Read bassa JOB 27 Bible Online

JOB 27 - bassa bible

JOB 27

¹Go Job jishijɛ aŋ, bɛɛ hiɛŋ,

²N to Agwatana na shɛ buumwa na du kaa Hwuri Kpaaŋ, na n dumanganɛ shɛ tishiriri, na njɛ maa iyi wumanɛ uraiŋ mu,

³uuwa i ci ụkwụmbwụ na Agwatana a jala maa ma ya uraiŋ mo togoo?

⁴Iyi iwɛ kwukwuŋ zha shɛ ya banɛ nu unu mu, bụratụ mi kaa zha shɛ ba dwa-ụzagwụ o.

⁵N zha shɛ kwukwuŋ mɛ hiɛŋ maa hi teni cɛŋ. N zhɛ mo shikono ne tiririri ti mi maa n-ndumwa mɛ n zhɛmɛ uuwa i ci ụjita mu tu'wo.

⁶N zhɛ mo shikono dimi ma nama ririri, amɛ mi kaa namɛ rumbɛɛ.

⁷Ga atwa na ma n sukakana ni ifelu leshiji ulwapɛ gana ogworozwo na zasa ririri.

⁸Imbe kwuŋ zhɛ ya sha ashɛlatụ atwa na zasa Agwatana na shɛmɛ sha aba na aka na ta Agwatana a jala uraiŋ wa abaa?

⁹Yaa shɛ ụbaụta zhajɛ, Agwatana suu zha hwuga n'ungwa ma aba?

¹⁰A ga shɛ a 'yaga tukwulangana tu unyasa na baa pana atwa; a ga shɛ a na nda adua no ofwo ubwa aka elele.

¹¹Me ci ba Me hi mbisogono gana na tu ukpahiŋ wa Agwatana gembi, maa ma hiɛ kapɛshɛngana iyi nɛ Agwatana na Hwuri Kpaaŋ imanganjɛ.

¹²Awo, hi kwụbwa du kaa ni ikɛnyi hiŋ. Iwembe kwuŋ po tuba ahi ta duma n-ndumwa mu tusashɛɛ?

¹³Gana Agwatana a pana atwa na shɛ ogworozwo a na njɛ abwagara ulwapɛ na.

¹⁴E eri a mata miaụŋ-me-eyi mu ufwugwo ama ɛ zhɛ a kwụna mu hwɛɛ nu ujasa, iyimɛyɛ kwukwuŋ zha shɛ ya twa miaụŋ ma aba.

¹⁵Ụngwụ zhɛ wa kwụna atwa aba elele a na benegeni, okwo olulo aba zha shɛ a ta-ụkwụla iwɛ tu'wo ta aba o.

¹⁶Okwo ugworozwo 'yajɛ azụrụfa na hwuleji tɛrɛta; baa 'yajɛ du tugwuno duwa bee hwuri bụtụ be elele,

¹⁷ama anya atwa a na shɛ atwa tiririri, aba zhɛ o urogono tugwuno ta ata, atwa na shɛ atwa tikpeke aba zhɛ a 'yaga azụrụfa ata.

¹⁸Ugworozwo wa ma shimwono gana na igɛzu ya bata tudodokwuno[47] kwo kaa gana idile nɛ bi'iywa to ne ehilo.

¹⁹Bee weci nu bwa gana bɛzhɛgba kpalụ ko gba, bɛɛ zhinjɛ, asha uduciya ubwa zasaba ya o.

²⁰Uriri zhɛ wa ima bụ eshigiri gana meni na ma zhagajɛ; ujipo tuba zhɛ wo sugo bu nụ ụjita.

²¹Uvwugo uwaŋna-banụ zhɛ wo sugo bu ba bana ni ihwɛ ibwɛ;

²²uvwugo ata zhɛ wo sugo bu uzawa inyɛmɛnyɛmɛ ibwɛ tihioko; okwo bee mekeni gana na bee eri maa ba banangana.

²³Uvwugo ata zhɛ no vwungo ofwo gana na tu boo gozhigo; u no zwono bu inyɛsɛ nu ukpahiŋ na wa nda iyi ufwu na waa 'yajɛ.