Read bassa ỤBANỤ 17 Bible Online

ỤBANỤ 17 - bassa bible

ỤBANỤ 17

¹Tụ'ụlwatagwụ tu miaụŋ mi Isrɛl kpaaŋ tu kwuni tahaŋnụ ta aba, te e beni nụ ụshɛka Sin kwurɛ kwurɛ, nu gana na ta AGWANGWAMA peni aŋ unu. Ee zhe a namɛ no ofwo oko na ɛɛ hiɛŋ Rifidim. Ama meni mu zasaba apata maa atwa ata swe o.

²Ibɛ po atwa ata sukakanɛ Moses; ɛɛ hiɛŋ, Utu panɛ meni maa ta swa. Go Moses hiɛŋ aŋ, Iwɛmbe po kwuŋ ahi ma n sukakanaa? Iwɛmbe po kwuŋ ahia manga AGWANGWAMAA?

³Ama i'uyɛ ya kwụna kaa atwa ata, ibɛ po atwa ata uranjɛ Moses tungwulongongono, ɛɛ hiɛŋ, Iwɛmbe po ɛbi ti bɛcinjɛ ni Ijipti iwɛ maa ụtụ kwụnɛ ni i'uyɛ ta miaụŋ mu tu, ti iyimabiga tu hwɛɛɛ?

⁴Iwɛbɛ po go Moses keri AGWANGWAMA n'ungwa, bɛɛ hiɛŋ, Imbe Ngɛɛ zhɛ ma nda atwa gaa? I vwɛ cwɛŋ maa e n tegeni atayɛ.

⁵Nazhɛ AGWANGWAMA hiɛŋ Moses, sugo umeseyi n-nyarɛ mi Isrɛl maa hwuri umbe na atwa ata maa a bụ 'wa. 'Waŋna bukwuto ata ebi beji la Urefu Nayɛl.

⁶Hioko, N zhɛ mo bu hwulono umbe mo shikono nu uparatayɛ Ishɛmɛ Sainai, dubo uparatayɛ ata, meni mi zhɛ ma banɛ nu ubwa, iwɛ maa atwa ata swe. Go Moses njɛ gana ata ne eshe n-nyarɛ mi Isrɛl.

⁷Boo po apata izeci maa, Masa keeni Meriba, iwɛnɛ ta miaụŋ mi Isrɛl mu sukakanɛ AGWANGWAMA keeni ee menji bu, ɛɛ hiɛŋ, AGWANGWAMA namɛ na ashashɛ tu hiŋ okwo bu zasaba?

⁸Nazhɛ Amɛlɛk sukakanɛ E'isrɛl nu ujasa ni Rifidim.

⁹Ibɛ po go Moses hiɛŋ Joshua, Iti teleji etwenyi maa beni njɛ ujasa na Amɛlɛk beyi. N zhɛ tuba mo shikono ne bikpekwu ga, Ma 'waŋna bukwuto ga ba Agwatana ni i'ɛlɛ mi.

¹⁰Go Joshua njɛ ga gana na tu go Moses mbishi bu, baa twa ifelu na Amɛlɛk, Go Moses na Aron keeni Hu, munji ni ihiŋhiŋ bikpekwu ata.

¹¹Aka elele na go Moses shikicinji i'ɛlɛ ibwɛ na azuba, ukpahiŋ we E'isrɛl wa lasụ; ama aka elele na bee zucinje i'ɛlɛ ibwɛ, ukpahiŋ wa Amɛlɛk wa lasụ.

¹²Ama i'ɛlɛ Moses kwuni tulwogo, nazhɛ ata Aron no Hu shiri utayɛ nu ukaka ubwa baa jɛjɛ nu bwa, ga Aron keeni Hu untanganɛ i'ɛlɛ ibwɛ. Bụtụ bu ko namɛ zalụ bu u'ala uko, bụtụ bi yebi namɛ zalụ bu u'ala uyebi. Gana ata ee suji i'ɛlɛ ibwɛ na azuba tutu uwaŋna teni.

¹³Gana aa njɛ nazhɛ go Joshua iricinji Amɛlɛk hwɛɛ nu utokwobi ta.

¹⁴Ibɛ po AGWANGWAMA hiɛŋ Moses, 'Nyata rụrụkwụkwụ ri ijɛ nu utakada, maa e ne teyinje iŋ hwuŋ. Mbiso Joshua maa, N zhɛ mo iricingo Amɛlɛk hwɛ hwɛɛ nu unyizo.

¹⁵Ibɛ po go Moses mo utukwu-ụrụpɛ, boo po uŋ izeci maa, AGWANGWAMA ubwa shɛ igɛrigɛ mi.

¹⁶Bɛɛ hiɛŋ, Gana na tu u'ala shepi igɛrigɛ ya AGWANGWAMA na azuba![9] AGWANGWAMA kaa zhɛ ba uranga ujasa tɛnda na awaŋnɛ Amɛlɛk elele tutuu.