Read bassa JOB 22 Bible Online

JOB 22 - bassa bible

JOB 22

¹Ge Elifaz lɛshijɛ, bɛɛ hiɛŋ,

²I 'yajɛ kwukwuŋ hŋ bụtụ na namba, kwo kaa bụtụ na incɛ uhwuri atwa vwɛ hwɛɛ, na Agwatana eri a nda uhwara nu bwa?

³I 'yajɛ suu titeni te elele tu na Agwatana teni ne tiririri tu na aba nda? Okwo iyi bu nɛ aba nda nɛ zasa unu-tusapa suu 'yaganɛ bụ ule we elele?

⁴Iwɛnɛ aba sụma Agwatana inyɛsɛ suu upo boo bu vwulo kwo kaa baa bu manga?

⁵Awo, shɛ iwɛ tugworozwo tụ bụ suu? Iwɛwɛ nɛ abu ndanjɛ zasa uce o.

⁶Bo tufwurungo yɛu bino bu tugwuno, obo shilo bu mohondo iwɛ utashɛ na baa bɛ yɛ.

⁷Aba nyasa atwa na lukwumenji meni mu tuswa, aba laka maa peni atwa na imunɛ gwụmɛ iyimɛyɛ maa a yɛ.

⁸Iwɛ ukpahiŋ bu keeni iwɛ ohwolu na abu 'yajɛ ibɛ po aba jala maa leshegeji cɛnjɛ tu ga hwɛɛ.

⁹Shɛ olulo kiri abu lacɛ timbiyono, ama ba lashaga du e'weteji iyi ni iji, aba nda aŋ tawɛ tawɛ.

¹⁰Modugwulo mu ta mu bu hogogonu ya hwuwayɛ go, ibɛ po uriri ụbụ 'imɛ ya eshigiri.

¹¹Ofwo ta ubu shanɛ ya tishi kpirimi, bi eri shi ba kwụba ya uhwaŋna o, meni du kaa mu zhagajɛ mee bu suji.

¹²Shɛ taa na azuba na zeci uhwuri ofwo vwɛ hwɛɛ suu Agwatana namɛ, bee zucinje eshe ubwa baa mbiyanɛ mkpasu, okwo tu maa namɛ na azuba?

¹³Ibɛ hŋ obu to hoŋtono waa maa, Imbe Agwatana mepi? Odomu sweci bu, gana naa bee te eri ba duma ụshɛrɛya tuu?

¹⁴Bi heŋshi ree maa odomu ata tuzhuuŋ lakanɛ bụ ofwo tụkwụba, tu baa zha tahaŋnụ no tugwungwu ta tụla na cɛnjɛ?

¹⁵Bi tɛ zhɛ suu ba 'wa uhwaŋna na ogworozwo towo la?

¹⁶Okwo ta aka aba te ci shi, meni mu zhagajɛ mee suji aŋ.

¹⁷Atwa ata, aba hiɛŋ Agwatana, Ishɛga maa iti genji, imbe Bụtụ ata na Hwuri Kpaaŋ eri ma tu ndaa?[40]

¹⁸Ama Agwatana kaa ba nda maa iyi zhɛmanɛ aŋ waa. N eri shi mo eshicigo tuhaŋsa to ogworozwo.

¹⁹Atwa tiririri namɛ na amɛ-olom, atwa na n-ndumwa-zhɛmɛ a hinga ilɛtu na aka na aa kwụbɛ ta a pana ogworozwo ulwapɛ.

²⁰Ɛɛ hiɛŋ, Iyi elele nɛ ogworozwo 'yajɛ njɛ ufwu hwɛɛ, ulwa hwoŋzhinji inɛ ye elele nɛ ga ta vwɛ.

²¹O-Job, 'yaga amɛ-olom na Agwatana, ta nda bụ bụtụ bụ bi i'ime o; yaa shɛ abu 'yajɛ amɛ-olom nu bwa, nazhɛ bɛɛ zhɛ ma bu pana uwebiye.

²²'Wa iyi nɛ boo bu sokokono; untangana n-ndumwa mu bwa na amɛ bụ.

²³Bɛ shɛ bi meme zucinje[41] maa gwure pa Agwatana, maa genji iyi iwɛ ye elele nɛ aa nda ni ihwɛ bu.

²⁴'Waŋ azhɛnarɛya ata bụ; 'waŋ azhɛnarɛya ata bụ ebiye no busoso bu hwoo.

²⁵Nazhɛ Agwatana na Hwuri Kpaaŋ zhɛ a sha azhɛnarɛya bụ, ga shɛ ubwa du shɛ azụrụfa bụ ogwumishi, a na ɛbi zhɛ bu momo sutonono.

²⁶Nazhɛ ɛbi zhɛ bu na patana Agwatana rishe aka elele. Ɛbi zhɛ du ba ta ugbe maa ubwa shɛ umɛzhinjɛ wa amɛ-olom bu.

²⁷Aka na abɛ njɛ adua, bi zhɛ mɛ bi jishijɛ, nazhɛ ɛbi zhɛ bu na nda iyi nɛ ebi shiri-unu ibɛ.

²⁸Iyi elele nɛ aba nda zhɛ ma bu 'yagana eshe, nazhɛ uhioko-uhwaŋna zhɛ na ta nu uhwaŋna bụ.

²⁹Agwatana ubwa be kezhicinje atwa na mama sata, boo gombicingo tuba atwa na meme zucinje.

³⁰Bi zhɛ ma bụ lashɛga, ti yaa shɛ n-ndumwa mụ bụ zhɛmɛ, ti yaa shɛ iyi nɛ aba nda teni kaa cɛŋ.