Read bassa JOB 23 Bible Online

JOB 23 - bassa bible

JOB 23

¹Go Job jishijɛ Elifaz, bɛɛ hiɛŋ,

²N ta ta waa tigezhe, Eme swegeni Agwatana unu mu[42] N eri shi ma nama saiiŋ ni i'nye nɛ Omo 'nyongo.

³Ngee nge mepi ofwo na Ngee eri ma ta bu ugbe, Ngee nge mepi du gana na maa Mo to apata.

⁴N ngɛ zhɛ me swegeni bu n-ndumwa mi mi, maa Me swegeni bu du ofwo na n-ndumwa mɛ n zhɛmɛ.

⁵Ma jala maa Ma mapa iyi nɛ bɛɛ zhɛ mɛ n hiɛŋ, keeni gana na bɛɛ zhɛ mɛ n jishijɛ.

⁶Agwatana suu zhɛ ma n sukakana nu ukpahiŋ ubwa ụ'wụtụ na baa 'yajɛ? Awo, bi zhɛ ba shɛlaga n-ndumwa mu na Ama njɛ.

⁷N shɛ bụtụ bi tikpeke; N eri mo lono iyi nɛ Agwatana hiɛŋ; ubwa zhɛ ba duma iwɛ mi maa, N zasa tụwụma te elele na aka elele o, asha iwɛ hwuwowu.

⁸N dwelekeci Agwatana geri bu uwaŋna-banụ, bu zasaba apata o; Ngee dwelekeci bu geri bu uwaŋna-twonuo, N kwụbɛ shɛ bu du o.

⁹Agwatana a nda ugondu tuzuba keeni tuta[43] ama N ta kwụbɛ shɛ bu kaa taa hwayɛ o.

¹⁰Agwatana kaa mepi uvwuna we elele na Ngee shepi; yaa shɛ bee m menji, bi zhɛ ba kwụba maa N namɛ rụmbɛɛ gana azhɛnarɛya.

¹¹N 'wa uhwaŋna na bee teri shiriri. N vwụrɛ shɛ geri elele o.

¹²Ma nda iyi nɛ bee m peni-unu ibɛ aka elele. Ukwulana ubwa kiri Ngaa 'wa, ama shɛ unoo mu o.

¹³Bi sheyinji shi, i zasa bụtụ na eri ba laka bu kwo kaa na eri ba lakana bu iyi nɛ baa jala tɛnda o.

¹⁴Bi zhɛ ba nda iyi nɛ baa n imanganɛ; iyi nɛ baa n imanganɛ kaa gembi ufwugwo.

¹⁵Iwɛbɛ po Ngaa sụmɛ bụ inyɛsɛ aka na ti Ngee heŋshi iwɛ gɛ.

¹⁶Agwatana na Hwuri Kpaaŋ n kwụshɛ u'waba. Bee n zweni du kaa inyɛsɛ.

¹⁷Okwo to ofwo shɛ tishi, ti eri shi ta nda maa ma ima ilɛmɛ o. Tishi ta ata tu tuzhuuŋ tu ubi ụpɛshɛka mu.