Read bassa JOB 1 Bible Online

JOB 1 - bassa bible

JOB 1

¹Bụtụ bu ko namba la na cɛnjɛ tu Uz,[1] na ɛɛ hiɛŋ izeci ibwɛ go Job, bɛ shɛ bụtụ na ba zhɛba Agwatana, baa shɛ bụtụ bi tiririri. Bɛ shɛ bụtụ bi biye na jeri shi maa nda iyi elele nɛ shɛ iyi iwɛ.

²Bi meci miaụŋ-me-eyi mi cenje na mu na mo o mu tatụ.

³Bɛ 'yajɛ du agwụdụ igbɛɛ-itɛtu-na-akpakwụ-a-ta (7,000), nu nruhondo ugbaa-uko-na-akpakwụ-a-ta (3,000), ni inɛ akpakwụ-a-ta (1,000), nu nzhinyacɛ akpakwụ-eyebi-ni-dipi-yebi (500). Bi 'yajɛ du miaụŋ-mu-ugondu mi gembi ufwugwo, bɛ shɛ bɛzhɛgba bee hwuri bụtụ be elele na namɛ geri bu uwaŋna-banụ.

⁴Miaụŋ mu bwa me eyi ma palaga iyimɛyɛ isene tɛnda nu nhwaŋ ma aba, a shana du aa suyanɛ angwụfwụ aba atatụ maa a na ya a na swa na aba.

⁵Aka elele ta a kwunanjɛ isene ɛtɛ, go Job bɛ ishijɛ nu uvwungwa dididi ba ta ụrụpɛ iwɛ miaụŋ mu bwa ohiuhiu ohiuhiu aba maa nda aŋ shɛshɛshɛ. Ba ta ụrụpɛ ata iwɛ maa nekeshi miaụŋ mu bwa mɛ njɛ feye iwɛwɛ ike kwo kaa a twajɛ feye Agwatana nu umepiteshi. Gana go Job ba ta ụrụpɛ ata aka elele ta.

⁶Jitoo ko atumwa-azuba[2] Agwatana zhajɛ no ofwo AGWANGWAMA, ge Setan[3] zhe du na aba. Ubwa gatata du ɛɛ hiɛŋ Ibiri.

⁷Nazhɛ AGWANGWAMA heŋteni Setan, bɛɛ hiɛŋ, Cee abu banɛɛ? Ge Setan jishijɛ bụ, bɛɛ hiɛŋ, Ma zha beye Ama zha bana, Mo rungo gbom na cɛnjɛ tu unyizo.

⁸Nazhɛ AGWANGWAMA hiɛŋ Setan, Bu hoŋswo kwukwuŋ hŋ iwɛ yɛu mi ugondu go Job? I Zasa bụtụ be elele namba nu unyizo ɛ shɛ bụtụ bɛ tɛcara keeni bụtụ bi tiririri gana bwa o. Bu ma n sụma inyɛsɛ, bi jeri shi kaa maa bu na nda iyi elele nɛ shɛ iyi iwɛ o.

⁹Ge Setan jishijɛ AGWANGWAMA, bɛɛ hiɛŋ, Gbi suu go Job ma bu sụma inyɛsɛ?

¹⁰Gabụ ba jilanɛ bụ tu umwamwa ubwa hwɛɛ, ti iyi nɛ baa 'yajɛ. Iyi elele nɛ baa njɛ gabụ ba pana iŋ uwebiye, ebi peni bu kaa iyimabiga nɛ botogwu u'una ga kpaaŋ.

¹¹Ama yaa shɛ ebi suji iyi nɛ baa 'yajɛ kpaaŋ, bi zhɛ ma bu twagaga ne eshe bu ba kwụba!

¹²Ibɛ po AGWANGWAMA hiɛŋ Setan, Inɛ go zhɛmɛ, M bi peni ukpahiŋ no ofwo iyi elele nɛ go Job 'yajɛ, ama bɛ shɛ shɛ tuba ba gwụcɛnga Job ni ikɛnyi ibwɛ o. Ge Setan beni ga na agba AGWANGWAMA bee hwuri.

¹³Jitoo ko miaụŋ mu Job me eyi ta mu na mo o ma ya iyimɛyɛ isene ni ihwɛ batagwụ ba aba bụ 'wụtụ,

¹⁴bụtụ bu ko gezhije, bee mbishi Job utumwa, bɛɛ hiɛŋ, Ta hwaŋ itimɛ ni inɛ ne ehilo, nzhinyacɛ tuba ma ya ambɛ dashɛ.

¹⁵Eshigiri Asabean[4] pushe, aa sukakanɛ iŋ, ee zunji iŋ hwɛɛ. Oo togwu ta miaụŋ mụ bụ mu ugondu aa kwụnɛ no otokwobi, Ngooko kiri m bananganɛ maa mo bu mbiso iyi nɛ teni.

¹⁶Bi te hwuwi shi okwo n-ndumwa mu bwa tụdụma o, butumwa bi nya zweni, bɛɛ hiɛŋ, Uto layɛ ba waa kwụnɛ agwụdụ bụ hwɛɛ, ta a'iywa aba, Ngooko kiri m bananganɛ maa mo bu mbiso.

¹⁷Bu na ata te uteji shi okwo unu o, butumwa bi nya pushe, bɛɛ hiɛŋ, Edingbe Akaldia[5] atatụ pushe, aa tu sukakanɛ, ee suji nrohondo mụ bụ, aa kwụnɛ ta miaụŋ mụ bụ mu ugondu hwɛɛ, asha Ngooko kiri m bananganɛ maa mo bu mbiso.

¹⁸Bu na ata te uteji shi okwo unu o, butumwa bi nya zweni, bɛɛ biɛŋ, Miaụŋ mụ bụ me eyi keeni mu na mo o mu ga ya iyimɛyɛ isene ni ihwɛ batagwụ ba aba bụ wụtụ,

¹⁹ibɛ uvwugo uko ụ'wụtụ banɛ nụ ụshɛka wee hwuŋzhi umwono ata, waa 'imɛ aŋ ee 'wi hwɛɛ aba, Gamba kiri m bananganɛ maa mo bu mbiso.

²⁰Go Job ishijɛ, bee dwetweji utogwo ubwa, baa 'nyanjɛ tukpala, iwɛ amɛ-tụhaŋtụ na jeteni bu, bee ubi ụpɛshɛka ubwa na cɛnjɛ baa zhɛbɛ Agwatana.

²¹Bɛɛ hiɛŋ, Mohondo la bino mi m meci, mohondo du Ngɛɛ zhɛ mo gwulo. AGWANGWAMA la m peni, ubwa du suji. Ge zhemonjino izeci ibwɛ.

²²Okwo ti ijɛ vwutengeni Job hwɛɛ, bɛ njɛ shɛ iwɛwɛ maa twaga Agwatana kwo kaa maa swaga bu utugbolo we elele o.