Read bassa JOB 28 Bible Online

JOB 28 - bassa bible

JOB 28

¹I 'yajɛ a'ibwa oko na oo hino azụrụfa; yaa 'yajɛ du ofwo na aa nyashɛnga azhɛnarɛya nu ulwa.

²Atwa o hino ashɛmbɛrɛ na cɛnjɛ, oo nicingo atayɛ maa ɛɛ vwɛ ashɛmbɛrɛ eshenje.

³Atwa a dwalakaka iyi te iri taa tuta, aa dwalakaka iyi taa na amɛ cɛnjɛ. O hino atayɛ-tubala na swakacɛ taa na amɛ na amɛ cɛnjɛ.

⁴Ta dụlụmɛ keshici ofwo na bụtụ namɛ, kwo kaa keshici ofwo na uvwuna bụtụ eri wa fwunda. Atwa e iricingo shekwute na cɛnjɛ. A nda ugondu apata obo ko obo ko. A untangana uhwohwo nu u'ibwa a na hwuŋta uŋ.

⁵Iyimɛyɛ ya waŋna na cɛnjɛ, ama e sheyinji iyi elele gana maa tuta tu ulwa yaa namɛ.

⁶Atayɛ na namɛ na cɛnjɛ tu unyizo; a 'yajɛ atayɛ ebiye a na ɛɛ hiɛŋ, Safaya. Ubwodolo wa aba 'yajɛ azhɛnarɛya.

⁷I zasa ucepi na mepi uhwaŋna na zhe na a'ibwa ata o, I zasa du kaa ugwulu na hilwa zhe apata o.

⁸I zasa bizeci kwo kaa isundɛ mazhanga ye elele towo uhwaŋna ata atwa te shi kwukwuŋ.

⁹Atwa o hino uparatayɛ na wumanjɛ uhwuri a na vwɛ, oo hino embi nshama.

¹⁰Gana na te e hini uparatayɛ ata, oo to utayɛ wo ogwumishi ugbe.

¹¹O hino ofwo na urefu wɛ zhinjɛ,[48] ɛɛ bɛcinjɛ iyi elele nɛ ga swacɛ, ee suje iŋ no ofwo uhioko-uhwaŋna.

¹²Ama cee tuba ɛti zhɛ ta ta ti'inta ugbee? Cee ɛti zhɛ to soso maa te eshicigo iyii?

¹³E eri shi a ta ti'inta ugbe na ashashɛ atwa o. I zasa bụtụ mepi ule tuba o.

¹⁴Urefu na iri hiɛŋ, Tu zasaba pi mi o; itekwu hiɛŋ, Tu zasaba no ofwo mi o.

¹⁵E eri shi kaa a sa tụ na azụrụfa, kwo kaa na azhɛnarɛya tishɛshɛshɛ o.

¹⁶Azhɛnarɛya tishɛshɛshɛ keeni atayɛ ogwumishi, eri shi o to ulumo tuba o.

¹⁷Tu hwuri iyi ihwungwɛ hwungwɛ nɛ aa njɛ okwo na azhɛnarɛya; tee hwuri utayɛ ubiye na ɛɛ hiɛŋ, Safaya.

¹⁸Ulumo ti'inta uhwuri utayɛ wo ogwumishi we elele tebiye kwo kaa odworo elele.

¹⁹A zha shɛ a manga ti'inta nu utayɛ wo ogwumishi we elele kwo kaa na azhɛnarɛya tishɛshɛshɛ o. Ulumo ijɛ hwɛɛ shɛ shɛ aa manga na ti'inta o.

²⁰Asha cee kwuŋ ti'inta ta banɛ yaa? Cee eti eri to soso iyi ti'eshicigoo?

²¹I zasa iyi-uumwa ye elele nɛ eri ya kwụba tụ o. Okwo yaa shɛ shanụnụ shɛ na sha hila,

²²okwo tu'wo nu ufwu tɛnda, e leni maa ɛ hiɛŋ ɛ hiɛŋ kwakwa aa hwuga.

²³Agwatana kiri mepi, ubwa mepi ofwo na ee eri ɛ kwubɛ ti'inta.

²⁴Iwɛnɛ po ubwa ba kwụba unyizo hwɛɛ, ubwa kaa ba kwụba iyi elele nɛ namɛ tuta ta tụla tɛ ga.

²⁵Aka na Agwatana peni uvwugo ukpahiŋ, bee heŋshi gana na urefu na iri ụ shɛ wo to ugombo.

²⁶Aka na Agwatana heŋshi ofwo na eshilo shɛ o no ngbo, keeni geri na uto ụ shɛ wo dulo;

²⁷aka ata ibɛ baa kwụbɛ ti'inta, bee menji ulumo tuba. Ibɛ po bɛɛ bɛcinjɛ tụ no tulono tu bwa.

²⁸Agwatana hiɛŋ atwa, AGWANGWAMA inyɛsɛ tụsụma, ibɛ shɛ ti'inta, iyi iwɛ kaa tuganga, ibɛ shɛ iyi ti'eshicigo.