Read bassa JOB 21 Bible Online

JOB 21 - bassa bible

JOB 21

¹Go Job jishijɛ Zofa, bɛɛ hiɛŋ,

²Hwulaga iyi nɛ Ama njɛ, ti'ingatanga tu na Ama bu lụpa na kiri.

³M peni ohwolu maa Ma dumana iwɛ, yaa shɛ Ngee hwuwi hwayɛ, yaa bụ kwụlanɛ, nazhɛ n njɛ ya asada.

⁴Uwuru mu shɛ shɛ na bụtụ na zhɛ bo fwoso. N 'yajɛ ecilo ebiye na Ngaa zha shɛ ma ima-isɛbwɛ.

⁵M mbiyanɛ de. Inɛ gɛ ibaba i ta bu gwumwa sụ maa nama saiiŋ hŋ?

⁶Aka na Ama haŋsa iwɛ iyi nɛ i n jiteni, i n dama, iwɛbɛ po inyɛsɛ i n shɛ Ama zhɛgɛda.

⁷Iwembe kwuŋ po Agwatana leni maa ogworozwo na ya uraiŋ, maa a na inga, maa iyi na zhɛmana aaŋ?

⁸A ya kaa uraiŋ, miaụŋ ma aba ma waŋnɛ moo jitono aŋ, a 'yajɛ ta ajalụ.

⁹Agwatana kaa njɛ shɛ maa iyi iwɛ layɛ nu nhwaŋ ma aba o; a zasa kaa ụbaụta we elele o.

¹⁰Okwo inɛ ya aba ya waŋna, yaa mata uzawa tubasaga te elele.

¹¹Miaụŋ ma aba ma swa ugwu gana oywoywo agwụdụ.

¹²Aa hiɛba tihiɛba na shiduma shɛ na aa 'nyamangana aŋ keeni akpasana na oo hwulogono aŋ.

¹³A ya uraiŋ wa aba na amɛ-olom, oo 'wo saiiŋ uzawa ụbaụta we elele.

¹⁴Ogworozwo ata o mbiso Agwatana maa go worungo aŋ, e jeri shi maa e mepi iyi nɛ shɛ ukwulana ubwa ni iyi elele nɛ aa nda o.

¹⁵Gaaba shɛ Agwatana go u Hwuri Kpaaŋ, i shɛ maa ta zhɛbaa? Okwo ule imbe bwaa ɛti zhɛ ta ya na adua tɛnda no ofwo ubwaa?

¹⁶Ɛ hiɛŋ maa iyi elele zhɛmanɛ aŋ ni ikɛnyi ya aba, ama N jeri shi maa tuhaŋsa to ogworozwo tu gwumwonu ne mi o.

¹⁷Kpalụ mba oo 'woricingwo ụsụtụla wo ogworozwoo? Kpalụ mba abara-ne-ebe o jitono aaŋ? Agwatana[38] zhɛ o hwoŋso aŋ ụngwụ-tuhwuga ni isɛbwɛ ibwɛ.

¹⁸Aka elele ɛ zhɛ a sha gana arɛya; kwo kaa gana afwụrɛkɛcɛ na uvwugo sujii.

¹⁹Hi hiɛŋ, Agwatana a pana yɛu ulwapɛ iwɛ iwɛwɛ nɛ bishi bwa njɛ. Awo! Ga Agwatana peni bụtụ na njɛ iwɛwɛ ɛtɛ ulwapɛ; go mbisono bu maa mapa maa ubwa njɛ bụ iŋ, iwɛ iwɛwɛ ibwɛ.

²⁰Ga atwa na njɛ iwɛwɛ ɛtɛ leshiji ulwapɛ ibɛ, ga a hwụjɛ gana na ti isɛbwɛ ya Agwatana na Hwuri Kpaaŋ zhanjɛ.

²¹Yaa shɛ bụtụ 'wi, bi te mepi suu okwo miaụŋ mu bwa ma nda ba unyasa?

²²Bụtụ suu eri bo mbisogono Agwatana na ba duma ụshɛrɛya wa atwa na namɛ no ohwolu a'wụtụ 'wụtụ iyi?

²³Atwa oko a nama lapiya uuwa o to 'wo, bo 'wo asha i zasa kaa iyi elele nɛ njɛ bụ o,

²⁴tu'waba tu bwa[39] ta nama lombwo, o'umpwo ubwa zha shɛ a 'yaga kaa iyi elele nɛ njɛ aŋ o.

²⁵Atwa oko kaa zasa unyasa kwukwuŋ, gana ata aa nama uuwa oo 'wo na amɛ-tụhaŋtụ.

²⁶Ama de tu'wo kaa ee 'wi hwɛɛ aba, ɛ zhɛ o no aŋ, eshishi kaa zhɛ a ya aŋ hwɛɛ aba.

²⁷M mepi tuhalakaka ta shihaŋsa shi hiŋ, keeni ti'imanganga ti hiŋ maa hiɛ n njɛ iyi iwɛ.

²⁸Hio hoŋtono, ɛhi hiɛŋ, Cee umwono bụtụ ata bụ 'wụtụ namɛ ya hwuwayɛ goo? Ibɛ shɛ bụtụ ata na shɛ ugworozwo.

²⁹Hi te heŋteni shi suu atwa na a zha tahaŋnụ nu uhwaŋna ata? Hi leshiji shi suu unabarɛ na ee jiye nu bwa?

³⁰Jita na Agwatana a nda isɛbwɛ, baa pana atwa ulwapɛ, bi zhɛ suu ba haba ogworozwo?

³¹I zasa bụtụ na namba maa shana ogworozwo iwɛ o, kwo kaa na zhɛ ba tụpana bụ iyi elele nɛ baa njɛ o.

³²Aka na ee shepi bu hwuŋ nu u'uye ubwa na aa jilaganɛ tebiye,

³³okwo atwa akpakwụ ofwugwo zhagaga na atwa na zhɛ e ne bu, ahwayɛ kaa de aba zhɛ a patangana bụ na tu'waba.

³⁴Ama ahiɛba! Hia makana maa hi n ingatanjɛ nu n-ndumwa mu tusashɛ! Ajɛshɛgwa elele na ahi ma m pana a shɛ a na ụzagwụ.