Read bassa ỤBANỤ 8 Bible Online

ỤBANỤ 8 - bassa bible

ỤBANỤ 8

¹Na aba na ta AGWANGWAMA jibi Urefu Nayɛl, yaa namɛ ijitɛ icenje, nazhɛ AGWANGWAMA hiɛŋ Moses, Zhaga tonono Faro, mbiso bu maa AGWANGWAMA hiɛŋ, Ganga atwa mi maa e zhe a n zhɛbɛ.

²Ama yaa shɛ ebi genji shi aŋ, N zhɛ ma hashɛgana cɛnjɛ tụ bụ kpaaŋ na azhɛgwa tutu ogwungwu tuba;

³Azhɛgwa zhɛ o shino ni Nayɛl ga, ɛɛ zhɛ e munje nu umwono bu, ɛɛ zhɛ o tono na amɛ umwono na obo woto, ɛɛ zhɛ o mungo no ogodo bu, ɛɛ zhɛ o tono no shimwono shɛ miaụŋ-mu-ugondu bu, ta tu'waba ta atwa bụ, ta shɛ'alụ shɛ bụ hwɛɛ, to shonunu shɛ bụ.

⁴Azhɛgwa ata zhɛ ne bu mungenji, ta atwa bụ, ta anjɛ-ugondu bu kpaaŋ.

⁵Nazhɛ AGWANGWAMA hiɛŋ Moses, Mbiso Aron maa, Ndarɛshɛnga u'ala ata bụ 'waŋnɛ bukwuto maa peteni uŋ ne erefu, ta awapa, to okwokwo, iwɛ maa azhɛgwa zhajɛ na cɛnjɛ ti Ijipti.

⁶Ga Aron nderishinji ga u'ala ubwa bee peteni uŋ ne meni mi Ijipti; nazhɛ azhɛgwa bananjɛ ee ubeni na cɛnjɛ ti Ijipti kpaaŋ.

⁷Ama anjɛ-tishino njɛ du gana ata, ee ubeni du azhɛgwa na cɛnjɛ ti Ijipti.

⁸Ga Faro suyanɛ Moses keeni Aron, bɛɛ hiɛŋ aŋ, Tabwa ma AGWANGWAMA, maa sugo azhɛgwa no olugwo mi keeni atwa mi, N zhɛ mo lonono atwa bụ maa e zhe o to ụrụpɛ pa AGWANGWAMA.

⁹Go Moses hiɛŋ Faro, N shileni aka na shɛ maa Ma tabwa AGWANGWAMA iwɛ bụ, ti iwɛ anjɛ-ugondu bu, keeni iwɛ atwa bụ, iwɛ ma a bụ kwunanjɛ azhɛgwa, ta a na umwono bu, iwɛ maa a nama ni Nayɛl kiri.

¹⁰Ga Faro hiɛŋ, Beyi. Go Moses hiɛŋ bụ, Ga i shɛ gana ga abɛ jɛmɛ, iwɛ maa mepi maa i zasa tuwa tu na tɛ shɛ gana AGWANGWAMA na shɛ Agwatana tu o.

¹¹Azhɛgwa zhɛ ma bụ ganga, tu umwono bu, ta anjɛ-ugondu bu keeni atwa bụ; ɛɛ zhɛ a nama ni Nayɛl kiri.

¹²Go Moses keeni Aron banɛ no olugwo Faro; go Moses tabwa AGWANGWAMA iwɛ azhɛgwa na urigeni Faro.

¹³AGWANGWAMA njɛ gana na go Moses jɛmɛ; azhɛgwa ga 'wi no shimwono, to okpogwu keeni shihilo.

¹⁴Ee sutengeni aŋ otukwu otukwu, cɛnjɛ ta ata ti 'yajɛ ya ụhiụŋ.

¹⁵Ama aka na ti ga Faro kwụbɛ maa azhɛgwa 'wi kpaaŋ, bee teeneni tɛshɛshɛpana na amɛ ubwa; bu hwugananɛ shɛ n-ndumwa ma ata Moses na Aron, nu gana na ta AGWANGWAMA ga dumwa la.

¹⁶Nazhɛ AGWANGWAMA hiɛŋ Moses, Mbiso Aron maa, Haŋpa bukwuto bu maa po bu nu upwupwutu, maa ụ shɛ akwarụkwata na cɛnjɛ ti Ijipti kpaaŋ.

¹⁷Aa njɛ gana ata; ga Aron po bukwuto bwa na cɛnjɛ, nazhɛ akwarụkwata namɛ na tu'waba ta atwa, ti isundɛ, upwupwutu shɛ akwarụkwata no ofwo elele na cɛnjɛ ti Ijipti kpaaŋ.

¹⁸Atwa tishino mekeni maa a njɛ du akwarụkwata, ama e eri shi o. Gabata akwarụkwata namɛ no ofwo elele, ta tu'waba ta atwa, keeni isundɛ.

¹⁹Ibɛ po anjɛ-tishino hiɛŋ Faro, Inɛ gɛ shɛ tɛnda ta Agwatana na ya! Ama ga Faro ta shɛshɛpanɛ waa, bu ta hwụjɛ shɛ n-ndumwa mu Moses, na Aron, gana na ta AGWANGWAMA ga dumwa.

²⁰Nazhɛ AGWANGWAMA hiɛŋ Moses, Gbatụ ti'ishijɛ beyi nu uvwungwa dididi maa 'yaka Faro, ti bɛɛ zhɛ nu uwapa, maa mbishi bu maa, AGWANGWAMA hiɛŋ, Ganga atwa mi maa a n zhɛbɛ.

²¹Shibwonu yaa shɛ ebi genji shi atwa mi ma e hwuri, N zhɛ ma tumwanɛ ishi maa i banɛ ibu urigeni, ta anjɛ-ugondu bu, ta atwa bụ, ɛ zhɛ o tono no shimwono shɛ bụ. Ishi ɛtɛ zhɛ yo shino shimwono sha atwa Ijipti kpaaŋ, i zhɛ yo ubono na cɛnjɛ.

²²Ama nụ ụjita ata Ngɛɛ zhɛ mo shilo ogwungwu na cɛnjɛ tu Goshɛn, tu na atwa mi namɛ, maa kede tusukwurukwo ti ishi ɛtɛ ti ci apata o, iwɛ maa mepi maa Gamba n shɛ AGWANGWAMA na ma nda ugondu na cɛnjɛ tu ga.

²³N zhɛ mo shilo ogwungwu na ashashɛ atwa mi na atwa bụ. Beyi ga ibɛ useyida ata zhɛ wa nda.

²⁴Nazhɛ AGWANGWAMA njɛ ga, ishi sukwurukwo, yaa zhajɛ nu umwono Faro, to shimwono sha anjɛ-ugondu ubwa tebiye, ishi ɛtɛ heshigeni cɛnjɛ ti Ijipti kpaaŋ.

²⁵Ga Faro suyanɛ Moses keeni Aron, bɛɛ hiɛŋ aŋ, Zhaga ta ma ụrụpɛ na Agwatana hiŋ na amɛ cɛnjɛ tu ga.

²⁶Ama go Moses hiɛŋ bụ, I teni shi cɛŋ maa to sugo iyi-tupwaŋ ye Ejipti maa ta ta ụrụpɛ na AGWANGWAMA tu o. Yaa shɛ etu suji iyi-tupwaŋ ye Ejipti maa ta ta ụrụpɛ ne eshe aba, a zha shɛ suu ma tu tagana atayɛ maa to 'wo?

²⁷I shɛ tilɛɛ maa ta zha tahaŋnụ ti ijitɛ itɛtu nụ ụshɛka, maa ta ta ụrụpɛ na AGWANGWAMA na shɛ Agwatana tu, gana na bee ti peni-unu.

²⁸Ga Faro hiɛŋ, N zhɛ ma hi ganga maa hi zhe hi to ụrụpɛ na AGWANGWAMA hiŋ, ama ta zhaga ma tuba taa dụlụ o; asha tabwa ma AGWANGWAMA iwe mi.

²⁹Go Moses hiɛŋ, Hioko, N zhɛ ma bana no olugwo bu, Ngɛɛ zhɛ ma tabwa AGWANGWAMA, ishi zhɛ ya bana no olugwo bu, ta anjɛ-ugondu bu, keeni atwa bụ beyi; ama tuba ta nda ya tɛnda-te-eshe maa lakanɛ atwa ga maa e zhe o to ụrụpɛ na AGWANGWAMA aba o.

³⁰Go Moses banɛ ga no olugwo Faro, baa tabwa AGWANGWAMA.

³¹Nazhɛ AGWANGWAMA njɛ ga gana na tu go Moses lụpɛ bụ, bee becinji ishi no olugwo Faro, ta anjɛ-ugondu ubwa, keeni atwa ubwa; okwo bu ko vwɛ shɛ o.

³²Ga Faro teeneni tɛshɛshɛpana na amɛ ubwa, bi genji shi atwa ata maa e hwuri o.