Read bassa ỤBANỤ 36 Bible Online

ỤBANỤ 36 - bassa bible

ỤBANỤ 36

¹Ibɛ po gɛ Bɛzalɛl keeni Oholiab kwuni ga ugondu tɛnda, medenji bụtụ be elele na kaa AGWANGWAMA peni-ahaŋsa iyi-tumapa na amɛ ubwa maa e eshiciji iyi, maa e 'yebi ugondu we elele nu ugondu wo ohwolu ata tijilo, nu gana na ta AGWANGWAMA peni aŋ unu.

²Go Moses suyanɛ Bɛzalɛl keeni Oholiab, medenji bụtụ be elele na kaa AGWANGWAMA peni-ahaŋsa iyi ti'yebo; ibɛ shɛ bụtụ be elele na yaa kwụlanɛ na amɛ ubwa maa zhajɛ nda ugondu ata.

³Nazhɛ ee leshiji upwaŋ ata ụ tukwulana kpaaŋ, no olugwo Moses, ibɛ shɛ inɛɛ nɛ E'isrɛl suje iwɛ ugondu wo ohwolu ata tijilo. Gabata aa ụranjɛ apwaŋ ata tukwulana tusuje pu bwa waa nu uvwungwa we elele.

⁴Gobwonu du kaa atwa elele na 'yebi ugondu i'ɛlɛ, gɛnjɛ ugondu wa aba na aa ga nda, aa zhajɛ maa a njɛ ugondu wo ohwolu ata tijilo.

⁵Nazhɛ ɛɛ hiɛŋ Moses, Iyi nɛ atwamwa 'waŋnɛ hwuleji ugondu ga AGWANGWAMA iti peni-unu maa ta nda duwa duwa.

⁶Nazhɛ go Moses peni-unu maa ge enenji na amɛ ugba tu'ulwa ta ata kpaaŋ, maa ɛ hiɛŋ, Kede butubwenyi, kwo kaa biyikwo be elele keeni ya iyi elele tinjɛ iwɛ upwaŋ ugondu wo ohwolu ga tijilo. Ibɛ po ee kepeni atwa ata uhwaŋna maa kede e suje ya iyi o;

⁷iwɛnɛ ti iyi nɛ ee suje gembi ugondu ata harɛ vwɛ.

⁸Ibɛ po etwenyi ata shihaŋsa kpaaŋ, na ashashɛ anjɛ-ugondu ata, njɛ ohwolu ata tijilo ne ekpere tugwuno umpwa. Tugwuno ti ibɛ tɛ shɛ ni ihwehwe ilinɛn nɛ aa hiɛŋshɛ tanɛ tanɛ, i shɛ uduhwa wa ababa, nu una ushenje, nu una ushenje howuu; aa njɛ ụsụbwa iyi-uumwa ni ibɛ nu ugondu tugwoni.

⁹Ụnjɛswa we ekpere tugwuno ta ata una una ụ shɛ bimenji bi imbele i'ɛlɛ woshi-ni-bɛ-tindɛtu, uholo tuba ụ shɛ imbele i'ɛlɛ ineshi; bimenji be ekpere ata kpaaŋ nangwụ.

¹⁰Bee suji ekpere tugwuno ta ata ee ge berishiji a ta, bee teji na ti nya, bee suji ekpere na vwɛ a ta, bee teji sasana na ti nya.

¹¹Baa njɛ ilifwe uduhwa ni izhɛmi ye ekpere ata tugwuno a na namɛ nu ukwunanga tutogono ti hiiŋ; baa ndaananɛ du gana ata ni izhɛmi ye ekpere tugwuno a na namɛ nu ukwunanga tutogono tu ụzalụ uyebi.

¹²Baa njɛ ilifwe dupu ni izhɛmi tutogono te ekpere tugwuno ta ata tu ko, baa ndaananɛ ilifwe dupu ni izhɛmi ye ekpere tugwuno ta ata nu ukwunanga tutogono to tugwuno ta ata ti yebi, ilifwe ɛtɛ momo pononu eshe.

¹³Baa njɛ tusotulongonu ta tuba dupu na azhɛnarɛya, bee suji tusotulongonu to tugwuno ta ata ti yebi bee tegeni na ti nya. Ibɛ po udulo ata shɛ ya iyi ike hwɛɛ ubwa.

¹⁴Aa njɛ sasana ekpere tugwuno umpwa-nu-boo-ko ne tihiŋzhe ti iyweywe iwɛ maa e ubeni na azuba udulo ata tugwuno.

¹⁵Ụnjɛswa ukpere una una ụ shɛ imbele i'ɛlɛ talacɛ, uholo ukpere una una ụ shɛ imbele i'ɛlɛ ineshi; ekpere ata umpwa-nu-boo-ko hwɛɛ nangwụ.

¹⁶Bee tegeni ekpere ata a ta swooŋ; bee tegeni ekpere anya ecihiŋ swooŋ.

¹⁷Aa njɛ ilifwe dupu ni izhɛmi ukpere na namɛ nu ukwunanga tutogono tụ ụzalụ uko; baa ndaananɛ ilifwe dupu ni izhɛmi ukpere na namɛ nu ukwunanga tutogono tụ ụzalụ uyebi.

¹⁸Aa njɛ tusotulongonu dupu nu utumburɛ, tu na ti zhɛ to togotogwu udulo ata maa ụ shɛ uko hwɛɛ ubwa.

¹⁹Aa njɛ tu'urugono tu udulo ata ni i'wɛbɛ ya adagba nɛ aa kwụnɛ iyi ishenje, keeni i'wɛbɛ iyweywe na azuba ubwa.

²⁰Nazhɛ aa njɛ shɛkpada shi tishikocongo nụ ụ'wụ'wụ we ekeshia, iwɛ ohwolu ata tijilo.

²¹Ụnjɛswa wa akpada ata a na a na a shɛ imbele i'ɛlɛ umpwa. Uholo wa akpada ata una una ụ shɛ ombolo u'ala oko na ashashɛ.

²²Akpada elele 'yajɛ tibiakwụ ti yebi, tishaba ee shebi, ee cimbengeni. Gana ata aa njɛ shɛkpada sha ata kpaaŋ iwɛ ohwolu ata tijilo.

²³Gana ata aa njɛ udulo ata. Shɛkpada woshi shɛ shɛ iwɛ ụzalụ tuta;

²⁴Aa njɛ akwụka buhanda iwɛ uvwi shɛkpada sha ata woshi; akwụka eyebi namɛ nu uvwi akpada oko iwɛ tibiakwụ ta ata ti yebi, akwụka eyebi namɛ nu uvwi akpada anya iwɛ tibiakwụ ta ata tu bwa ti yebi sasana.

²⁵Nazhɛ aa njɛ shɛkpada woshi iwɛ bu'aŋbụ bu ụzalụ tuzuba bo ohwolu ata tijilo.

²⁶Aa njɛ akwụka azụrụfa buhanda, akwụka eyebi namɛ nu uvwi akpada oko, akwụka eyebi namananɛ nu uvwi akpada anya.

²⁷Nazhɛ aa njɛ shɛkpada shi cihiŋ iwɛ geri bu ukwunanga bo ohwolu ata tijilo nụ ụzalụ bu uwaŋna-twonuo.

²⁸Aa njɛ shɛkpada shi yebi iwɛ esugwulumi ubwa geri bu ukwunanga wo ohwolu ata tijilo.

²⁹Gabata oo bogotogwu tuta tu bwa; ama o togwu uŋ peye ni ihiŋhiŋ, no ofwo bukanɛ ata bi hiiŋ. Gana ata aa njɛ iwɛ esugwulumi ubwa eyebi.

³⁰Shɛkpada shɛ namɛ shɛ tụndatụ, iwɛ akwụka aba azụrụfa umpwa-na-ba-ecihiŋ, akwụka eyebi namɛ nu uvwi akpada elele.

³¹Nazhɛ ee shebi imbele umpwa-ni-bɛ-tɛ nụ ụ'wụ'wụ we ekeshia, itɛ i shɛ iwɛ shɛkpada sha bụ'aŋbụ bu ko bo ohwolu ata tijilo.

³²Imbele itɛ i shɛ iwɛ shɛkpada sha bụ'aŋbụ bi yebi bo ohwolu ata tijilo, imbele itɛ inyɛ i shɛ iwɛ shɛkpada shi ụzalụ bu uwaŋna-twonuo.

³³Nazhɛ aa njɛ bumbolo bu ko bu naa na zhɛ bo hwuŋtono na ashashɛ shɛkpada sha ata, te kwuni nụ ụzalụ uko ohwolu ata tijilo tutu pushi ụzalụ uyebi.

³⁴Ee sweni shɛkpada sha ata azhɛnarɛya, aa njɛ tɛkanɛ ti ibɛ na azhɛnarɛya no ofwo ata imbele ɛtɛ zhɛ no hwuŋtongono, ee sweni imbele ɛtɛ azhɛnarɛya.

³⁵Nazhɛ aa njɛ ibɛgɛlɛ tugwuno ni ihwehwe uduhwa wa ababa, ni inɛ uduhwa ushenje, ni inɛ ushenje howuu, ni inɛ ilinɛn nɛ aa hiɛŋshɛ tanɛ tanɛ, maa a na swata no odubo. Nazhɛ anjɛ-ugondu tugwoni, ndanɛ iŋ iyi-uumwa ya apiambɛ nɛ 'yajɛ ụpɛshɛka bụtụ.

³⁶Ee shebeni uŋ atukpa eneshi ne ekeshia, ee sweni aŋ azhɛnarɛya; na shɛkama shi ibɛ sha azhɛnarɛya; aa ndanɛ uŋ akwụka azụrụfa eneshi.

³⁷Nazhɛ aa nɛ sasana tugwuno ti ibɛgɛlɛ yo odubo udulo ata, ni ihwehwe uduhwa wa ababa, ni inɛ uduhwa ushenje, ni inɛ ushenje howuu, keeni inɛ ilinɛn nɛ aa hiɛŋshɛ tanɛ tanɛ, medenji tugwuno tu na ee zweni irikwi.

³⁸Atukpa tuba namɛ na shɛkama sha tuba shɛ ta du. Bee sweni uhiuhiu wa aba azhɛnarɛya, i'wɛ'wɛ tuba i tubatana na azuba i shɛ azhɛnarɛya, ama tuba akwụka tuba a ta a na namɛ nu uvwi tuba a shɛ ɛtumburɛ.