Read bassa ỤBANỤ 5 Bible Online

ỤBANỤ 5 - bassa bible

ỤBANỤ 5

¹Na aba ibɛ nazhɛ go Moses na Aron teneni Faro, ee mbishi bu, ɛɛ hiɛŋ, AGWANGWAMA na shɛ Agwatana atwa Isrɛl hiɛŋ, Ganga atwa Mi maa e zhe a n ndanɛ isene nụ ụshɛka.

²Ama ga Faro hiɛŋ, Gaaba shɛ AGWANGWAMA Ngɛɛ zhɛ ma hwuga-unu ubwa maa Ma ganga miaụŋ mi Isrɛl maa e hwurii? M mepi shi AGWANGWAMA gonu o, N zha shɛ kaa ma ganga miaụŋ mi Isrɛl maa mu hwuri o.

³Ɛɛ hiɛŋ bụ, Agwatana Ehibru twawa no tu, ta bụ lụpa, maa iti leneni maa ta zha tahaŋnụ iwɛŋnɛ itɛtu nụ ụshɛka, maa ta ta ụrụpɛ pa AGWANGWAMA tu, iwɛ maa kede ma tu kwụna nụ ụngwụ ụwɛ kwo kaa nu utokwobi o.

⁴Ama agwuma Ijipti hiɛŋ aŋ, Gabụ go Moses keeni Aron, iwembe po ahia jala maa hi becinji atwa ga nu ugondu wa abaa? Zhaga gwuricingo aŋ ma nu ugondu tijama ta aba.

⁵Ga Faro hiɛŋ, Hioko ma atwa ga gembi ufwugwo na cɛnjɛ tu ga, ahia jala maa hi peni aŋ ụhinjanụ nu ugondu tijama ta aba!

⁶Nụ ụjita ata gbaa ga Faro peni atwa ata a muna atwa ugondu keeni ehiu aba ugondu unu bɛɛ hiɛŋ,

⁷Tɛ dwɛjɛ aŋ ma ya ti'enyi maa a njɛ etemberi gana na ɛhi gɛ dwɛjɛ aŋ la o. Hiɛŋ aŋ ma ge e zhe a jarɛ tụ ni ikɛnyi aba.

⁸Ufwugwo we etemberi na aa shana a nda cala, ga a njɛ gana ata waa, ta munanana ma kwukwuŋ, iwɛnɛ aa zasa iyi tɛnda ibɛ po aa ugaga ma, Iti genji ta zha tɛ cɛ ụrụpɛ pa Agwatana tu.

⁹Kaana ma etwenyi ata ugondu maa u iri aŋ maa kede ono shilo acɛbɛ nu n-ndumwa ma ata mụ ụzagwụ o.

¹⁰Na aka ata atwa na a muna E'isrɛl ugondu, keeni ehiu ugondu wa aba beni ee zhe ee mbishi E'isrɛl ata, ɛɛ hiɛŋ, Ga Faro hiɛŋ kede ɛhi dwɛjɛ ya ti'enyi o.

¹¹Zhaga jalakaka ma ofwo na ti'enyi tu namɛ maa hiɛ jarɛ ni ikɛnyi hiŋ, a zha shɛ kaa a munanana ufwugwo we etemberi hiŋ kwukwuŋ.

¹²Gabata atwa ata mburusonu ga hwɛɛ aba na cɛnjɛ ti Ijipti kpasaa, maa a na mwacɛ ekikici ambɛ tụlụkpashɛ te ti'enyi te etemberi tɛnda.

¹³Atwa na shɛ ehiu ugondu wa aba a ta aŋ izɛlɛgwu, ɛɛ hiɛŋ, No hwuwo ma ugondu hiŋ iyi-heri, gana na ahia shana ahia nda aka na ɛɛ hi dwɛjɛ la ti'enyi.

¹⁴Oo dubo atwa na shɛ ehiu ata miaụŋ mi Isrɛl, anaa na atwa Faro a na a muna aŋ ugondu peni tihiu, ɛɛ hiɛŋ, Iwembe po ahiɛ njɛ shɛ ufwugwo we etemberi hiŋ hwayɛ ga keeni wenebe gana na ahia shana ahia nda calaa?

¹⁵Ibɛ po atwa na shɛ ehiu miaụŋ mi Isrɛl zhegeni Faro nu n'ungwa, ɛɛ hiɛ, Iwembe po aba nda ajama ga bụ gana gaa?

¹⁶E dweji shi ya ajama ga bụ ti'enyi o, ɛɛ hiɛŋ kaa ga tu na nda etemberi. Hioko oo dubo kaa ajama ga bụ, utugbolo ibɛ kaa namɛ pa atwa bụ gbaa.

¹⁷Ga Faro hiɛŋ aŋ, Ahiɛba aruna ga, hiɛ namɛ ni i'ɛlɛ yo hondo, hi zasa iyi ma nda o, iwɛbɛ po ɛhi hiɛŋ, Ti zhɛ tɛ cɛ ụrụpɛ pa AGWANGWAMA.

¹⁸Zhaga nda ma ugondu, a zha shɛ kaa ɛ hi dwɛjɛ ti'enyi, hi zhɛ kaa hi na nda ufwugwo we etemberi hiŋ waa.

¹⁹Ibɛ po ehiu miaụŋ mi Isrɛl kwụbɛ maa i keeni wumana aŋ, iwɛnɛ ɛɛ hiɛŋ aŋ, Ta munanana ma ufwugwo we etemberi hiŋ nu gana na ahia shana ahia nda iyi-heri o.

²⁰Gana na ta a banɛ na agba Faro, aa twa no Moses keeni Aron ta 'yacɛ aŋ.

²¹Ɛɛ hiɛŋ Moses na Aron, Ga AGWANGWAMA ihiɛ mbiyanɛ, maa duma ụshɛrɛya hiŋ, iwɛnɛ ahiɛ njɛ maa ta 'yagana Faro keeni anjɛ-ugondu ubwa ụhiụŋ, ahiɛ ndanɛ aŋ uhwaŋna na maa a tụ kwụnɛ.

²²Go Moses gwuri no ofwo AGWANGWAMA, bɛɛ hiɛŋ, Oo, AGWANGWAMA, iwembe po aba nda atwa ga bụ iyi iwɛɛ? Iwembe po abụ n tumwanɛɛ?

²³Te kwuni aka na Ngaa zhaganɛ Faro Ama duma iwɛ nu bwa ni izeci bu; bu ta nda kaa waa atwa ga bụ iyi iwɛ, gabụ kaa bi leshiji shi aŋ kwukwuŋ.