ti beni ni Elim, ee ci ụshɛka Sin, na namɛ na ashashɛ Elim nu Sainai, nụ ụjita umpwa-ni-bɛ-tɛ nu upiana uyebi na ta a banɛ na cɛnjɛ ti Ijipti.

²Ibɛ tu'ulwatagwụ tu miaụŋ mi Isrɛl tu kwuni Moses keeni Aron tungwulongongono nụ ụshɛka ata.

³Ɛɛ hiɛŋ aŋ, I gɛ zhɛ yo dobogo yebe maa AGWANGWAMA ụtụ kwụnɛ na cɛnjɛ ti Ijipti aka na ata ya la usunda, ata ya iyimɛyɛ oto shigogo; ehi tu suje nụ ụshɛka ga maa hiɛ kwụnɛ tu'ulwatagwụ tu ga kpaaŋ ni imunɛ.

⁴Nazhɛ AGWANGWAMA hiɛŋ Moses, Hioko, N zhɛ ma nda maa iyimɛyɛ ngbe na azuba maa atwa ga na zha, maa a na zanga gana na gembi aŋ iyi-heri, maa Ma manga aŋ, okwo ɛ zhɛ a 'wa undwa mu kwo kaa a zha shɛ o.

⁵Nụ ụjita ucihiŋ, ɛ zhɛ a imanga inɛɛ nɛ aa zanjɛ, ɛ zhɛ a zanga gana na aa shana a zanga iyi-heri karɛ yebi.

⁶Go Moses keeni Aron hiɛŋ atwa Isrɛl kpaaŋ, Nụ ụrụmɛ hwayɛ, hi zhɛ hia mapa maa AGWANGWAMA ubwa ihi bɛcinjɛ na cɛnjɛ ti Ijipti.

⁷Nu uvwungwa, ɛhi zhɛ hia kwụba ụjɛrụma wa AGWANGWAMA, iwɛnɛ tu baa hwụjɛ gana na ohio ngwulongongono bu. Gaaba kwuŋ atɛ shɛ upo ehi mo tu ngwulongongonoo?

⁸Go Moses hiɛŋ aŋ, AGWANGWAMA zhɛ ma hiɛ panɛ hwayɛ usunda nụ ụrụmɛ, bɛɛ zhɛ ma hi panɛ iyimɛyɛ tishigwo nu uvwungwa, iwɛnɛ tu baa hwụjɛ to ohio ngwulongongono bu. Tungwulongongo tu ga ti hiŋ, shɛ atuba ohio ngwulongongono semi AGWANGWAMA.

⁹Go Moses hiɛŋ Aron, Mbiso tu'ulwatagwụ tu miaụŋ mi Isrɛl kpaaŋ maa, Kaanɛ ma izhɛ hi gwumwonu nu umbe wa AGWANGWAMA, iwɛnɛ tu baa hwụjɛ tungwulongongo ti hiŋ.

¹⁰Gana na tu ga Aron mbishi tu'ulwatagwụ tu miaụŋ mi Isrɛl kpaaŋ iwɛ ɛtɛ, aa mbiyanɛ geri bụ ụshɛka, aa kwụbɛ tụ ụjɛrụma wa AGWANGWAMA bananɛ aŋ nu udomu.

¹¹Nazhɛ AGWANGWAMA hiɛŋ Moses,

¹²N hwugwa tungwulongongo tu miaụŋ mi Isrɛl; mbiso aŋ maa, Aka na ti iyi rimeni hwayɛ hi zhɛ hia ya usunda, ɛhi zhɛ tuba hia ya iyimɛyɛ tishigwo beyi nu uvwungwa; iwɛ maa e mepi maa Gamba n shɛ AGWANGWAMA na shɛ Agwatana aba.

¹³Aka na tụ ụrụmɛ shɛ, shorubo shi hirɛ shee urigeni tu'ulwatagwụ ta aba. Nu uvwungwa cime tu 'weri too rungwutwonu tu'ulwatagwụ ta aba.

¹⁴Aka na te cime tu 'waŋ, ibɛ iyi ike tindɛpɛ ndɛpɛ ubeni nụ ụshɛka ata, i cɛnjɛmɛ gana cime ti ticwɛŋ cwɛŋ.

¹⁵Aka na te E'isrɛl kwụbɛ iŋ, aa mama hiaŋnụ, Imbe nɛɛ?[8] Iwɛnɛ po e mepi shi iyi nɛ yaa shɛ o. Go Moses hiɛŋ aŋ, Iyimɛyɛ nɛ AGWANGWAMA ihiɛ panɛ maa hiɛ yɛ ta.

¹⁶Unu na AGWANGWAMA ihi peni na, bi hiɛŋ; Bụtụ bụtụ ga zanga gana na ti bee eri ba ya; hiɛ shɛ hia zanga ne bimenji bu oma bu ko, te teni cɛŋ nu ufwugwo wa atwa na ahiɛ 'yajɛ nu nhwaŋ mi hiŋ.

¹⁷Miaụŋ mi Isrɛl mɛ njɛ gana ata, umeseyi uko zenji duwa, umeseyi uko zenji cwɛŋ.

¹⁸Ama aka na te e menji iŋ ne bimenji bu oma, inɛ ya atwa na zenji duwa vwɛ shɛ, inɛ ya atwa na kaa zenji cwɛŋ 'nyanɛ shɛ. Bụtụ bụtụ suji nu gana na ti be eri ba ya.

¹⁹Go Moses hiɛŋ aŋ, Kede iyi heleni inɛ bụtụ be elele o.

²⁰Ama atwa oko hwụjɛtanɛ shɛ Moses iwɛ o, iyi heleni inɛ ya atwa oko, yee fwoshi, yee teni eshishi, yaa 'yajɛ ụhiụŋ; go Moses njɛ isɛbwɛ na aba.

²¹Nu uvwungwa uvwungwa aa zanga iŋ, bụtụ bụtụ ba zanga gana na ti bee eri ba ya; ama aka na tu uwaŋna cɛ, yo no.

²²Ee zenji nụ ụjita ucihiŋ timenji ti yebi yebi. Aka na ehwurembe tu'ulwa ta ata hwɛɛ zhajɛ ee mbishi Moses,

²³bɛɛ hiɛŋ aŋ, AGWANGWAMA hi peni-unu bɛɛ hiɛŋ, Beyi shɛ Ụjita-ụhinjanụ tijilo wa AGWANGWAMA; inɛɛ nɛ i shɛ maa hi to ta ma, inɛɛ nɛ kaa i shɛ maa hi shiteji shitogo ma, inɛ ye elele nɛ ihi vwanɛ swaka ma iwɛ beyi nu uvwungwa.

²⁴Ee sweci ga inɛɛ nɛ vwɛ gana na tu go Moses mbishi aŋ, i fwoshi shi, i teni shi kaa eshishi o.

²⁵Go Moses hiɛŋ aŋ, Ya ma inɛ ɛtɛ hwayɛ ga, iwɛnɛ tu hwayɛ shɛ Ụjita-ụhinjanụ wa AGWANGWAMA, hi zha shɛ hia kwụba iŋ no tupohondo.

²⁶Ijitɛ icihiŋ ɛhi zhɛ hi na zanga iŋ, ama nụ ụjita ucenje, na shɛ Ụjita-ụhinjanụ, i zha shɛ ya nama okwo ike o.

²⁷Ama nụ ụjita ata ucenje umeseyi uko beni maa a zanjɛ, ama a kwụbɛ shɛ okwo ike o.

²⁸Nazhɛ AGWANGWAMA hiɛŋ Moses, Ụkwụmbwụ naa ɛhi zhɛ hia ganga tulaka to onu-tupana mi keeni andwa mi tu'untanganaa?

²⁹Kwụba, N hi pwonuo Ụjita-ụhinjanụ, iwɛbɛ po Ngee hi peni iyimɛyɛ nụ ụjita ucihiŋ iwɛ ijitɛ iyebi du, iwɛ maa ga bụtụ bụtụ na gɛga nu urubwo ubwa, maa kede bụtụ be elele beni nu urubwo ubwa nụ ụjita ata ucenje o.

³⁰Gana atwa ata to ụhinjanụ nụ ụjita ata ucenje ta.

³¹E'isrɛl po iŋ izeci, ɛɛ hiɛŋ, Mana. I cɛnjɛmɛ, i sụbɛ izɛgwu ivwɛgɛ, ụlatụ ibɛ ụ shɛ gana agbagbada na ee zweni iswɛ.

³²Go Moses hiɛŋ aŋ, AGWANGWAMA iti peni-unu, bɛɛ hiɛŋ, Ge sweci mana tutu awaŋnɛ hiŋ kpaaŋ, iwɛ maa a kwụbɛ hwuŋ iyimɛyɛ nɛ baa tɛ bɛjɛ la nụ ụshɛka, aka na bɛɛ ti bɛcinjɛ na cɛnjɛ ti Ijipti.

³³Go Moses hiɛŋ Aron, Shapɛ ikwɛshɛ ike maa zweni mana ne bimenji bu oma bu ko, maa sweci iŋ na agba AGWANGWAMA, iwɛ awaŋnɛ hiŋ na te ci.

³⁴Gana na ta AGWANGWAMA peni Moses unu, gana ata ga Aron sweci iŋ no ofwo Ikpɛtɛ Unu-tutwa, maa a ngbaraka iŋ apata.

³⁵E'isrɛl kaa yɛ mana ata shiywa buhanda, tutu e ci cɛnjɛ ti Kenan ofwo na maa a nama.

³⁶(Bimenji bu oma woshi bɛ shɛ gana ugaruwa uko).