Read bassa JOB 26 Bible Online

JOB 26 - bassa bible

JOB 26

¹Go Job jishijɛ bụ, bɛɛ hiɛŋ,

²Gabụ bu m mbiyeni tebiye, Gamba bukofwo na mama zasa!

³Gabụ bu m peni-ahaŋsa na zhɛmɛ; bu m mbisegeni iyi, Gamba alagwụ!

⁴Gaaba ebi heŋshi maa bi zhɛ ba hwuga n-ndumwa mụ bụụ? Gaaba kwuŋ ibi peni n-ndumwa mu ga maa jɛmɛ mụụ?

⁵Atwa na 'wi a zhɛgɛda te e zweni ne meni mu na mu namɛ na cɛnjɛ.

⁶Nhwaŋ-me-e'uye mu namɛ nu ukpogwu ne eshe Agwatana, i zasa iyi elele nɛ urigeni aŋ ne eshe ubwa o.

⁷Agwatana berishiji tụla tuzuba, bee sweci cɛnjɛ tu unyizo araranga.

⁸Agwatana kwunguri meni no odomu, baa untanganɛ mụ, mu bwadụ sụ okwo ti mee zhineni o.

⁹Ubwa bo urugono ụpɛshɛka upiana tu woo rungwutwonu hwɛɛ.[46] Tedure no odomu ubwa na bee berishiji.

¹⁰Ubwa beci bi'nyata ni itekwu, bi'nyata ata ubwa bogwu uhioko-uhwaŋna ne tishi.

¹¹Aka na bee tezhigeni atukpa ata untanganɛ tụla, ibɛ po taa njɛ bulama, inyɛsɛ shɛ tụ, taa zhɛgɛda.

¹²Ni ikɛnyi nɛ baa 'yajɛ baa lasụ itekwu, ne tugwoni tu bwa, baa kwụnɛ usunda ata ụ'wụtụ namɛ ne meni ɛɛ hiɛŋ, Udegbe.

¹³Ni ihwungwɛ ibwɛ boo wofwoji tụla taa namɛ ya kpataa, ni i'ɛlɛ ɛtɛ ibwɛ baa kwụnɛ uhwa ata u ontongonu la.

¹⁴Iyi nɛ kiri aa dumanjɛ cwɛŋ inɛɛ nɛ imɛ ukpahiŋ ubwa ta, iyi nɛ atu hwụjɛ ne tuswɛɛ ta. Gaaba eri ba mapa gana na ugombo wa Agwatana namɛ gomm?