Read bassa ỤBANỤ 25 Bible Online

ỤBANỤ 25 - bassa bible

ỤBANỤ 25

¹Nazhɛ AGWANGWAMA hiɛŋ Moses.

²Mbiso miaụŋ mi Isrɛl maa ga a m panɛ upwaŋ u tukwulana. N leshigeni ma upwaŋ ata u tukwulana no olugwo bụtụ be elele na yaa kwụlanɛ na amɛ ubwa.

³Upwaŋ u tukwulana na ɛhi zhɛ hia lashɛga ni i'ɛlɛ ya aba na: azhɛnarɛya, na azụrụfa, keeni ɛtumburɛ,

⁴ni iyi uduhwa wa ababa, keeni uduhwa ushenje, ni inɛ ishenje howuu keeni ihwehwe ilinɛn nɛ a hiɛŋshɛ tanɛ tanɛ, keeni tihiŋzhe ti iyweywe,

⁵ni i'wɛbɛ ya adagba nɛ a kwụnɛ iyi ishenje, ni i'wɛbɛ isundɛ itekwu, nụ ụ'wụ'wụ we ekeshia,

⁶keeni manɛbɛ, iwɛ asụtụla, ni iturɛre nɛ oo zwono manɛbɛ mu na oo dudugono bụtụ, ni iturɛre ụhiụŋ ụlatụ,

⁷keeni atayɛ onɛkis, na atayɛ na aa ta ni efod[13] keeni iyi tu'ubono na agba.

⁸Iwɛ maa a n ndanɛ ohwolu tijilo maa Mu na gɛga na ashashɛ aba.

⁹Nda ohwolu ata tijilo keeni i'wɛŋni'wɛŋni ya aba ne bimenji ga Ngɛɛ zhɛ mo bu mbisono gom.

¹⁰Ga a njɛ ikpɛtɛ ɛtɛ nụ ụ'wụ'wụ we ekeshia, ga ụnjɛswa ibɛ ụ shɛ bimenji bi imbele i'ɛlɛ iyebi na ashashɛ, go uholo ibɛ ụ shɛ ombolo u'ala oko na ashashɛ, go uzoto ibɛ ụ shɛ ombolo u'ala oko na ashashɛ.

¹¹Swana iŋ azhɛnarɛya tụrụmbɛɛ, ta amɛ ta aba ibɛ, maa peteni iŋ azhɛnarɛya ni izhɛmi ibɛ tutu rungwutwonu.

¹²Ndana iŋ tɛkanɛ ti neshi na azhɛnarɛya maa cimbengeni tu ne esugwulumi ibɛ eneshi, ga tɛkanɛ ti yebi tu nama zalụ bu ko, tɛkanɛ ti yebi tu nama zalụ yebi ibɛ.

¹³Shaba imbele iyebi nụ ụ'wụ'wụ we ekeshia maa sweni iŋ azhɛnarɛya.

¹⁴Sugo imbele ɛtɛ maa hwuŋtengeni iŋ na tɛkanɛ ta ata zalụ hweehwe bi ikpɛtɛ ɛtɛ, maa a na 'waŋna iŋ ni imbele ɛtɛ.

¹⁵Kede e hwuceci imbele ɛtɛ ɛɛ zhɛ o hwuŋtongono na tɛkanɛ ta ata ti ikpɛtɛ ɛtɛ o.

¹⁶Bɛ shɛ kaa bo zwono atayɛ ata tụpatakwụ patakwụ unu-tutwa 'nyeci a na Ngɛɛ zhɛ ma bụ pana na amɛ ikpɛtɛ ɛtɛ.

¹⁷Bɛ shɛ kaa ba ndana ikpɛtɛ ɛtɛ ajɛjɛ inyɛmɛnyɛmɛ,[14] ibɛ shɛ tu'urugono na azhɛnarɛya tụrụmbɛɛ, ga ụnjɛswa ibɛ ụ shɛ bimenji bi imbele i'ɛlɛ iyebi na ashashɛ, go uholo ibɛ ụ shɛ ombolo u'ala oko na ashashɛ.

¹⁸Dubo azhɛnarɛya maa njɛ iyi-uumwa ya apiambɛ iyebi nɛ 'yajɛ apɛshɛka bụtụ maa swenenji iŋ ni ipɛlu tu'urugono ti ikpɛtɛ ɛtɛ zalụ hweehwe.

¹⁹Ga buna buna nama nu ukwunanga zalụ hweehwe, ga a mama imanụ no tu'urugono ta ata tɛ shɛ ajɛjɛ ata inyɛmɛnyɛmɛ ni ipɛlu zalụ hweehwe.

²⁰Ge iyi-uumwa ɛtɛ momo pononu eshe maa e mbeci apiambɛ aba, maa e urigeni azuba bɛjɛjɛ ata bi inyɛmɛnyɛmɛ, ge eshe aba zwe a ngbaraka bɛjɛjɛ ata bi inyɛmɛnyɛmɛ.

²¹Patana bɛjɛjɛ ata bi inyɛmɛnyɛmɛ na azuba ikpɛtɛ ɛtɛ; nazhɛ suji atayɛ ata tụpatakwụ patakwụ Ngɛɛ zhɛ ma bụ pana maa zweni na amɛ ikpɛtɛ ɛtɛ.

²²Na azuba ikpɛtɛ ɛtɛ Ngɛɛ zhɛ mu na twa na bụ. N zhɛ mu na nama na ashashɛ apiambɛ iyi-uumwa ɛtɛ patanganɛ ni ikpɛtɛ ɛtɛ unu-tutwa maa Mu na bụ pana-unu maa no mbiso miaụŋ mi Isrɛl.

²³Shaba uteburu nụ ụ'wụ'wụ we ekeshia, ga ụnjɛswa ubwa ụ shɛ bimenji bi imbele i'ɛlɛ iyebi, go uholo ubwa ụ shɛ ombolo u'ala oko, go uzoto ubwa ụ shɛ ombolo u'ala oko na ashashɛ.

²⁴Swana uŋ azhɛnarɛya tụrụmbɛɛ, maa sweni izhɛmi ubwa azhɛnarɛya tutu rungwutwonu.

²⁵Ndana uŋ akpada na azuba tutu rungwutwonu, go uholo wa aba ụ shɛ bimenji bu ụbabasụ u'ala uko maa sweni izhɛmi ya akpada ata azhɛnarɛya tutu rungwutwonu.

²⁶Ndana uŋ tɛkanɛ ta azhɛnarɛya ti neshi, maa hwuŋtengeni tɛkanɛ ta ata ne esugwulumi ata ubwa eneshi a na namɛ na akatakpa ubwa eneshi.

²⁷Ga tɛkanɛ ta ata tu gwumwongonu na akpada ata tutu rungwutwonu, iwɛ maa tɛ shɛ ofwo na ɛɛ zhɛ no hwuŋtongono imbele nɛ ɛɛ zhɛ na 'waŋna uteburu ata.

²⁸Shaba imbele ɛtɛ nụ ụ'wụ'wụ we ekeshia maa sweni iŋ azhɛnarɛya, iwɛ maa a na 'waŋna uteburu ata ni ibɛ.

²⁹Ndana uŋ apalụ keeni agbamgbam keeni nkwodo mi iturɛre keeni nkwasha mu na ɛɛ zhɛ na sala meni maa o no zwono iyi ụrụpɛ. Na azhɛnarɛya tụrụmbɛɛ abɛ shɛ ba nda iŋ hwɛɛ.

³⁰Go uteburu ata sho nu umbe ikpɛtɛ ɛtɛ unu-tutwa. Bɛ shɛ kaa ba patana ibrɛd nu uteburu ata nu umbe mu aka elele.

³¹Bɛ shɛ kaa ba nda uteburu ụsụtụla na azhɛnarɛya tụrụmbɛɛ. Tudubo ɛɛ zhɛ o dubo azhɛnarɛya ata nazhɛ a njɛ uteburu ata ụsụtụla, ta akatakpa ubwa, tụ ụ'wụ'wụ ubwa, te ekwepi ubwa, to okwukwusu ubwa, to tusumbo tu bwa tɛ shɛ ta sha iyi ike nu bwa.

³²Shɛ'walụ shi cihiŋ shɛ shɛ sha banɛ ni i'ɛŋbi ubwa; shɛ tatụ shi zhɛ sha banɛ na bụ'aŋbụ bu ko, shɛ tatụ shi zhɛ sha banɛ na bụ'aŋbụ bi yebi;

³³ekwepi atatụ a na aa njɛ gana shilmond una una zhɛ wa nama na a'walụ oko nu ukwukwusu keeni tusumbo tu bwa, ekwepi atatụ anya a na aa njɛ gana shilmond una una zhɛ wa nama na a'walụ eyebi nu ukwukwusu keeni tusumbo tu bwa. Gabata yɛɛ zhɛ ya nama na shɛ'walụ sha ata shi cihiŋ shɛ na shɛ banɛ nu uteburu ata ụsụtụla.

³⁴Ekwepi eneshi a na aa njɛ gana shilmond ɛ zhɛ a nama nu ukwukwusu keeni tusumbo ta aba,

³⁵Ukwukwusu uko kaa zhɛ wa nama tuta ta a'walụ a'walụ na shɛ'walụ sha ata shi cihiŋ shɛ na shɛ banɛ nu uteburu ata ụsụtụla.

³⁶Go okwukwusu aba a shɛ iyi ike na shɛ'walụ sha aba, ga shɛ na azhɛnarɛya tụrụmbɛɛ oko a na ee jibi aa njɛ iŋ kpaaŋ ibɛ.

³⁷Bɛ shɛ ba ndana uŋ asụtụla ecenje; maa e zweni aŋ ulwa maa a na ta nu umbe ubwa apata.

³⁸Na azhɛnarɛya tụrụmbɛɛ ɛbi zhɛ ba ndana uŋ shɛpashɛ shɛ ulwa tu'woricingo keeni ikpɛtɛ nɛ maa o no zwono shɛpashɛ sha ata shu ulwa tu'woricingo.

³⁹Na azhɛnarɛya tụrụmbɛɛ a na ugombo wa aba ụ shɛ utalɛnt uko, ɛɛ zhɛ a nda uŋ, ti iyi ibwɛ uhwugwa hwɛɛ.

⁴⁰Shiyono eshe maa njɛ te teni cɛŋ ne bimenji ga Ngee bi mbiseni ni Ishɛmɛ gɛ.