Read bassa ỤBANỤ 4 Bible Online

ỤBANỤ 4 - bassa bible

ỤBANỤ 4

¹Nazhɛ go Moses jishijɛ, bɛɛ hiɛŋ, Ama hioko, a zha shɛ a tɛtana n-ndumwa mi mi rishe, a zha shɛ kaa a shɛlaga iwɛ mi o, ɛ zhɛ ɛ hiɛŋ, AGWANGWAMA ubu beneni shi caakwụ o.

²Nazhɛ AGWANGWAMA hiɛŋ bụ, Imbe tɛ kwuŋ abụ 'waŋnɛ nu u'ala bụụ? Bɛɛ hiɛŋ bụ, Bukwuto.

³Nazhɛ AGWANGWAMA hiɛŋ bụ, Kala bụ na cɛnjɛ. Go Moses keri bu ga na cɛnjɛ, baa jɛshɛrɛjɛ uhwa, go Moses gezhigeni uŋ.

⁴AGWANGWAMA hiɛŋ Moses, Mba u'ala bụ maa 'imɛ utwenyi ubwa, go Moses mbo ga u'ala baa 'imɛ uŋ, waa jɛshɛrɛjɛ sasana bukwuto nu u'ala ubwa.

⁵AGWANGWAMA hiɛŋ bụ, Nda ijɛ iwɛ maa a tɛtana-rishe maa AGWANGWAMA na shɛ Agwatana ogwunukwoshi aba, ubwa shɛ Agwatana Abraham, na Agwatana Azik keeni Agwatana Jekob, ubwa ubu bananɛ caakwụ.

⁶AGWANGWAMA hiaaŋnanɛ Moses, Shiyono u'ala bụ nụ ụpalatụ bụ. Bee shiyeni ga u'ala ubwa nụ ụpalatụ ubwa. Aka na bɛɛ vwɛ ụŋ, baa kwụbɛ tu u'ala ubwa shɛ ụngwụ-uwaŋna, waa cɛnjɛmɛ paawụụ.

⁷Nazhɛ AGWANGWAMA hiɛŋ bụ, Gwuricingo u'ala bụ nụ ụpalatụ bụ, aka na ti bee gwuricinji uŋ nụ ụpalatụ ubwa, bɛɛ vwɛ ụŋ, baa kwụbɛ tu waa shaananɛ gana tu'waba tu bwa tụ vwɛ.

⁸Nazhɛ AGWANGWAMA hiɛŋ, Yaa shɛ aa tɛtanɛ shɛ n-ndumwa mụ bụ rishe, ee shiri shi kaa acɛbɛ nu useyida ga uhiiŋ, ɛ zhɛ a tɛtana una umɛwɛɛ rishe.

⁹Yaa shɛ a tɛtanɛ shɛ eseyida ga eyebi rishe, aa hwụjɛ shɛ kaa iwɛ bụ, asha sala meni mu Urefu Nayɛl maa 'wɛŋ mụ na cɛnjɛ tu hwoo, meni ma ata abụ sarɛ nu Nayɛl mi zhɛ ma sha mehieŋ na cɛnjɛ ta ata tu hwoo.

¹⁰Ama go Moses mbishi AGWANGWAMA, bɛɛ hiɛŋ, Oo AGWANGWAMA, okwo ta aba duma n-ndumwa ne mi na shɛ yɛu-ugondu bu cebe, unu mu zegeri shi o, n-ndumwa mi mi ma ta tindo bụratụ mi kaa zegeri shi o.

¹¹AGWANGWAMA hiɛŋ bụ, Gaaba njɛ unu bụtụụ? Kwo kaa igwureni, kwo kaa akwụrụ, kwo kaa bụtụ na hieci uhwaŋna, kwo kaa oluboo? Shɛ Gamba AGWANGWAMA suu?

¹²Iwɛ ecilo ata zhaga hwulo, N zhɛ ma nama nu unu bu, Ngɛɛ zhɛ mo bu mbisogono iwɛ nɛ maa jɛmɛ.

¹³Ama go Moses hiɛŋ, Oo AGWANGWAMA, Ma bu tabwa maa tumwanɛ ka binya bụtụ bu ko.

¹⁴Ibɛ po AGWANGWAMA 'yajɛ isɛbwɛ duwa no Moses, bɛɛ hiɛŋ bụ, Batagwụ ata bụ ga Aron tubaa? M mepi maa bi 'yebi n-ndumwa tụdụma tebiye. Hioko, bweye ibi tɛjɛ uhwaŋna, aka na baa bụ kwụbɛ hwayɛ, amɛ ubwa zhɛ o lomo.

¹⁵No mbiso bu n-ndumwa mu na maa bu na duma. N zhɛ ma nama nu unu bu keeni unu ubwa, Ngɛɛ zhɛ mo hi mbisogono iyi nɛ maa hiɛ njɛ.

¹⁶Ubwa zhɛ ba sha bilesheji bu na zhɛ no mbiso atwa n-ndumwa mụ bụ, gabụ tuba bi zhɛ ba sha gana Agwatana na bo mbiso bu n-ndumwa.

¹⁷'Waŋna tuba bukwuto ga bụ nu u'ala bụ, nu bwa ɛbi zhɛ bu na nda iyi tudama.

¹⁸Go Moses gwuri pi Jɛtro binua bwa, bee mbishi bu, bɛɛ hiɛŋ, Ma bu tabwa, maa n leneni maa Mo gwulo pa miaụŋ-mo-bino mi ni Ijipti maa mɛ kwubɛ aŋ, okwo a ta namba lapiya. Gɛ Jɛtro hiɛŋ Moses, Zhaga na amɛ-olom.

¹⁹Nazhɛ AGWANGWAMA mbishi Moses ni Midian ata, bɛɛ hiɛŋ, Gwulo ni Ijipti; iwɛnɛ ta atwa na ga bu jala la tụkwụna uwo kpaaŋ.

²⁰Nazhɛ go Moses shepi biyikwo bwa keeni miaụŋ mu bwa me eyi, bee petengeni aŋ ni izhinyɛci, bee gwuri na cɛnjɛ ti Ijipti. Go Moses kaa 'waŋnɛ bukwuto ata ba Agwatana, baa sanɛ nu bwa.

²¹Nazhɛ AGWANGWAMA hiɛŋ Moses, Aka na ebi ci Ijipti, shiyono eshe tebiye maa njɛ arụhwajɛ ga Ngee bu utegeni kpaaŋ na agba Faro. N zhɛ ma nda tuba maa amɛ ubwa shɛshɛpanɛ maa kede lonono atwa ata maa e hwuri o.

²²Mbiso Faro maa, AGWANGWAMA hiɛŋ, Ge Isrɛl ubwa shɛ yɛu mi ye eyi ihiiŋ.

²³Gamba mo bu mbiso maa, Ganga yɛu mi ye eyi maa hwulo, iwɛ maa ma n zhɛba. Yaa shɛ abụ lacɛ bụ tuganga hioko, N zhɛ ma kwụna yɛu bu ye eyi ihiiŋ.

²⁴Aka na AGWANGWAMA twa no Moses no ofwo oko tuzokwu nu uhwaŋna ata Ijipti, baa jala maa kwụna bụ.

²⁵Ibɛ po biyikwo bwa ge Zipora shepi utayɛ bee jeji buhwumbwo be teleyi ti yɛu ibwɛ, bee keri bu nɛ ɛvwɛvwɛjɛ Moses, bɛɛ hiɛŋ bụ, Iwɛ-tɛkana! Bɛ shɛ bwolo mi be mehieŋ.

²⁶Ibɛ po AGWANGWAMA genji ya Moses tụkwụna, nazhɛ biyikwo ata hiɛŋ, Bwolo be mehieŋ abɛ shɛ, iwɛ teleyi tu ga ee jeji.

²⁷Nazhɛ AGWANGWAMA hiɛŋ Aron, Zhaga twa no Moses nu ụshɛka. Ga Aron zhe ga baa twa no Moses ni Ishɛmɛ ɛtɛ ya Agwatana, baa ruwanɛ bụ.

²⁸Nazhɛ go Moses mbishi Aron utumwa we elele na AGWANGWAMA tumwanɛ bụ keeni arụhwajɛ na bee eni bu tɛnda kpaaŋ.

²⁹Nazhɛ go Moses na Aron sanɛ, aka na ee ci, aa suyanɛ n-nyarɛ mu miaụŋ mi Isrɛl, aa ulwa kpaaŋ aba.

³⁰Ga Aron mbishi aŋ n-ndumwa me elele na AGWANGWAMA mbishi Moses, baa ndanɛ aŋ ụrụhwajɛ ebe du sasana ne eshe aba hwɛɛ.

³¹Atwa ata tɛtanɛ rishe, aka na ta a hwụjɛ maa AGWANGWAMA zhajɛ uhikwonuo miaụŋ mi Isrɛl, tu baa kwụbɛ ụbaụta na aa nda, oo to bizhiri, aa zhɛbɛ bụ.