Read bassa ỤBANỤ 24 Bible Online

ỤBANỤ 24 - bassa bible

ỤBANỤ 24

¹Nazhɛ bɛɛ hiɛŋ Moses, Munje pi mi, tu gabụ, tu ga Aron, na Nadab, na Abihu keeni n-nyarɛ mi Isrɛl dupu-nu-woshi (70), maa hi nama taa dụlụ hi na zhɛba.

²Go Moses kiri zhɛ bo gwumwonu ne mi, ama atwa vwɛ zha shɛ o gwumwonu o, kede atwa vwɛ kaa munje na bu o.

³Go Moses zhajɛ bee mbishi atwa ata n-ndumwa mu na AGWANGWAMA mbishi bu kpaaŋ, keeni andwa na bee tilegeni kpaaŋ, ibɛ atwa ata jishijɛ zhiaaŋ, ɛɛ hiɛŋ, Iwɛ ye elele nɛ AGWANGWAMA jɛmɛ ti zhɛ ta nda iŋ.

⁴Go Moses 'nyeci unu na AGWANGWAMA peni aŋ kpaaŋ. Baa gbatụ ti'ishijɛ nu uvwungwa dididi boo mo utukwu-ụrụpɛ ne embi Ishɛmɛ ɛtɛ, bee shikecenji apata atukpa atayɛ umpwa-na-ba-eyebi nu gana na ta alamụ miaụŋ mi Isrɛl namɛ.

⁵Baa tumwanɛ esemberi miaụŋ mi Isrɛl, ibɛ atwa ata kwunanjɛ AGWANGWAMA inɛ nụ ụrụpɛ tuhwoŋzhingo keeni ụrụpɛ wa amɛ-olom.

⁶Go Moses zweni ashashɛ mehieŋ ma ata mu ko nu ugbamgbam, bee shepi ashashɛ mu na ata mụ vwɛ bee zhizhenji mu nu utukwu-ụrụpɛ.

⁷Nazhɛ bee shepi utakada ata unu-tutwa, baa rɛtanjɛ atwa ata maa a hwụjɛ. Nazhɛ ɛɛ hiɛŋ, Iyi elele nɛ AGWANGWAMA jɛmɛ, ti zhɛ ta nda, ti zhɛ kaa ta hwuga-unu ubwa.

⁸Go Moses shepi mehieŋ ma ata mu zweni nu ugbamgbam bee zhizhenji atwa ata na tu'waba, bɛɛ hiɛŋ, Hioko ma, mehieŋ mu unu-tutwa na AGWANGWAMA twa ne hiŋ na, ibɛ shɛ iwɛ unu we elele na bee hi peni.

⁹Go Moses na Aron, na Nadab, na Abihu keeni n-nyarɛ mi Isrɛl dupu-nu-woshi munji ni Ishɛmɛ ɛtɛ.

¹⁰Aa kwụbɛ Agwatana Isrɛl. Iyi nɛ bee petengeni ɛvwɛvwɛjɛ ubwa i shɛ gana ofwo na ee dibeni na atayɛ Safiya, i namɛ shɛshɛshɛ gana tụla gom.

¹¹Bi peni shi kaa ehiu ata miaụŋ mi Isrɛl ulwapɛ o, a kwụbɛ kaa Agwatana, a yɛ iyi, ee swe hwɛɛ aba.

¹²Nazhɛ AGWANGWAMA hiɛŋ Moses, Munje pi mi ni Ishɛmɛ gɛ, maa shɛlana apata. N zhɛ ma bụ pana atayɛ ata tụpatakwụ patakwụ anaa na Ngee 'nyeci undwa, keeni unu-tupana iwɛ maa atwa ata seshi.

¹³Nazhɛ go Moses ishijɛ abana ni yɛu ibwɛ ugondu go Joshua, go Moses munji ni Ishɛmɛ ɛtɛ ya Agwatana.

¹⁴Go Moses hiɛŋ n-nyarɛ ma ata, itɛ shɛlana ma epe uuwa i ci aka na etu gwure pi hiŋ. Hioko ma, ga Aron, no Hu a mbata namɛ ne hiŋ; bụtụ be elele na 'yajɛ n-ndumwa ga zhagana aŋ.

¹⁵Go Moses munji ni ihiŋhiŋ Ishɛmɛ ɛtɛ, ibɛ udomu ubi ihiŋhiŋ Ishɛmɛ ɛtɛ.

¹⁶Nazhɛ tuta tụ ụjɛrụma wa AGWANGWAMA ti kezhe taa patanɛ ni ihiŋhiŋ Ishɛmɛ ɛtɛ Sainai, udomu ata ubi Ishɛmɛ ɛtɛ tutu ijitɛ icihiŋ; nụ ụjita ucenje nazhɛ AGWANGWAMA suyanɛ Moses na ashashɛ udomu ata.

¹⁷Hioko, tuta tụ ụjɛrụma ata wa AGWANGWAMA kaa tɛ shɛ gana ulwa na wo songo iyi ni ihiŋhiŋ ishɛmɛ ɛtɛ, ne eshe miaụŋ mi Isrɛl.

¹⁸Go Moses munji ni ihiŋhiŋ Ishɛmɛ ɛtɛ bee teni nu udomu ata. Baa namɛ apata iwɛŋnɛ buhanda ni ijitɛ buhanda.