Read bassa JOB 17 Bible Online

JOB 17 - bassa bible

JOB 17

¹Ukwunanga uraiŋ mu gwumwongonu, ɛdicɛ du Ama hwungwa ya; i zasa iyi ta ma n vwanɛ ya o, semi u'uye kiri.

²N ngbarakacɛ gana na ta atwa ma n nda asada.

³Agwatana, lashɛga n-ndumwa mi mi, iwɛnɛ tu Ngaa shɛ bụtụ bi tikpeke. I zasa bụtụ ta namba maa lono iyi nɛ Ama duma o.

⁴Gabụ bu lubicinji shihaŋsa sha aba, e eri shi e eshicigo ya iyi elele o.

⁵Yaa shɛ bụtụ lacɛ biyejilo bwa iwɛ ukwuribi ugworo, eshe miaụŋ mu bwa zhɛ o lubogono.[26]

⁶Gamba ya n shɛ iyi tutwa; a zhajɛ oo mo n zwogono mecemi ne eshe.

⁷Eshe mi zhinengeni na amɛ-tụhaŋtụ, itwɛ tu'waba ti mi hwɛɛ i shɛ ya gana uzhizhi.

⁸I dama atwa na hiɛŋ maa aba shɛ atwa tikpeke, ibɛ po ee m peni n-ndumwa-tụwụma hwɛɛ aba, gana bụtụ na zasa Agwatana na amɛ ubwa.

⁹Atwa na shɛ atwa tiririri zhɛ na kaana gi izhɛ, atwa na amɛ aba namɛ shɛshɛshɛ zhɛ na kaana gi ikɛnyi ti'yaga.

¹⁰Ama yaa shɛ aa zhajɛ oo n holongonu, N zha shɛ ma kwụba bụtụ na incɛ okwo bu ko na ashashɛ aba o.

¹¹Aka mi heŋnici; iyi elele nɛ Ngaa imanganjɛ ngwuri; ashɛlatụ mi hwulwo.

¹²Ama eyejilo mi tuba shepi ụjita aa njɛ uwaŋna; ɛɛ hiɛŋ maa uhioko-uhwaŋna gwumwongonu, ama M mepi tuba maa N namɛ ne tishi.

¹³Ashɛlatụ na Ama nda ya kiri a shɛ maa ma zha ne e'uye, no ofwo na Ngɛɛ zhɛ mo woto ne tishi.

¹⁴U'uye Ngɛɛ zhɛ mɛ hiɛŋ ubwa shɛ bishi mi, eshishi na ma n ya, aba tuba zhɛ a sha bino mi na angwụfwụ mi.

¹⁵Imbe ta shɛ ashɛlatụ mii? Gaaba ta kwụbɛ ya ashɛlatụ mi elelee?

¹⁶Yaa shɛ Ngee teni hwuŋ ne e'uye,[27] N zha shɛ ma 'waŋna ya ashɛlatụ elele apata o.