Read bassa JOB 24 Bible Online

JOB 24 - bassa bible

JOB 24

¹Iwembe kwuŋ po Agwatana shiri shi aka ụshɛrɛya tụdụma, keeni ụjita tishiriri iwɛ atwa na a ndana bụ iyii?

²Atwa o mushongo okwo eseyida na aa shɛrɛ no tugwungwu maa e keeni cɛnjɛ ta aba ugombo; oo zundo agwụdụ oo togwu na a na aba.

³Aa lashaga idɛkwɛ nɛ miaụŋ-me-e'weteji ga 'yajɛ, aa lashɛga buna be eyi bo bululo uuwa i ci aka na bululo ata cɛpɛ utashɛ wa aba.

⁴E leneni shi okofwo maa iyi nɛ shɛ inɛ ya aba temi aŋ o. Oo urugono atwa na zasa iyi nu usumwa.

⁵Gana okofwo zweni nụ ụshɛka uhwoo iwɛ urungo iyimɛyɛ gana nzhinyacɛ ta, a zasa ofwo na ee eri o gwushigo iyimɛyɛ maa e peni miaụŋ ma aba o.

⁶A dwa iyimɛyɛ nu ntuma mu na mɛ shɛ shɛ mu na aba, nu ntuma mo ogworozwo kaa oo two tụ'walụ ta afwafwa.

⁷Ụjita shi, gana ata oo wotogo a zasa iyi maa o urugono, a zasa iyi nɛ maa a mama jilanɛ nu mpiala ma ata o.

⁸Eshilo no dubo aŋ nu nshama, gabata aa suswanga na aparatayɛ maa a shɛ ijilɛni ya aba.

⁹Atwa ata ɛ ci'nyɛ ndepeshenji miaụŋ mu na mu zasa eshi no mosubo aa njɛ aŋ ajama, ee lesheji miaụŋ mo okofwo tụlụkpashɛ tu ụtashɛ na aa yɛ aŋ.

¹⁰Ama okofwo ata beni uzawa tugwuno tumama jilanɛ, okwo ta a dwa ohiu, a na ya waa imunɛ.

¹¹A nda manɛbɛ ma buta, ne meni ma tụ'walụ ta afwafwa, ama i'uyɛ kaa ta kwụna aŋ waa.

¹²Atwa na eri-ụngwụ nụ ụshɛpwụ uko ụ'wụtụ o ngwulo, atwa na zhɛ tu'wo na ugagaga, ama Agwatana kaa 'wa sụ iwɛ adua aba o.

¹³I 'yajɛ atwa oko jeri shi uhioko-uhwaŋna; e eshiciji shi uŋ kwo kaa a 'wa sụ uŋ o.

¹⁴Ụjita shi hwɛɛ, bụkwụnɛ bɛ ishijɛ[44] maa kwụna bukofwo keeni atwa na zasa iyi, nụ ụjita ata du boo zundo izunde.

¹⁵Buwɛle ba ganga tugwo maa ụjita shi; bo urugono ụpɛshɛka ubwa maa kede bụtụ be elele mepi bu o.

¹⁶Nụ ụjita ibɛ ozundo a bwarataga shimwono, ama iyi heri a swakaka.

¹⁷A nda inyɛsɛ uhioko-uhwaŋna, ama tishi tuba ti shanɛ aŋ iyi ya aba tuholo.

¹⁸Meni ma zhagajɛ moo sugo ogworozwo, unu-tukalana wa Agwatana wa ima cɛnjɛ ta aba; a zha shɛ a nda ya ugondu ni itimɛ ya aba ya afwafwa o.

¹⁹Gana na atayɛ-eshilo o no no oholobwo, gobwonu du bụtụ bi iwɛwɛ bo no baa bana na ashashɛ atwa na a ya uraiŋ.

²⁰Okwo bino bwa na meci bu zha shɛ be teyinje ya iwɛ ubwa, eshishi a ya bụ, ba nda ufwu gana ụ'wụ'wụ na leyi.

²¹Ijɛ ye jitono bu, iwɛnɛ tu baa njɛ olulo tawɛ tawɛ, keeni iwɛnɛ bee mepeni shi o'ulo iwɛ.

²²Agwatana a nda atwa a'wụtụ ufwu ni ikɛnyi nɛ baa 'yajɛ. Agwatana ubwa ba nda ugondu, ibɛ po ogworozwo o 'wo.

²³Agwatana eri o lono maa bu na ta ụhinjanụ suu, ama bu ngbarakacɛ bu kaa aka elele.

²⁴Tɛzhɛmana to ogworozwo ti ilegeji shi o, taa namɛ aka fwalaa ta lụmba gana tu'unto, gana ungbongbozu rihiu ru na ɛɛ cushinjɛ.

²⁵I 'yajɛ suu bụtụ na eri ba laka maa shɛ gana ga ijɛ shɛ? I 'yajɛ hŋ bụtụ na eri ba duma maa ụzagwụ Ngee jwe?