Read bassa ỤBANỤ 23 Bible Online

ỤBANỤ 23 - bassa bible

ỤBANỤ 23

¹To no mburusonu unabarɛ ụzagwụ o. To togwu kaa na bụtụ bu tugworozwo maa le tiseyida tu tukata o.

²Ta 'wa atwa ofwugwo maa njɛ iyi iwɛ o, ta 'wa kaa atwa ofugwo maa le tiseyida tu na to ubo ụshɛrɛya u tishiriri o.

³Ta na zanga atwa iwɛnɛ bụtụ shɛ bukofwo maa ubi n-ndumwa mu bwa o.

⁴Yaa shɛ abụ twa na buna kwo kaa izhinyɛci bụtụ bụ bi i'ime tu ba ina, imɛ bụ maa gwuricingeni bu.

⁵Yaa shɛ abụ kwụbɛ izhinyɛci bụtụ na mo bu imo ti i'wɛŋnɛ iri bu, ti bee weci, ta ganga bu o, bɛ shɛ bo mbiyono bu ti'ishicinjɛ.

⁶To ubo ụshɛrɛya wa atwa bụ na shɛ okofwo.

⁷Ta na dumangana bụtụ n-ndumwa mu tukata o, ta kwụna kaa bụtụ na i'ɛlɛ ibwɛ zasaba ni iwɛ keeni bụtụ bi tiririri o, iwɛnɛ po N zha shɛ ma pana ugworozwo n-ndumwa-zhɛ o.

⁸Ta lashɛga ukwuribi ugworo, iwɛnɛ tu ukwuribi ugworo wo lubicingo bụtụ na eshe ubwa ga kapɛshɛngwa, wo ubo du sasana ụshɛrɛya wa atwa na n-ndumwa mu ga zhɛmɛ.

⁹Ta nda bugaiŋ umungwuta o, iwɛnɛ te ehi mepi du gana na ta amɛ bugaiŋ shɛ, iwɛnɛ ta ahiɛ shɛwa la agaiŋ na cɛnjɛ ti Ijipti.

¹⁰Shiywa shi cihiŋ ɛbi zhɛ ba bila iyi na cɛnjɛ tụ bụ maa jicinje tụ'walụ ti ibɛ.

¹¹Ama nu uywa ucenje, bi zhɛ ba ganga tụ maa tu to ụhinjanụ maa vwɛ i'ɛlɛ bụ iwɛ maa okofwo na amɛ atwa bụ a yɛ, ge iyi ye ehilo yɛ inɛ ɛtɛ ee gengenji. Gabata du abɛ shɛ ba nda ni itimɛ bụ ya afwafwa keeni itimɛ i'wɛ'wɛ buta bụ.

¹²Ijitɛ icihiŋ abɛ shɛ ba nda ugondu bu, ama nụ ụjita ucenje bɛ shɛ ba ta ụhinjanụ, iwɛ maa buna bụ, ni izhinyɛci bụ to ụhinjanụ, iwɛ maa ajama bụ, keeni agaiŋ bu to du ụhinjanụ.

¹³No shiyono iyi elele nɛ Ngee bi mbishi eshe, te ne Teyinje tuwa te elele o, kede bụtụ be elele hwụjɛ izeci tuwa nu unu bu o.

¹⁴Karɛ tatụ ɛbi zhɛ bu ma untanganana isene na amɛ uywa uywa.

¹⁵Na untangana isene ibrɛd nɛ zasa Ifucingɛ, ibrɛd ɛtɛ zasa Ifucingɛ ɛbi zhɛ ba ya na amɛ ijitɛ ɛtɛ icenje, aka na Ngee hi dweji nu upiana Abib,[12] nu gana na ti Ngee bi shileni, iwɛnɛ po nu upiana ata la abụ banɛ ni Ijipti. Kede bụtụ be elele pushe na agba mi ni i'ɛlɛ yo ohondo.

¹⁶Bɛ shɛ ba untangana isene iyi ye ehilo tijicinje, ibɛ shɛ tụ'walụ ti hiiŋ na amɛ iyi tibila ti itimɛ bu. Bɛ shɛ ba untangana isene iyimɛyɛ tijicinje, aka na tu uywa zhɛrɛ, ibɛ shɛ aka na te ebi jicinje iyi ye ehilo nɛ abɛ njɛ ụbaụta ibɛ nu ushwo.

¹⁷Karɛ tatụ na amɛ uywa we elele etwenyi bu kpaaŋ zhɛ a zhajɛ nu umbe Agwangwama na shɛ Agwatana bụ.

¹⁸To hiŋtotongo mehieŋ mi iyi ụrụpɛ mu ni iyimɛyɛ nɛ 'yajɛ Ifucingɛ o, kede manɛbɛ mu usunda iyi isene mi mu nama tutu gi iyi yo holo.

¹⁹Ga shɛ iyi ihiiŋ nɛ abụ ụshɛjɛ uywa, na amɛ iyi cɛnjɛ tụ bụ, ɛbi zhɛ be suje nu umwono wa AGWANGWAMA na shɛ Agwatana bụ. To shitogo yɛu biywoywo kwo kaa ụgwụdụ no mosubo mo bino bwa o.

²⁰Hioko, N zhɛ ma tumwanɛ butumwa mi ba azuba nu umbe bu iwɛ maa ma bụ untangana nu uhwaŋna ata, maa ma bụ zarɛga no ofwo ata Ngaa imanganjɛ.

²¹Na shɛlaga iwɛ ubwa tebiye, maa na hwuga-unu ubwa, ta tana bụ tigezhe o. Iwɛnɛ po bi zha shɛ ma bụ gangana tigezhe tụ bụ o; iwɛnɛ ti izeci mi namɛ na amɛ ubwa.

²²Ama yaa shɛ aba hwuga-unu ubwa ni iwɛ-tɛkana, aba nda kaa iyi elele nɛ Ngaa jɛmɛ, nazhɛ Ngɛɛ zhɛ ma sha bụtụ bi i'ime ba atwa i'ime bu, keeni busukakanɛ ba atwa na ma bụ sukakana.

²³Iwɛnɛ po butumwa mi ba azuba zhɛ ma bụ 'yagana umbe maa ma bụ zarɛga na cɛnjɛ ta A'amo, nɛ Ɛhit, nɛ Ɛpɛrɛz, ne Ekenan, nɛ Ɛhiv keeni Ɛjɛbus; nazhɛ Ngɛɛ zhɛ mo iricingo aŋ kpaaŋ.

²⁴To kwuzono tuwa ta aba maa na zhɛba tu o, ta nda gana na tu ugondu wa aba shɛ o, ama hwuŋzotongo tu kpaaŋ, maa du bwereteji ntatanuwaŋ ma aba rukwu rukwu.

²⁵Na zhɛba AGWANGWAMA na shɛ Agwatana bụ, nazhɛ Ngɛɛ zhɛ ma pana iyimɛyɛ bu keeni meni mụ bụ uwebiye. N zhɛ kaa mo sugo ụngwụ maa u beni na ashashɛ hiŋ.

²⁶I zasa iyi elele nɛ zhɛ ya basaga kwo kaa nɛ zhɛ ya sha bu'ulo na cɛnjɛ tụ bụ o, N zhɛ ma nda maa yɛ uraiŋ te ilegeji.

²⁷N zhɛ mo hwuricingo inyɛsɛ mi umbe na bụ, N zhɛ kaa ma garataga atwa na ma bụ sukakana, N zhɛ ma nda maa ga atwa i'ime bu e bi gezhigeni.

²⁸N zhɛ ma tumwanɛ shɛzazagwuma nu umbe bu, aba zhɛ mo bu unzongo Ɛhiv, ne Ekenan keeni Ɛhit maa e bi gezhigeni.

²⁹N zha shɛ mo bu unzongo aŋ nu uywa uko gba o, iwɛ aka na cɛnjɛ ti zhɛ ta sha ụshɛka, isundɛ ehilo zhɛ mo bu hwulo ufwugwo.

³⁰N zhɛ mu no bu unzongo aŋ dice dice, uuwa i ci aka na ehi gembi ufwugwo maa hi leshegeji cɛnjɛ ta ata kpaaŋ.

³¹N zhɛ kaa me shire tugwungwu tụ bụ te kwune ni itekwu Ishenje tutu Itekwu ya Afilistia keeni te kwune nu ụshɛka tutu Urefu Yufretis. N zhɛ ma nda maa eri atwa cɛnjɛ ta ata tụlasụ, nazhɛ ɛbi zhɛ bo unzo aŋ maa e beni nu umbe bu.

³²Ta twa-unu na aba, kwo kaa na tuwa ta aba o.

³³A shɛ shɛ a nama na cɛnjɛ tụ bụ o, iwɛ aka na ɛɛ zhɛ ma bu ana iwɛwɛ tɛnda pi mi, yaa shɛ aba zhɛba tuwa ta aba, asha ti zhɛ ta bụ shana ugwuru na zhɛ ma bu ima maa na ma nda i'wɛwɛ.